Di phường Bình Trị Đông B, quận Bình Tân, ini jeng lac thun camriep, anek saih pakat THCS di phường oh daok nao tapa dom phuong jaik taphia piah bac. Sang bac THCS Bình Trị Đông B jeng lac baoh sang bac pakat 2 camriep hu padang ngak di phuong, daong patrun hu dom kan kandah di anek saih dalam bhum ini tuk oh daok nao bac atah. Ong Hồ Thanh Danh, Akaok Sang bac THCS Bình Trị Đông B brei thau, thun ini sang bac hu 16 bilik lac ngan haong labaih 660 anek saih. Abih tih gru pato saong anek saih hu bac taa dalam sang bac  bahrau:  “Sang bac hu padang ngak bahrau saong hu ginup dom bilik chức năng. 36 bilik bac hu caik tivi, dom jamraik am thanh ginup piah pabak ka bruk salih bahrau jalan pato bac. Langiu di nan, daok hu dom bilik karei yau bilik gilang tapuk biak praong, dom bilik dut iek lý, hóa sinh, bilik kong nghe, bilik  âm nhạc, mỹ thuật, tin học hu ginup dom pandap pabak ka bruk salih bahrau jalan pato bac, daong ka gru pato, anek saih sahanang hatai pato saong bac”.

  Daok di huyện Hóc Môn, yaom lac thun bac bahrau ini tok hu sa sang bac hu peih pakak ba tame pandar, min ini lac sa sang bac biak siam hu ginup abih janih. Nan lac sang bac Tiểu học Lê Văn Phiên, xã Tân Thới Nhì, hu ginup dom bilik chuc nang karei, hu labik mbang huak, danao caluai ia, mblang pahat pasram rup pabhap, tani tanat ka bruk pato saong bac 2 var sa harei tui danak dak bahrau. Ong Nguyễn Anh Tuấn, Phaok Yam ndok Jabat pato magru huyện Hóc Môn brei thau, Jabat jeng hu ginup dom gru pato saong thun bac anak tal meda peih bruk pato ka 4 tal sa:  "Thun bac 2024-2025 hu sa labik bahrau hu padang tabiak lac Sang bac Tiểu học Lê Văn Phiên, xã Tân Thới Nhì, praong 30 bilik bac saong dom bilik chuc nang hu padang ngak biak khang kadang, bahrau, pabak hu hatai caong bac taa di anek saih pak xã Tân Thới Nhì saong dom xa jaik taphia.”

Ong Ngô Văn Tuyên, Akaok Jabat Pato magru quận Bình Tân brei thau, Bình Tân tuk halei jeng lac sa dalam dom quan hu rilo anek saih di sa tal dang akaok dalam Ban raya. Dalam thun bac anak tal, dom anek saih mầm non saong tiểu học di dom tal, dom sang bac samu dom thun bac dahlau. Urak ini, bruk cuang kandah gam gam daok rahtabiak di pakat THCS  kayua dom anek saih pakat ini dalam quan tagok rilo jang labaih 2 ribau adei.

7 baoh sang bac hu ba tame pandar dalam thun bac bahrau lac: 1 sang bac mầm non, 5 sang bac tiểu học saong 1 trường THCS hu 204 bilik bac bahrau, patagok dom bilik bac di quận Bình Tân abih tih labaih 4.000 bilik. Dom bilik bac nan jeng ka oh pabak hu abih bruk bac 2 var sa harei ka anek saih di quận Bình Tân, min ini hu maong lac bruk kham merat di ban raya, kham merat di quận. Ong Tuyên daok brei thau lac: “Pakat tiểu học urak ini kol dahlak peih ngak tui jalan patrun dom anek saih meng dom sang bac vil val hu rilo anek saih, hu sang bac meng 2.000 anek saih tagok ye meda brei parabha anek saih tapa sang bac bahrau. Kayua yau nan ye, dalam thun bac 2024-2025 dom anek saih bac 2 var sa harei meng labaih 52% tagok 62% pakat tiểu học, daok pakat THCS meng 38% tagok labaih 48%”

Thun bac jaik tal, quận Bình Tân kuhria raok labaih 26.000 uranaih akaok pakat bac (dalam nan hu 6.800 uranaih tame tal bac umo 5 thun, labaih 10.000 uranaih tame tal 1 saong 10.500 anek saih tame tal 6). Urak ini quan jeng daok kurang labaih 1.200 bilik bac ka pakat tiểu học saong THCS. 

Meng ini tal puac thun, TP.HCM kuhria hu veik 6 sang bac bahrau di Quận 4, quận Bình Thạnh, quận Bình Tân saong dom huyện Nhà Bè, Hóc Môn, Bình Chánh. Patui di nan tal thun 2025, Ban raya kuhria ngak salah veik labaih 280 bilik bac, daong pabak co so vat chat ka bruk bac saong pato./.