Sa-ai Bùi Hữu Thiện, daok di xã Phú Mỹ, huyện Tân Phước, tỉnh Tiền Giang jeng yau hadom urang ngak nong karei daok di bhum Đồng Tháp Mười oh sahneng mboh lac hu sa harei raidiuk hu trei sir yau harei ini. Kayua dahlau daih, Tân Phước lac bhum taneh glai klo, njaom lakhun; di ala ribaong tok hu dom janih ikan yau: ikan lia thia, bảy trầu; angaok mbaok taneh bak phun glam, phun năng, phun drai tamuh bak…Tapa 30 thun peih taneh bilau, ngak pasiam, bhum taneh ini hu salih karei; ia njaom lakhun hu jhul kadun likuk, dom gluh baok meng kraong Tiền nduac tame ngak ka bhum taneh ini dak harei dak siam. Sang sa-ai Bùi Hữu Thiện meng oh hu taneh ngak mbang, tapa patak pataom, blei taneh tal ini, sa-ai hu 20 ha manaih, hu jien tame yaok thun:

   “Bhum ini meng dom thun mai ini jaik abih rahra pala phun manaih biak hu kein laba. Dahlak paik hu yaok bilan meng 50-70 tấn. Yaom manaih urak ini tal 11 ribau đồng/kg, dahlak hu jien tame yaok thun meng 6-7 tỷ. Bhum ini salih bahrau, jalan mbak hu ngak bahrau siam mekre. Dahlak tui veik peih praong bruk pala phun panaih”.

  Meng bruk sangka, buh jien di Trung ương, di tỉnh Tiền Giang saong bruk kham merat di Đảng bộ, karja, rahra hu ngak brei “salih mbaok meta” bhum taneh ini. Dahlau abih lac jalan mbak palei pala bhum Tân Phước hu sangka buh jien, hu tuh patau bhong salih ka jalan haluk blaoh ngak jalan menyek, duh siam ka bruk patagok kinh tế - xã hội. Tok kuhria dalam tukvak meng 2020 - 2025, huyện Tân Phước hu buh jien ka 162 danak dak haong yaom jien abih tih labaih 500 tỷ đồng. Dom ribaong patui veik hu ngak blaoh, paglaong prein, pacang caga angin rabuk, pacang khik salamat bruk ngak mbang, pala drak. Daok lưới điện hạ thế duh ka bruk ngak mbang saong daok dang di rahra, patagok dom sang hu điện pandar tal urak ini hu 100%, bruk pabak điện ka bruk ngak mbang, daok dang yaok harei dak harei dak siam jang…Amuk Nguyễn Thị Ánh Nguyệt, Akaok UB Bhap bini xã Tân Hòa Đông brei thau, Tân Hòa Đông dahlau daih lac bhum atah bayah abih di huyện, cơ sở hạ tầng oh hu hagait min urak ini hu ngak siam gheih, praong, kajap, raidiuk di rahra dak harei dak trei sir:

     "Tal tuk ini 40 km jalan mbak di xã hu pasiam veik, peih praong, tuh bê tông, ngak khang jalan biak lagaih ka bruk nao mai di rahra jeng yau bruk pablei salih pandap panda. Pablei salih nao mai hu lagaih, dom pandap panda kaya nong di rahra jeng hu glaong tagok duk haong dahlau daih. Raidiuk di rahra patagok meng mbang ngui tal me-in, sambai tal urak ini jien tame di rahra hu jaik 60 triệu đồng sa urang sa thun".

   Dom sarak jalan ngak di Đảng, Karja samu, pambuak haong bruk tari taring di rahra tal harei ini, bhum Đồng Tháp Mười ini patagok gah ngak nong tani tanat, tui jalan paglaong nang suat, chat luong, siam, pandar mac moc, số hóa. Bhum pala manaih di Tân Phước dang akaok negar haong taneh pala labaih 17.000ha. Ong Trần Hoàng Phong, Akaok UB Bhap bini huyện Tân Phước brei thau, meng bruk ngak nong hu daong biak praong ngak salih mbaok meta labik ini bo rilo abih lac phun manaih, phun padai. Ong Phong ndom lac:

“Pak Tân Phước lac ngak pandar taneh, caong khin pandar taneh ye brei duah thau, ngak iek hu pala iek dahlau phun ini, phun daih min puac abih kak kajap haong huyện Tân Phước lac phun padai saong phun manaih hu pala praong. Baoh manaih thun ini yaom biak glaong tal 10.500 đồng/kg, yaom ini urang ngak nong hu laba biak rilo. Abih di nyu nan lac mikva urang ngak nong pala padai ye hu công nghệ glaong saong số hóa glaong di abih”.

 Meng dom bruk ngak hu biak njauk pok meyaom min Đảng bộ saong rahra bhum Đồng Tháp Mười ini oh ka njauk hatai, bui tian haong bruk di anak meta bo kham merat padang huyện Tân Phước, tỉnh Tiền Giang dak harei dak bahrau jang, patagok glaong jang./.