Rapaneih Lê Minh Sơn hu peih akaok dalikan ngan saong kadha kanar hadhar di ong ka sa melam nao mong iek, roh duah dalam ragu ragam Tay Nguyen. Ong klah rabha: “Lac sa urang diuk rai haong ragu ragam, dahlak hu nao tal rilo labik, meng Bao Thuan, Ndam Rong di Lam Ndong jeng yau rilo bhum taneh angaok bhum ceik Tay Nguyen. Daok haong mikva tapen ghing apui, gam pang dom ragam chieng, kadha daoh di urang Tay Nguyen, dahlak taduan mek hu biak cambaih laih asal kadha di bhum ceik glaong, sap yava di ceik glai dalam ragu ragam bhap bani. Kreh melam di bhum ceik glaong, daok di tapen ghing apui di bhum taneh Ndam Rong, dahlak gindang dalam sap yava saong taduan hu meng dalam baoh hatai, kong chieng bhum glaong nan lac suan yava di ceik glai”...

Rapaneh Lê Minh Sơn daneiy angan haong rilo kadha adaoh bhap bani jaman bahrau, dom kadha daoh ndung bak asal bhap bani min hu pluh tame suan yava di rai diuk harei ini. Tui ong, janih biak karei di yaok bangsa hu brei mboh dalam ragu ragam: “Kong chieng hu poh meng tangin, mai meng dom peik ralo di urang bangsa takik. Ragam chieng nan jeng lac ragam di baoh hatai di urang ma-in. Yaok bangsa jeng hu sa asal kadha biak karei saong ini lac kadha caik ka khlaol drei njauk iek prong, njauk pok glaong”.

Dalam harei roya Kong chieng Ndong Nam A Asia Tenggara hu peih ngak bahrau blaoh, rapaneh Lê Minh Sơn caong khin, ngak yau habar ba hu kong chieng mai tal rai rah dam dara meng panuac kadha di jaman bahrau. Urang daok ranaih dam dara hu taom gaok haong kong chieng meng sap ndom di jaman bahrau, hu thau saong thau cambaih laih panuac ndom di sap chieng, sap kong. Ong saneng lac, piah ka urang dam dara taom gaok hu kong chieng, njauk ba hu suan yava di rai diuk bahrau, njauk hu panuac ndom harei ini min tapen nan, njauk pacang khik njauk haong yaom tamo di dom ragam kong chieng hu meng kan mai.

Nda Lat nan ieu lac daok dalam talei pak di dom Ban hadah krah di UNESCO gah ragu ragam. Kayua yau nan ye, danak dak meda kham merat ngak tabiak hu labik piah ka dom urang gheih tangin saong urang mong iek jaik gaik di abih. Urang mong iek ranaih meda taduan mek hu sap chieng, ragam kong dalam aia kakuan la-ar, taduan hu ragu ragam meng urang adaoh urang take lac urang bangsa takik, dom mbaok meta brei mboh hu asal di taneh, di ceik. Khik hu janih bhap bani biak karei di kong chieng Tay Nguyen, langiu di nan brei pachreih hu urang ranaih nan lac kadha bo rapaneh Lê Minh Sơn caong hatai daok saneng tal.

Rapaneh Lê Minh Sơn jeng taong yaom lac, gam khik ramik, gam cak rok patagok ragu ragam meng kan nan jeng lac bruk piah ka bhum palei bingu ngak rivang ma-in, pachreih hu tuai damuai mai haong ragu ragam di urang bangsa takik. Gam khik ramik, gam meyaih khan hu ilamo meng kan tal bhap bani meda daong ngak ka bruk rivang ma-in cak rok patagok khang kajap jeng yau ngak ka kong chieng Tay Nguyen yava miet, meng kan dahlau diah mbiah harei ini saong tal harei hadei./.