Ong Nguyễn Văn Tuấn, xa Phước Tân, huyen Xuyên Mộc brei thau, Sarak 168 di Rajaei hu brei pandar meng harei 1/1/2025, langiu di bruk tagok tanut taong bhat jien, bruk taong bhat catang dom bruk ngak chung hukum di kapul chuc nang ngan haong urang peih nduac radaih angaok jalan mbak hu daong siam lagaih bruk dui takik trun bruk njauk bala angaok jalan mbak, ilamo di rahra hu salih cambaih laih: “Meng tuk Sarak 168 di Rajaei hu ba tabiak tal tuk ini dahlak hulin mboh bruk ngak tui bruk pakaro salamat angaok jalan mbak di mikva lac biak glaong. Meng dahlau oh ka hu Sarak 168 ye rahra nduac radaih, biak srau kadau min urak ini taong bhat biak glaong nan rahra ngak tui, takik nduac balik”.

Dahlau di tuk Sarak 168 ba tabiak, piah dui patakik njauk bala di jalan mbak, rilo labik bhum palei hu padang dom bruk piah khik kajap karo salamat dalam labik daok di rahra. Di dom palei dalam xa Cù Bị, huyen Châu Đức hu ngak bruk “canah pak karo salamat dalam labik daok rahra”. Dom labik ini brei cih inem kanyik pagam haong akhar huroh “nduac gap gap” di mala mbaok jalan jaik dom canah jalan piah kakei caga urang nduac radaih di jalan mbak tani tanat jang tuk nao tal canah klau, canah pak jalan di dom labik daok rahra. Ong Nguyễn Văn Hùng, xa Cù Bị brei thau: “Meng tuk hu inem kanyik ini ye bruk njauk bala jalan mbak trun takik rilo, oh mboh njauk bala jalan mbak rah tabiak veik tra, rahra hu ilamo ngak tui biak siam. Tui dahlak hulin brei peih praong bruk ini di rilo labik, abih di nyu nan lac di dom jalan canah pak. Ngak hu yau nan ye bruk nduac radaih jalan mbak hu siam jang”.

Hadei di labaih 2 bilan Sarak 168 hu peih ngak, dom bruk ngak chung angaok jalan mbak hu trun rilo. Kapul canh sat jalan mbak kong an tinh taong bhat jaik 12.440 bruk ngak chung angaok jalan mbak.

Bruk mbuan si njauk bala jalan mbak bhian rah tabiak yaok harei. Langiu di ilamo ngak tui dom adat di sa kapul rahra oh ka glaong, sa banah kayua rilo jalan padang bahrau, pakajap, peih praong… pagam tui lac rilo canah jalan, dhan jalan hu peih tabiak, rilo he thong ralaoh jalan, gom jalan gaok pacang lahik nen mbuan ba tal njauk bala jalan mbak. Amuk Trần Thị Ngọc Tình, Urang dalam Gah karo salamat jalan mbak xa Cù Bị, huyen Châu Đức brei thau:“Dam dara xa pambuak haong kong an xa ngak bruk pasang iek dom jalan hu njauk bala jalan mbak, meng nan tagok jalan padang, ngak tui 2 danak dak. Nan lac pagam dom ralaoh jalan ka bruk karo salamat jalan mbak rah tui jalan xa, jih tagok dom jalan karei pambuak haong jalan pasak haong angan “nduac gap gap” piah paglaong ilamo di rahra dalam bruk ngak tui adat ka karo salamat jalan mbak”.

Tui Gah Karo salamat jalan mbak tinh Ba Ria – Vung Tau, piah dui patakik trun bruk njauk bala angaok jalan mbak hu karo kajap, tukvak anak tal dom kapul hu patagok peih ngak peih ngak siam lagaih ngak Sarak 168 di Rajaei ka bruk taong bhat ngak chung hukum angaok jalan dalam bhum. Dom bhum palei haong gah chuc nang pasiam veik dom bruk mbuan gaok bala jalan mbak saong dom bruk oh njauk lagaih dalam kapul ngak bruk jalan mbak, patagok bruk pathau khan paglaong ilamo, ngak jeng bruk randap bhian di rahra tuk peih nduac radaih angaok jalan mbak./.