Sa-ai kumei angan Ksor H'Nhươn, menek di thun 1994, daok di Bôn Tông Se, xa Ia Trôk, huyen Ia Pa, tinh Gia Lai khan lac: Dahlau daih, hu 4 sào taneh apuh, thun halei langik siam lagaih ye sang dahlak hulin hu ginup brah piah mbang. Thun 2022. Sa-ai H'Nhươn hu huyen alin hadiah sa drei limo binai ine meng danak dak trun hu kathaot karo kajap. Meng bruk tacei ba di urang jakar gah ngak nong xa brei ka bruk pala hareik, raong limo saong ngak hamu ia, tal ini sang sa-ai kamei hu 4 drei limo la-oi. Sa-ai Ksor H'Nhươn ndom mayai lac:

“Sang dahlak hulin daok dalam baoh sang urang kathaot, mai meng hu daong, hadei di 2 thun kham merat ngak mbang sang dahlak jeng hu truh kathaot. Mai meng jien patak pataom sang dahlak hulin hu pdang ngak baoh sang barau, limo binai ine jeng menek hu dom mbang. Tuk raidiuk hu tani tanat sang dahlak mada daok patagok bruk ngak mbang, duah hu jien mek tame saong piah raong anek bik nao bac tal labik tal dhua”.

Daok dom baoh sang kathaot hu lamo blaoh yau ye sang sa-ai M’ Rlan H'Wanh, menek ndih tapui di thun 1988, daok di Plơi APa Ơi Hbriu, xa Chư Mố, huyen Ia Pa thun ini hu mbaok tame tal bac raong glang. Sa-ai H'Wanh khan brei thau lac, sa-ai saong 20 baoh sang di dalam palei hu bac meng bruk ngak hacih sa-at var ro njauk tui ilamo barau tal bruk thau, langyah samar drah dom ruak bhian rah tabiak yau laka cambuai tapaok kakau saong barah kalik tamuh baoh rup limo kabao, lac:

“Meng di tuk hu tui bac kol dahlak hulin jeng thau bruk brei mbang yau habar brei ka siam lagaih piah khik ginup prein khang kajap ka anek athur raong. Kol dahlak hulin jeng hu tacei ba cambaih laih brei ka bruk caga ruak saong tuk mboh limo njauk ruak brei taong ruak yau habar ka siam ka lagaih di abih. Piah caga ruak njaom pambak di anek athur raong yau laka cambuai tapaok kakau, barah kalik tamuh baoh…ye kol dahlak bhian ngak pahacih sa-at var ro.”.

Gam haong bruk ngak mbang saong pato pakai bruk ngak njauk haong bruk ngak randap bhian di mikva, dom xa kan kandah di huyen Ia Pa cjeng hu buh tame ngak bahrau yaok pluh mbaik kilo met jalan mbak di dalam bhum palei, daong ka mikva hu kein lagaih dalam bruk nao mai pajeng ba pandap panda ngak nong. Ong Rcom Ngưl, Bi thu Chi bo gam Dang akaok palei Bôn Trôk, xa Ia Trôk, huyen Ia Pa brei thau:

“Meng di thun 2021 tal ini hu karja sangka padang ngak jalan mbak kol dahlak biak bui sambai. Dahlau daih jalan nao mai biak kan daman kandah kandaiy kandah, bilan hajan ye gluk glak ma ia  ma ait, bruk pajeng pandap panda ngak nong jeng biak rambah rambeip. Meng harei karja buh akaok tabiak dang ngak jalan meng betong pambuak palei palei saong jalan dalam palei ye bruk nao mai angaok jalan biak kein lagaih jang, mikva di ini biak chreih chrai bui sambai, pajeng ba pandap panda ngak nong oh daok rambah yau dahlau.”.

Tal ini, huyen Ia Pa jeng hu peih 11 tal bac piah drak klak patruh bruk oh thau akhar haroh brei ka 310 urang dan saong 10 tal bac pato magru bruk ngak ka labaih 500 urang, daong rahra hu ilamo bruk ngak dan saong binyol lagaih mbuan duah hu bruk ngak. Ong Ksor Suy, Phaok Akaok UBBhap bini huyen Ia Pa brei thau jalan ngak hu yaom glaong di dom danak dak patrun kathaot ieu lac sajanih daong ka bhapbini rahra trun kathaot karo kajap saong pacang brei tukik baoh sang urang kathaot:  

“Bhian sangka iek glang, pasang iek bruk ngak di dom danak dak, danak dak patrun kathaot di palei labik. Langiu di dakwah pathau khan, paglaong glao akaok saneng, pachreih hatai kham merat patagok truh kathaot brei ka bhap bini rahra; ngak brei ginup sampurna jeng ye drah sumu dil dom sarak di ndang saong karja dan haong baoh sang kan kathaot, jaik kan kathaot; parilo jien mek tame saong paglaong diukrai di urang kan kathaot pacang caga urang bhap bini druh laik gilac tame kan kathaot; daong patakik baoh sang urang kathaot ralo janih kadha dan haong kajap karo.”.

Dom bruk ngak mbang njauk lagaih haong ilamu adat cambat daok dang dalam raidiuk daong mikva urang bangsa takik di tinh Gia Lai hu jia tame di drei brei patagok mbang ngui patruh kan kathaot suai atah karo./.