Sang ilamu dalam palei hu padang ngak prong siam 

Ngan haong urang Cam tui agama Bàlamôn atau Cham Jat, Cham cuh dahlau deih, tuk hu urang lahik ye peih ngak ndam metai tui njauk pakat. Mayah urang matai ieu lac sa dalam dom halau janeng ye peih ngak tui njauk pakat nyu; mayah urang lahik ieu lac tui adat sang kaya meda ye peih ngak karei di urang kan kathaot, rambah rambup tui adat dalau… daok bau di urang halau janeng ye hu ba palao di pabah kraong, pabah tasik; talang mbau di urang kaya meda lac hu palao di kraong praong, mbau di urang kan kathaot ye hu palao di ribaong ia.

Peih ngak tui jalan diuk rai siam makre dalam palakhah, padang ngak ndam metai lahik saong harei roya, tal urak ini hu rilo bruk salih bahrau siam lagaih dalam raidiuk di urang Cham ngan haong palakhah, oh daok bruk pakauk di dom urang karei agama saong hu tut angan tok gauk tui njauk adat di hukum. Dom adat tok gauk oh daok parilo min jeng daok khik hu siam lagaih di ilamo meng kan, klaak bruk thách cưới, dua gah nao gaok mbaok. Bruk padang ngak ndam metai lahik jeng hu peih ngak patakik veik tukvak, dom adat oh daok lagaih jeng hu klaak abih.

Ong Bố Xuân Hổ - sa urang ilamo Cam daok di xã Phan Hiệp, huyện Bắc Bình brei thau, bruk ngak njauk tui dom adat di dalam diuk rai siam makre saong harak adat puk palei dalam bruk tok diuk pasang, bruk padang ngak ndam metai lahik dak harei dak hu mikva Cam pachreih tui, padang ngak biak siam lagaih.

Bruk padang ngak ndam metai, tok diuk, pasang di urang Cam urak ini hu rilo siam lagaih jang. Dahlau deih meda ngak meng 15 tal 20 harei, daok urak ini njauk daok meng 2 tal 3 harei. Min jeng daok hadom bruk daok gaok tavak tavaiy caong hu ginum biai, pagap yau ngak ndam metai lac 3 harei, daok di Phú Lạc bhap bini oh daok ngak veik bo ngak gam haong harei cuh. Atau lac dalam harei brei huac, peih tapuk tabiak iek umo thun di urang lahik haong urang diuk  yau habar min urak ini drei klaak abih blaoh jeng mboh hu siam lagaih di dalam bruk nan.

Oh lac hu salih siam lagaih dalam bruk ngak ndam metai, bruk tok diuk pasang, bo dalam adat lễ nghi vòng đời di urang Cam jeng hu salih siam lagaih. Ong Lư Văn Xuống, daok di palei Bình Thắng, xã Phan Hòa, huyện Bắc Bình, brei thau lac: adat ngak Kareh saong Katal (adat di urang jeng dam dara) urak ini hu peih ngak katut veik harei. Dahlau deih, dom urang hu mbaok tame ngak Kareh Katal njauk nao mek ikan, tame gilai kaoh njuh piah caga ka harei ngak adat. Saong hadei di tuk ngak blaoh ye dom urang ini jeng daok veik piah daong ka po sang ngak adat meng 7 tal 10 harei.

        (Băng tiếng Chăm: Nao tah njuk, pah yot... Ni lac bruk salih bahrau jang dahlau deih..

Oh lac pathau khan jak ba urang Cam peih ngak siam makre, ilamo dalam palakhah, padang ngak ndam metai lahik saong harei roya bo bruk ini jeng hu ba tame harak adat di yaok puk palei Cam, rik tame bruk peih ngak danak dak “rahra jum pataom gauk padang ngak jalan diuk rai siam makre, ilamo”, padang ngak palei pala bahrau di bhum urang Cam.

Gam haong nan, peih ngak tui asal kadha di ilamo dalam bruk padang ngak palei pala bahrau, tal urak ini dom xã bhum Cam jeng hu sang ilamo saong abih tih dom palei jeng hu sang ilamo. Puac thun 2021 dom baoh sang daok di 3 xã hu rilo bhap bini Cam mek hu angan “Sang ilamo” lac labaih 85%, 12/12 palei di 3 xã nan jeng mek hu angan palei ilamo. 

Min tapi, gam di dom jak jeng mek hu, harak ilamo di dom xã palei pala bahrau urak ini ka pabak hu dom panuac ieu kakei ba tabiak di dalam tukvak masa bahrau. Dom Sang ilamo padang ngak dak suai lavik, kurang pandap anda; bruk khik ramik, pandar saong peih dom bruk di dom Pasak Ilamo - Thể thao xã, Sang ilamo palei daok rilo bruk kan kandah, bruk pandar daok takik, ka patagok hu abih prein pandar. 

Ndem mayai tal bruk ini, ong Huỳnh Văn Vinh, Yam ndok Pasak Ilamo, Thông tin - Thể thao huyện Bắc Bình, tỉnh Bình Thuận brei thau, piah patagok abih prein pandar di Pasak Ilamo - Thể thao xã, Sang ilamo palei ye njauk hu bruk pambuak di gah palei saong gah ilamo khau tin.

Anak bruk nan ye yaok thun di dom harei lễ atau lac dalam dom bruk ngak di drei hu peih tui yaok labik bhap bini. Pagap yau Văn nghệ thể thao dom palei bhum atah biyah, blaoh văn nghệ thể thao 4 xã bhum ceik, blaoh harei roya palei dom xã palei pala bahrau, daok dom harei lễ di urang Cam, yau ye harei mbang Ramưwan, Katê drei pambuak gam haong puk palei piah peih dom bruk ngak uan harei di bhap bini drei.

Piah pambuak patui bruk khik khang dom asal kadha ilamo dalam bruk padang ngak palei pala bahrau yaom glaong, gam tui di bruk paglaong cơ sở vật chất ilamo piah khik tani tanat tui adat bahrau, dom labik hu rilo bhap bini Cam daok njauk paglaong bruk pathau khan jak ba bhap bini patu veik peih ngak jalan diukrai siam makre hu ilamo dalam palakhah, padang ngak ndam metai lahik saong harei roya, gam tui di nan jeng peih ngak siam lagaih dom sarak ilamo, piah pabak caong di bhap bini dalam tukvak masa bahrau/.

Urang lang: Jasamad Hẳn -18/9