Dom labik nerak tachauk biak rilo dahlau deih, urak ini hu hijao mekre, ba mai labik daok siam jang ka bol bhap rahra. Quận 8 lac sa dalam dom labik yau nan. 

Nao tal labik mblang taneh ka 3189 daok dalam phường 7, Quận 8 harei ini, thei jeng mboh tatuak drei, kayua labik ini oh daok lac labik pataom nerak tachauk di urang eng drei ba mai tuk klaak, mbau bruk, bo jeng bein phun jru. Hu yau nan, meng hu bruk kham merat, ba tangin tame di rahra dalam palei piah ba nao labik karei dom nerak tachauk, pasiam veik mblang hareik hareim.

Amuk Lê Thị Tuyết, Bí thư Chi bộ khu phố 4, Phường 7, Quận 8 brei thau: "Meng mblang bein ini, urak ini drei mboh pambak tabiak nao rilo khu phố karei. Labik drei daok nao tal halei drei mboh uan tabuan kayua jalan mbak hacih sa-at, anak sang hu phun hijao. Saong harei ini praong di abih lac hatai sahneng di yaok urang halan hatian buh jien mek nerak ka Cty dịch vụ công ích pataom mek nerak. Di labik kraong ia yau Quận 8, ini lac bruk salih bahrau biak khang dalam hatai sahneng di yaok rahra duk haong dahlau daih".

3 thun dahlau, mblang taneh klaak saoh labik 366 di jalan Bùi Minh Trực, phường 6, quận 8 lac labik hareik hareim gluh baok kayua nerak tachauk prah tabiak meng ngak mbang huak di rahra. Meng pathau khan jak ba "rahra oh prah hareik hareim tabiak jalan saong kraong ribaong, brei ka ban raya hacih saong patrun dauk ia" bo mbaok meta labik ini hu salih karei. 

Ong Phạm Hồng Vũ, Phaok akaok UBND phường 6 brei thau, tal tukvak ini, phường hu ngak brei hijao 4 mblang hareik, labik taneh klaak saoh piah ngak labik pala kayau, labik pasram pahat, ngak bui, me-in sambai ka urang taha saong uranaih.

 "Puac adit mikva bhian pataom gauk veik blaoh puh ramik yaok jalan hẻm, meng nan dom jalan hẻm dak harei dah hacih mekre jang. Mikva klaak bruk bhian randap prah hareik ban glai ban klo, drei ngak brei salih jalan sahneng di mikva. Blaoh tapa pathau khan, bruk prah hareik trun ribaong jeng trun daok takik, abih di nyu lac dom sang bhian prah hareik trun kraong ribaong".

5 thun tapa, Quận 8 hu ngak pasiam taong abih 135 labik nerak tachauk alam môi trường, khik ramik bruk tui iek vệ sinh môi trường. Quận jeng hu ngak pasiam 59 labik buh hareik hareim jeng labik pala phun hijao, bein njam, labik me-in ka uranaih…

Amuk Trần Thanh Hà, Chủ tịch Mặt trận Negar Việt Nam Quận 8, TPHCM brei thau, anak tal, karja saong dom kapul nyaom dalam Quận brei jak ba saong peih ngak bruk panduan ba rilo sang danaok daok tapen kraong piah pasiam veik, piah ngak brei salih bharau mbaok meta  đô thị: "Urak ini Quận 8 daok pataom tame ka dom danak dak bờ Bắc, bờ Nam kênh Đôi… Min dom sang danaok daok mangaok saong di tapen ribaong biak rilo, nan ye brei buh tame rilo jien padai. Jeng daok cang dom danak dak hu peih tabiak ngak piah Quận 8 salih bahrau abih mbaok meta saong cakrok patagok glaong jang"

 Quận 8 haong dom labik karei dalam TP.HCM, jeng daok ba tabiak bruk ngak praong di abih lac brei khik ramik dom labik dân cư hacih mekre, ngak habar ka bruk khik ramik hacih sa-at alam môi trường hu tame dalam hatai sahneng di yaok rahra, pamaong tal bruk puac di abih lac TP.HCM hacih - mekre, văn minh, raidiuk bhap bini hu ilamu, bak hatai anit ranam gauk saong dak harei dak siam jang./.