Thun 1986, dom baoh sang urang bangsa Cam camereip abih ba gauk nao daok di xã Suối Dây, huyện Tân Châu, tỉnh Tây Ninh padang bruk ngak mbang. Tuk nan, jalan mbak nao mai biak kan kandah, pandiak ye thur mur par bak, daok hajan ye gluh baoh, hareik hareim phun glai tamuh bak, pacang vil val palei, sang danaok ye sit sot. Taik tahak, raidiuk mikva gaok biak rilo kan kandah. Ong Chàm Dốp, umo 63 thun, hadar veik:

 “Dahlau daih mai daok pak ini drei ngak padai 1 vụ, 2 vụ, hadei di nan hu khuyen nong urang pato pala bei, tabau, cao su, hu jalan dhuan peih praong biak lagaih biak bingi”.

Langiu di nan, rilo sang daok hu mesraiy jien di Gilang pariak sarak karja piah ngak mbang, pala drak, raong glang, meng nan, raidiuk dak harei dak tagok. Dom sang kaya mada dak harei dak rilo, dom sang kan kathaot trun tui yaok thun. Sa-ai Thị Pay, daok di palei Chăm, xã Suối Dây, huyện Tân Châu brei thau:

“Hu rajakar brei nyim jien ngak mbang lin uan tabuan lo, jien nan lin mek mai raong lamo, raong pabe, urak ini lin bayar hu meneing ye, uan tabuan rajakar hu daong ka lin hu jien rtaong anek…”.

Tal harei ini, dalam huyện Tân Châu hu 5 sang megik Islam hu padang ngak praong, siam piah ka mikva hu labik samen samtu. Dom harei roya atau bilan eik Ramadan  di urang Cam Islam jeng hu pakat cấp ủy, karja saong kapul nyaom dom pakat mai ravang, hadiah pandap, ngak jeng talei rohi khang kajap, tapa nan, rik daong khik ramik sron mbon puk palei saong patagok ilamu bangsa. Ong Chàm Sệt, Hakim Jamaah Cam Islam xã Suối Dây khan lac:

 “Mban Hakim pambuak bruk haong ấp, xã, huyện pathau khan jalan ngak di Đảng, hukum di karja brei ka mikva thau saong ngak ka nyu njauk, mikva sahanang hatai ngak mbang, yam tagok ngak kaya mada, rilo sang blei hu  xe hơi, radaih la-ua”.

Peih ngak danak dak bruk ngak negar padang ngak palei pala bahrau, dom jalan praong di bhum urang Cam jeng hu tuh bê tông, tuk nhựa ginup abih. Sang ilamu hu ngak pasiam veik saong hu ginup pandap pabak ka dom bruk me-in sambai, pataom gauk ginum biai. Mbaok mata puk palei dak harei dak hadah hadai jang, taong abih anek kamuan dalam umo bac ta-a jeng hu nao bac abih, bruk lakah caga tuk umo daok sit saong bruk tok gauk dalam but pajaih oh daok. Ong Hà Huy Châu, Phaok Chủ tịch UBND xã Suối Dây, huyện Tân Châu brei thau:

 “Đảng ủy hu brei bruk ka urang jakar di xã tame sinh hoạt haong chi bộ piah peih ngak dom sarak, dom danak dak, jalan ngak di UB piah ka mikva urang Cam ngak siam tui sarak di Đảng, hukum di Karja. UB jeng hu ngak dom bruk daong ka mikva Cam piah yam tagok dalam raidiuk, nan lac bruk brei mesraiy jien ngak mbang, pablei salih, brei jien bac ka dom adei anek saih kan kathaot kham merat yam tapa kan kandah saong padang baoh sang jum pataom brei ka dom sang kan kandah piah hu labik daok siam mekre, sahanang hatai ngak mbang, tani tanat raidiuk”.

 Raidiuk di mikva urang Cam daok di huyện Tân Châu, tỉnh Tây Ninh harei ini hu salih bahrau meng bruk jum pataom gauk, kham merat yam tagok, sa hatung hatian haong karja palei padang puk paga dak harei dak siam mekre, kaya mada./.