Tui hatai ba abih kham marat tacei pato di taha akaok palei K’Tiếu, tal harei ini xa Bao Thuan, tinh Lam Ndong hu labaih 200 urang taong paoh ma-in cambaih laih kong chieng, dalam nan hu labaih 30 urang daok dalam kapul di puk palei.

Thun 2022, taha akaok palei K’Tiếu hadah mbaok hu Akaok negar pok brei angan Nghe nhan Uu tu kayua ong hu rilo rik daong prein tame ka bruk khik ramik saong cak rok patagok inem krung oh mboh di meta di bangsa. Taha akaok palei K’Tiếu ndom mayai lac:

Dalam rai diuk habhrau ini biak kan, min drei pathau khan yau habar piah ka kaol ranaih nyu thau saong nan ka nyu meng takre. Dom urang halei takre ye nyu meng tari tareng pathram bac megru saong taduan mek hu. Kadha daok ngak ka taha saneng kuhria nan lac pren yava di taha oh daok tra, bo oh thau dom anek saih bo taha pato nan nyu hu megru yau taha halei oh? Harei hadei nyu hu pato ka rai rah dam dara halei ha oh? 

Sa-ai K’Breo daok di xa Bao Thuan, tinh Lam Ndong brei thau, lac urang daok dalam kapul kong chieng di puk palei sa-ai biak bui sambai saong tari tareng pathram ma-in. Mai meng nan bo tal harei ini, sa-ai hu thau taong cambaih laih.

Dahlak biak takre taong paoh kong chieng, urang kamei njauk thau taong thau paoh dreh yau likei. Dahlak thau ma-in cambaih laih paje, hadei ini dahlak meda dang tabiak tacei pato ka rai rah dam dara piah ka khol ranaih nyu thau ma-in thau taong kong chieng. Nan kac kaol ranaih harei hadei oh lahik nao ilamo meng kan di bangsa.

Tui dom yaom lingai saong pren diuk di ilamo kong chieng dalam rai diuk dom bangsa takik di tinh Lam Ndong, Viet Nam saong angaok dunya, dom taneh aia Ndong Nam A sa tangin haong gauk peih ngak harei roya kong chieng Ndong Nam A di tinh Lam Ndong.

Amuk Nguyễn Thị Bích Ngọc, Phaoak akaok So Ilamo, Padhih saong Rivang sirah tinh Lam Ndong brei thau, ini lac tukvak piah ka dom urang gheih tangin, bhap bani dom bangsa takik tinh Lam Ndong nao mai haong gauk, bac megru, ginum biak ilamu haong bhap bani dom bangsa takik di bhum taneh Tay Nguyen, dalam taneh aia saong angaok dunya ka bruk pacang khik saong cak rok patagok dom yaom ilamo meng kan di bangsa. 

Tapa danak dak ini meda pachreih hu rilo jang bruk hu mbaok di bhap bani puk palei. Abih di nyu dalam nan, ini jeng lac sa dalam dom danak, bruk ngak di bilan 12 duh ka tuai damuai mai rivang ma-in, padeih padei saong duh ka bhap bani puk palei hu dom rivang iek ka ilamo di tinh Lam Dong.

Ilamo kong chieng hu yam tapa hala paga ilamo di sa bangsa piah hu jeng janih ilamo siam gheih di bhap bani saong lac ndap nda rivang ma-in biak chreih, biak karei.

Rivang jirah duah thau ilamo kong chieng nan ieu lac sa bruk duah thau ka ragu ragam, adaoh tamia saong adat cambat tanarakun urang bangsa daok di Tay Nguyen. Tuai damuai urang jirah meda hu mbaok tame apui kajang, menyum tapai, ralo am, lisei tahanek dalam krem la-a, ginum biai nao mai haong bhap bani puk palei saong duah thau ka inem krung ilamo oh mboh di meta ini, piah duah thau ka nyu dalam jang ka anek manuac, langik tasik saong hatai saneng urang daok di bhum taneh glai ram ceik glaong./.