Kol dahlak tame ravang iek tal pato raong menuk kayua Pasak pato pakai bruk ngak – Pato megru gam gam huyện Trần Đề pambuak haong xã Trung Bình peih tabiak di ấp Bưng Lức haong 18 urang bac, taong abih jeng lac mikva urang Khmer. Di tal bac, urang hu pato dom ilamu raong menuk, meng bruk kuhria caga, padang ngak var ro, pandap mbang, klauk jru caga ruak tal bruk thau dom janih ruak di menuk… Meng nan, daong ka mikva thau hu jalan raong menuk kein laba, mek jien tame sang. Sa-ai Lâm Hol daok di ấp Bưng Lức, urang bac dalam tal bac khan lac: “Huyện Trần Đề hu trun tacei pato mikva bangsa Khmer ilamu raong glang. Tuk bac blaoh drei thau hu jalan iek glang menuk blaoh drei blei menuk mai raong. Dahlak tuk camereip kuhria raong iek 100 drei, hadei di nan meng raong rilo jang.”

Kayua bruk di palei lac pala drak, raong glang nan ye pato bruk ka urang brei hu dom jalan ngak ka nyu lagaih haong yaok kapul urang. Sang sa-ai Lý Thị Liễu diuk meng bruk ngak padai haong raong menuk, ada. Dahlau daih, kayua kurang ilamu nan ye bruk raong menuk di sang sa-ai bhian khat. Meng tuk tame bac tal pato raong menuk blaoh ngak tui, tapon menuk di sa-ai praong siam, ba mai kein laba. Sa-ai Liễu brei thau: “Pasak daong 50 drei menuk, dahlak blei 30 drei tra, tuk hu bac megru blaoh, dahlak mboh raong jeng mbuan. Urak ini raong 80 drei ini dahlau, tuk hu laba drei raong rilo jang.”

Phường 2, ban sit Vĩnh Châu rilo meng lac urang Khmer daok. Tapa duah thau, mboh lac bhap bini caong hu pato dom bruk piah ngak yaok harei di sang, Pasak pato pakai bruk ngak – Pato megru gam gam ban sit Vĩnh Châu hu peih tal pato bruk pak yot ka mikva dalam khóm Soài Côn. Tapa tal pato bruk ngak, rahra hu jien mek tame, pasiam raidiuk. Amuk Tăng Thị Sà Vol khan lac, bruk peih dom tal bac pak di khóm, hu ba mbuan lagaih ka rahra tame bac. Abih di nyu lac gam hu bac bruk ngak, dom adei sa-ai kumei daok hu daong jien 30 rabau đồng sa harei. “Mikva rami ramik tukvak, hadei di tuk salah bruk hamu puh ye tame bac. Caong lac hadei di tuk bac blaoh hu taduan mek pandap mai pak mbang pah piah duah jien.”

Tui Sở Lao động - Thương binh saong Xã hội tỉnh Sóc Trăng, thun blaoh,  dalam tỉnh hu peih bruk pilih ruah menuac tame bac, pato hu ka 17.540 urang ngak, mek hu jaik 110% bruk ba tabiak. Gam haong nan, hu ba bruk ngak brei ka labaih 29.400 urang ngak, mek hu labaih 105% bruk ba tabiak. Tapa nan, hu daong patrun baoh sang kan kathaot dalam thun lac 2%; dalam nan baoh sang Khmer hu labaih 3%.

Ong Trần Nhuận Thanh Liêm, Yam ndok Pasak pato pakai bruk ngak – Pato megru gam gam ban sit Vĩnh Châu brei thau, Vĩnh Châu lac labik hu urang bangsa takik daok rilo abih di tỉnh Sóc Trăng, dalam nan bangsa Khmer hu labaih 52%, bangsa Low labaih 17% dom menuac sia dalam ban sit. Meng jhul khang bruk pato pakai, ba bruk ngak, hu daong ka raidiuk bhap bini bangsa takik dak harei dak hadah hadai. “Kol dahlak pambuak bruk haong xã, phường, dom sang bac dalam ban sit peih bruk pilih ruah menuac piah pato pakai pak di palei, anek saih ye drei pato di sang bac, daok urang bangsa takik ye drei pato di dom puk, palei, meyah caong khin ye kol dahlak brei gru pato trun pato. Akaok thun kol dahlak brei da-a urang dang akaok dom xã, phường tagok piah duah thau, blaoh meng nan kol dahlak ba tabiak dom bruk bo sở brei pato, ieu xã tut angan, blaoh bhap bini drei pilih ruah bruk ngak ka nyu lagaih, kol dahlak trun peih pato.”

Danak dak pato pakai bruk ngak ka urang ngak palei pala lac bruk biak siam saong hu makna, hu daong ba bruk ngak tani tanat, paglaong jien meka tame sang, patagok kinh tế palei. Tỉnh Sóc Trăng jeng ba tabiak bruk lac dalam thun ini, meda ba bruk ngak bahrau brei ka 28.000 - 30.000 urang ngak saong pato bruk ngak brei ka 16.000 – 18.000 urang ngak./.