Ong Võ Văn Hồng, daok di palei Tiến Thạnh, xã Tiến Lợi, ban Phan Thiết kak kajap haong bruk pala bingu labaih 15 thun ini mai. Thun halei bein bingu sang ong jeng chreih chrai bilan bingu Tết. Thun ini, sang ong Hồng hu buh tame labaih 30 triệu đồng ka bruk pala bingu Tết, tui nan pala rilo jang saong bingu jeng hu rilo janih jang. Urak ini sang ong daok pataom prein tame sangka iek glang piah bingu raak njauk tuk Tết: “Bingu Tết thun ini hu mồng gà, long phụng, cúc mặt trời, mắt nai, hướng dương, maraik saong  cúc 5 sambo mau ngan haong labaih 5.000 chậu. dut saong dom dom janih njam patam harei ye pala bingu Tết hu laba jang.”

Urak ini bein bingu sang ong Hồng saong rilo po bein karei di xã Tiến Lợi daok tamuh siam. Di dom mblang hamu di palei Xuân Hoà, xã Phong Nẫm, ban Phan Thiết, bruk jar var ngak bruk di urang nong jeng oh lah hagait.

 Amuk Trương Thị Hít brei thau lac, sang amuk pala rilo meng lac phun trường sanh piah pablei ka dom baoh sang chưng Tết. Bruk ngak bhian saneng lac mbuan min piah ka phun cảnh tamuh siam, hijao saong tabiak bingu njauk tuk Tết ye brei kuhria tukvak, sangka tani tanat yaok bruk. Langik tasik lac bruk hu makna praong ka bingu Tết tamuh siam, nan ye urang nong thei jeng caong hajan siam hangin lagaih, pablei bingu hu yaom, amuk Hit ndom lac: “Harei 25 (bilan Mat) urang tame iek bingu, mayah gheih ieu yaom, hu tuk urang blei 50-60 ribau đồng 1 phun, tabiak darak pablei hu 100 ribau sa phun, jeng hu tuk cagar veik, blei di labik drei 100 ribau sa phun ye tabiak darak tok pablei hu 50-60 ribau đồng sa phun. Jeng hu tuk yau ini, tuk yau deih, yau thun bloh urang blei 100 ribau đồng sa phun ye tabiak darak pablei hu 150 ribau đồng sa phun. Mayah hu yaom ye laba hu jaik mateh jien.”

Kak kajap haong bruk pala bingu Tết jaik 30 thun, ong Nguyễn Văn Bảy daok di palei Phú Điền, xã Hàm Hiệp, huyện Hàm Thuận Bắc brei thau, langik thun ini oh lagaih, pandiak rilo saong hu hangin ngak ka phun praong suai, abih di nyu nan lac phun trường sanh bhong. Jeng tui ong Bảy, bilan bingu tết ini yaom pandap ngak nong, jien pajaih jeng tagok glaong jang thun dahlau, ngak tagok yaom jien buh tame. “Phun ini drei  pabam di akaok bilan 6 ( saka ia bilan), bilan 8 drei ba tabiak chậu tal 25, 26 bilan Mat urang mai blei sỉ ye drei pablei. Hu tuk pablei hu 70 – 80 triệu, gaok mai oh hu. Thun blaoh pablei hu, 100 ribau đồng sa phun.”

Ong Đỗ Văn Bảo, Akaok Chi cục Pala drak saong khik caga phun pala tỉnh Bình Thuận brei thau, dalam tỉnh hu labaih 24 ha pala bingu Tết, rilo meng lac dom janih bingu meng kan yau ye cúc, vạn thọ, trường sanh... di grauk dom huyện, ban sit. “Di Phan Thiết hu bhum Phong Nẫm, Hàm Hiệp, mikva bhian pala bingu trường sanh – lac janih bingu meng kan hu parang caik di mangaok bàn thờ muk kei. Tet thun halei mikva halei jeng pala trường sanh, meng kan mai tal urak ini. Langiu di phun trường sanh daok hu bingu vạn thọ.”

Hadei di 2 thun njauk kan kandah di jit ruak COVID-19, thun ini, darak pasa bingu Tết di dom po bein di Bình Thuận daok chreih chrai gilac veik saong urang pala bingu daok biak caong hu jien mek tame rilo meng bruk pala bingu Tết./.