Tui saai Phan Minh Tiến, CEO Công ty mật dừa nước Vietnipa, huyện Cần Giờ, TP.HCM ye tal tukvak ini, dom pandap panda hu pablei tabiak langiu prein caong maong, rilo rahra, doanh nghiệp di TP.HCM saong dom bhum jaik taphia pachreih tui. Labaih 1.500 paok pandap alin OCOP TP.HCM hu pablei tabiak.

Kadung pandap hu ngak lagaih saong yaom pablei lẻ lac 500.000 đồng sa pa-aop. Bruk ini oh lac ngak jeng bruk pambuak gauk meng prein khang angan je, mayaih khan bo siam di abih lac pachreih hu prein blei pandap OCOP di tukvak puac thun:  "Salih ka bruk tok hu sa doanh nghiep pablei ye urak ini abih 5 doanh nghiệp jeng pablei hu pandap. Kanja 5 palei jeng pablei hu pandap. Urang pan akaok Ban raya tuk pilih pandap alin tết ka palei jeng pilih pandap tết di Ban raya saong oh daok having akaok pilih ruah pandap di palei, doanh nghiep halei. Bruk jumpataom ini piah ngak tabiak sa paok pandap ngak jeng prein khang jumpataom gauk saong kein lagaih pablei pandap tabiak hu siam jang dut saong dahlau deih".

Saai Lê Ngọc Lụm, po labik Green House Viet, huyện Nhà Bè mboh biak hadah mbaok mata tuk pandap Ia đông trùng hạ thảo di labik ngak ini hu mbaok dalam paok pandap alin Tết di TP.HCM. Dom gah ngak tabiak pandap OCOP karei hu palagaih ka dom po bahrau peih bruk ngak mbang, padang bruk bhian randap, hatai sahaneng ka bruk padang angan je di rilo gah saong pandar siam abih dom prein khang meng angan je nan piah dui pachreih saong peih praong darak pasa: " Bruk pambuak gauk ini siam abih lac bruk mayaih khan, daok yaom glaong ka kinh te dalam nan ye dahlak saong adei saai ka oh khin sahaneng tal. Drei mboh langiu di bruk pandar dom kein lagaih di gah truyền thông piah mayaih khan angan je ka Ban raya ye tuk rilo pandap gam pambuak haong gauk blaoh daong ba gauk gam cak rok patagok ye meda lac ba mai kein laba. Yaok pandap jeng sahaneng lac njauk kham marat miat miat ngak habar ka chat luong oh njauk kadun likuk ye yaok harei angan je OCOP TP.HCM dak harei dak hu paglaong tagok, drei mboh bruk ini lac biak siam, biak makre".

Paok pandap alin OCOP TP.HCM hu ba mai rilo siam mekre tuk pamadeih tagok dom đơn hàng pandap Tết Nguyên đán 2024. Ong Trần Thanh Oanh, Yam ndok Cty XNK pandap mbang ABZ, huyện Bình Chánh - doanh nghiệp daok dang angan alak sâm đinh lăng mek hu tanut OCOP 3 patuk – lac urang dang tabiak pambuak haong dom gah ngak pandap OCOP TP.HCM ngak tabiak paok pandap alin biak lagaih ini. Ong brei thau lac, tuk camriep, ong kuhria pablei labaih 1.500 paok min dom đơn kakei blei tapa prein drei caong maong. Tal urak ini, kuhria mboh hu labaih 25.000 paok pandap ini hu pablei ka dom doanh nghiệp dom labik ngak kong pak Long An, Bình Dương saong TP.HCM tui đơn kakei blei. Dalam nan hu sa doanh nghiep pak Long An kakei blei labaih 1.000 paok pandap Tết brei ka urang ngak kong, urang ngak.

Ong Trần Thanh Oanh brei thau lac daok pambuak haong dom gah ngak pandap brei ngak dahlau rilo janih pandap OCOP dalam yaok paok pandap alin tui hatai caong di darak pasa, tuai damuai, gah blei. Gam tui di nan, pandar dom hệ sinh thái rilo janih, siam makre piah patagok yaom glaong ka pandap panda OCOP, pamaong tal bruk ba pandap OCOP yam atah jang. Hadei di pandap  Tết mbang ini, rilo pandap OCOP karei di dom tỉnh meda hu mbaok tame takik di nyu 4 paok pandap karei piah pabak ka bruk blei pandar di 4 bilan. Dalam nan, dom doanh nghiệp meda ba dom paok pandap ini tal tuai du lịch saong pablei tabiak darak pasar negar Úc, Nhật Bản, Hàn Quốc…

 "Dom combo pandap bahrau oh lac pablei dalam tuk Tết bo meda hu pablei di dom labik pablei pandap lưu niệm tapen tasik saong dom pabah mbang negar. Urak ini, kol dahlak daok padang dom labik pablei pandap lưu niệm angan je di palei pak pabah mbang negar Tho Mo, Long An lac labik bo tuai du lich mai biak rilo ngan haong 25 quầy pandap. Pamaong tal dom gah pambuak bruk hu prein khang pablei di mblang kapar ahaok dunya. Harak pambuak bruk hu mbaoh tangin blaoh paje. Adei saai dom gah ngak pandap jeng pachreih tui pandap OCOP oh lac taeng di TP.HCM bo daok lac di dom tinh, ban jaik taphia…"

Bruk caga dahlau di dom gah ngak pandap OCOP di 5 huyện langiu ban raya hu ngak brei jak jeng ka paok pandap alin Tết, paok pandap camriep abih di TP.HCM. Bruk pambuak gauk piah pablei pandap bhum palei yaom lac oh bahrau, min bruk pandar prein khang di angan pandap haong gauk saong patagok siam lagaih abih di sa labik pataom veik, pasak pablei tabiak pandap di bhum daok daong ka dom gah ngak tabiak pandap OCOP TP.HCM hu mai jaik gauk jang, daong ba pandap Việt yam tabiak atah./.