Paglong hatai sahneng khik caga môi trường, padang jalan diukrai hajao ka bhap bini

Bruk camereiup di danak dak lac parang iek “Diuk bahrau haong klauk” bahrau hu peih tabiak di  Hà Nội ngan haong 10 kadha  nghệ thuật rami ramik hu meng taong abih pandap lac pandap hu pandar bloh. Hu ngak meng harak mbao klak, khali, takhaok dep, pandap điện tử… dom kadha “Kiến tạo”, “Tái sinh, “Con đường mới”, “Tuần Hoàn”, “Thoát kén”… dong ka urang mong iek hu thau jang ka dom kanjah jhak  di bruk pandar cai biak rilo, tuk bruk blei pandap gam gam rah tabiak, song pandap klak oh padeih njauk klaak nao, ngak jeng  hareik hareim biak prong, kateik greik tapak  tal alam môi trường duik. Caik dalam hatai sahneng dom kadha biak gheih di mbang parang iek “Diuk bahrau haong klauk”, saai Nguyễn Thị Hiền daok di  Lý Thường Kiệt, Hoàn Kiếm, Hà Nội khan lac:“Biak lac oh ka mboh dom pandap hu ngak tabiak meng li-I, canaih,khali, takhaok dep atau jamriak li ar , phone tangin klak.- dom pandap biak bhian randap song drei. Meng lavik mai, pandap klak drei bhian klaak nao, hadei di tuk mboh parang iek, drei hu sahneng tabiak rilo bruk, drei njauk pandar veik dom pandap klak atau blei veik dom pandap dok pandar hu siam, takik klaak nao, ngak jhak tal alam môi trường"

10 kadha hu parang tabiak di parang iek “Diuk bahrau haong klauk” lac bruk ngak hu di dom  nghệ sĩ song rilo urang ranaih umo takre  nghệ thuật di taneh ia dalam labaih 2 bilan kham merat ngak tabiak.

Abih di nyu nan lac, bruk hu mbaok tame danak dak nghệ thuật “Diuk bahrau haong klauk” oh lac ba mai rilo hatai pachreih paneh tabiak bahrau,, bo dok dong ka dom nghệ sỹ salih bruk bhian randap blei pandap yau urak ni. Saai Hoàng Thái Ly, Gru pato sang bac Đại học Mỹ thuật Công nghiệp brei thau: “Biak lac sa bruk biak chreih chrai, nyu lac dom pandap panda hu rai duik karei di nyu, song hu nao tapa biak rilo trun, tagok, hu dom pandap rilo jang umo thun di drei, ye drei pandar dom pandap nan tame bruk sahneng tabiak sa bruk hagait nan bahrau, ngak jeng bruk dui pachreih, ngak ka drei hu hatai pachreih paneh tabiak. Kadha di drei lac jalan  bahrau, hu makna lac darak pasa siam, nao hu sa jalan atah  labaih 10 thun bloh song meda lac dok ngak tabiak sa bruk pandar pandap klak, pasiam veik rai pandap klak. Daok kadha mầm xanh, hu makna lac, bruk patui pandar dom pandap klak song brei pandap klak tal rai duik bahrau, tal dom po bahrau song ngak tabiak dom pandap panda hu jalan patagok khang kajap, pachreih urang pandar pandap klak.”

Dok ayut  Hoàng Kiến Phúc, sinh viên sang bac Đại học khoa học xã hội song nhân văn, Đại học Quốc gia ban raya  Hồ Chí Minh biak njauk hatai haong makna di bruk padang bhian randap pandar pandap klak:“Dalam tuk ngak, jang yau ndom nyai nao mai song dom tác giả karei, hulin mboh pandap klak hu makna biak prong dalam bruk padang sa harei hadei duik hajao. Salih ka bruk dom pandap klak nan klaak tabiak môi trường, ngak jhak tal môi trường, ye drei meda dui atah rai di nyu jang, song patakik hareik hareim nan. Meng nan,drei meda padang sa dunya khang kajap, pandar khang kajap, duik hajao.”

Meng prein dui pachreih meng  thẩm mỹ  song dom panuac ndom khang kadang ka khik caga môi trường, parang iek “Diuk bahrau haong klauk” taduan hu bruk sangka di rilo menuac urang ban ine ngan song yaok rituh mbang urang rivang iek yaok harei, hadei di 3 harei peih tabiak. Urak ni, parang iek hu padang thaot binguk 3D di  website chotot.com, piah pabak hatai caong iek nghệ thuật ka urang maong iek . Tui  muk Hoàng Thị Minh Ngọc, Yam ndok  Tăng trưởng song  Chiến lược di Chợ Tốt, tuk vak anak tal danak dak “Chợ Tốt pamaong tal kinh tế tuần hoàn” daok hu pambuak bruk song dom gah peih ngak rilo danak dak, bruk ngak hu makna, piah paglong hatai sahneng khik caga môi trường, padang jalan diukrai hajao ka bhap bini: “Dalam tuk vak anak tal, kol dahlak daok hu dom bruk ngak, pachreih urang pandar kaoh tabiak sa binah jien dalam giao dịch mangaok chợ tốt, gam song nan lac Chợ Tốt meda rik tame meng gah công ty , piah dong ka dom kapul nyaom dok rik dong ka bruk khik caga môi trường, pandar cai khang kajap. Pagap yau lac, rik dong  ve chai .Ni lac, sa kapul nyaom hu dom adei saai dok joa kandang pataom mek hareik thải nhựa song rik dong biak prong dalam bruk daong ngak veik hareik thải nhựa.”

Tui Carousell Recommerce Index 2021, kayua Tập đoàn Carousell Group, tập đoàn Quảng cáo Rao vặt dang akaok di Đông Á song Đông Nam Á peih ngak, 83% urang  Việt Nam hu blei pandap pandar bloh daok patui ngak bruk ni. Taphia di nan, pandar cai khang kajap, dalam nan hu pandar veik, ngak veik song khik caga môi trường, dok jeng sa dalam dom bruk caik hatai dang akaok di dam dara, abih di nan nan lac  rai rah Gen Z- rai rah tacei ba jalan pandar dalam tuk vak anak tal./.

Urang lang: Hani Pha – 09/07