Nghệ sỹ hu parang main dalam tuk tết nguyên đán

Urak ini, jit ruak daok pasang iek hu siam jang, UB bhap bini ban raya brei pacadu dom bruk, mbang klauk vaccine ka 3 pacang COVID-19 jeng daok hu ngak saong abih di nyu lac Harei pataom kịch nói pakat negar 2021 hu peih tabiak ngak di ban raya HCM hu ngak jeng prein khang jhul tagok ka dom sân khấu hadah gom pamere urang maong iek.

    Sa kadha biak bui sambai lac meng di tuk dom đoàn kịch peih pablei vé atau alin hadiah harak di dom mbang parang me-in dalam Harei pataom kịch nói pakat negar 2021 di ban raya HCM ye tok dalam 1 harei lac abih vé. Hu labik pablei abih mbong 200 vé hadei di 4 mong tabiak panuac brei thau.

NSƯT Trịnh Kim Chi - Phaok Chủ tịch Hội sân khấu ban raya HCM gam lac Yam ndok sân khấu kịch Trịnh Kim Chi brei thau lac, sa-ai haong dom nghệ sĩ jeng mboh biak chreih chrai tuk Harei pataom taduan hu bruk pachreih tui biak praong meng urang maong iek. Tapa nan brei mboh lac urang maong iek di ban raya daok caga mai veik haong sân khấu:

“Meda lac sa prein 2 bruk, gam caga pasram ka harei pataom gam caga ka harei peih pabah mbang veik dom sân khấu nan ye Chi mboh biak bui sambai, saong dom adei sa-ai nghệ sĩ jeng mboh chreih chrai, dreih yau hu pabak brei prein. Tal harei 17/1 tamat harei pataom ye Chi jeng kuhria ka bruk parang me-in Tết Nguyên đán meng harei 1 bingun tal harei 5 bingun Tết”.

Dreih yau nan, NSND Hồng Vân haong đoàn kịch di sa-ai jeng daok jar var pasram ka 2 vở diễn hu mbaok tame Harei pataom lac “Ngã rẽ” haong “Baoh sang angaok ghe”. Ini jeng lac 2 kadha bo sân khấu kịch Hồng Vân kuhria ba tabiak parang me-in Tết Nguyên đán meng harei 1 bingun tal harei 7 bingun:

“Thei jeng sahneng lac Tết ini oh me-in hu nan ye tuk mehit panuac brei thau bahrau di ban raya, thei jeng uan tabuan. Urak ini caga biak glaih glar min thei jeng bui sambai. Jeng patuah lac njauk di tuk Harei pataom sân khấu nan ye drei jeng hu 2 kadha bahrau piah parang me-in Tết paje. Langiu di nan, drei daok kuhria ba tabiak parang me-in veik dom kadha di Tết thun bloh. Tuk nan daok caga harei parang me-in min oh ka parang me-in hu nan ye thun ini drei rami ramik veik piah ba tame parang me-in”

Di sân khấu Kịch nhỏ 5B Võ Văn Tần, NSƯT Mỹ Uyên jeng pilih ruah harei 1 bingun Tết, lac harei 1/2/2022 piah peih pabah mbang veik bo oh peih chip dalam bilan 1. Sa-ai caong khin sân khấu hu caga biak tani tanat, pilih ruah dom kadha biak gheih piah payua tal urang maong iek di ban raya dalam tuk Tết:  

“Hadei di dom duh hatai, pandik harao di tukvak tapa ye urak ini brei ngak hagait nan ka nyu bui sambai. Kol dahlak kuhria ngak dom hài kịch, dalam 1 melam hu 3 dalikan bui sambai. Nan lac danak dak di harei 1 bingun 1 Tết. Daok meng harei 2 bingun tal harei 5 bingun ye drei brei pablak tame dom kadha bo meng blaoh kol dahlak hu tabiak mbaok min oh ka hu parang me-in rilo. Meda lac nyu ndung bak bruk giải trí glaong min jeng daok hu kandaong veik hasit hagait nan suan yava di raidiuk."

Langiu di sân khấu kịch Trịnh Kim Chi, Hồng Vân haong 5B ye dom sân khấu kịch karei yau: Quốc Thảo, Hoàng Thái Thanh, Thế giới trẻ,.. jeng hu padang ngak dom kadha piah caga ka bruk hadah gom parang me-in Tết. Gam haong nan, dom bruk pacang caga jit jeng hu kuhria caga piah daong ka urang maong iek hu sahanang hatai mai haong sân khấu saong hu dom tuk bui sambai chreih chrai. Hadei di sa tukvak atah kandang joa ye urak ini hu mai veik haong dom sân khấu, haong dom đoàn kịch di ban raya HCM. Nghệ sĩ maong akaok hu taom gaok veik urang maong iek, saong urang maong iek di ban raya jeng daok cang, daok maong dom pandap mbang “tinh thần” bui sambai chreih chrai dalam tuk Tết ini./.

Urang lang: Mousaphuong- 15/1