Dom doanh nghiệp daok biak caong khin Sarak bahrau ini samar hu peih ngak piah meng nan peih talaih dom tavak tave di sarak, jalan ngak cak rok patagok. Nguyễn Quang - Urang vak di rayo sap ndom Viet Nam daok di TP.HCM hu kadha vak ndom ka bruk ini:

Ong Nguyễn Minh Luân, Cố vấn jalan ngak di Cty Cổ phần Phong Phú Vina TP.HCM, doanh nghiệp hu labaih 14 thun ngak bruk dalam gah Logistics saong năng lượng pasiam veik brei thau, jaik 3 thun mai ini, doanh nghiệp jeng oh ka taom gaok hu jien phun bahrau meng urang urang negar langiu buh jien tame ngak mbang. Dalam tuk nan, dom phun jien brei mesre dalam negar daok dang veik.   

Piah khik ramik saong cak rok patagok bruk ngak mbang pablei salih, công ty brei nao duah dom phun jien mesre gah langiu haong jien jhung glaong. Tui ong Nguyễn Minh Luân, meng Sarak bahrau ka TP.HCM bahrau hu Quốc hội brei tapa meda padang jalan ngak, sarak piah hu rilo jalan ieu pataom phun jien buh tame ngak, dalam nan mai meng urang ngak di drei.

"Sarak 54 bahrau, hu dom jalan ngak, sarak dui pachreih bol bhap rah ra saong peih talaih kan kandah, tavak tave ka harak gar, dự án piah ka phun jien buh tame ngak “nduac” samar jang. Tapa nan, daong ka doanh nghiệp TP jeng hu jalan cak rok siam hadei di tukvak atah kan kandah kayua oh hu phun jien".

Tui dom doanh nghiệp, Sarak bahrau njauk hu samar drah ngan haong TP.HCM. Kayua dom adat hukum urak ini oh ka pabak hu abih dom bruk di ban raya, njauk hu khung pháp lý ka nyu laghaih piah peih talaih, ngak jeng pren khang bahrau piah ka TP.HCM cak rok patagok, brei mboh labik dang akaok di drei.  

Ong Nguyễn Ngọc Hòa, Akaok Hiệp hội Doanh nghiệp TP.HCM (HUBA), Akaok Hội đồng thành viên Cty Đầu tư jien padai karja TP.HCM (HFIC) brei mboh hatai jia tapa Sarak bahrau, meda dui pachreih hu khang dom urang buh jien tame ngak mbang praong, suai lavik. Dalam nan, brei adat pandar dom jalan ngak pambuak tal bruk pambuak gauk buh jien tame ngak mbang tui jalan ngak pambuak bruk công tư (PPP); jalan ngak “Dak padang - Panduan jao” (BT) …Ong Nguyễn Ngọc Hòa brei thau:  "Binah pren khang di Karja lac binah phun jien  1 saong khaol drei ieu pataom phun jien đối ứng ka 2 meng di bol bhap rah ra, di doanh nghiệp piah tagok praong bruk buh jien tame ngak…,yau nan cambaih laih lac khaol drei daok parilo dom jalan ieu pataom phun jien. Hu binah phun jien di Karja, hu binah phun jien di bol bhap rah ra piah ngak jeng bruk pambuak gauk, pataom veik gah phun jien pabak hatai caong khin cak rok patagok biak prong di ban raya".    

Tui Tiến sỹ Trần Du Lịch, urang daok dalam Tổ tư vấn kinh tế di Thủ tướng Raja-ei, ini lac mbang akaok meti Quốc hội brei tapa Sarak hu 2 asal kadha prong. Nan lac, jalan phân cấp phân quyền saong dom sarak biak karei.  

Tui Sarak 24 di Bộ Chính trị ka cak rok patagok kinh tế - xã hội saong khik kajap quốc phòng, an ninh bhum Đông Nam Bộ tal thun 2030, jalan ngak tal thun 2045 saong Sarak ka 31 di Bộ Chính trị ka jalan ngak, bruk ngak cak rok patagok TP.HCM tal thun 2030, jalan ngak tal thun 2045, ban raya lac asal, lac pren khang jhul patagok. Kayua yau nan ye, meng Sarak bahrau hu brei tapa meda ngak jeng jalan ngak biak siam dalam bruk dui pachreih urang buh jien tame ngak mbang praong, suai lavik, dom urang buh jien tame ngak dalam gah công nghệ glaong, sahneng duah salih bahrau…laghaih atau ieu pataom dom pren khang ka jien padai, taneh riya. Urak ini, TP.HCM daok peih ngak dom jalan ngak piah peih tabiak jalan nduac ka phun jien, abih di nyu lac phun jien brei ka bruk cak rok patagok kinh tế pambuak pagam bhum taneh. Tiến sỹ Trần Du Lịch ndom lac: "Bruk gar gah hạ tầng lac biak prong. Dom jalan mbak nao mai hu peih talaih khang dalam tuk vak anak tal, abih di nyu lac bruk pambuak gauk cak rok patagok bhum taneh. Dua bruk gar ini tuk hu peih talaih lac jalan praong cak rok patagok bahrau. Tui dahlak lac kadha biak praong ka peih talaih".

Sarak bahrau ka TP.HCM hu rilo doanh nghiệp, chuyên gia kinh tế taong yaom glaong. TP.HCM jeng daok caga piah peih ngak Sarak. Meng dom jalan ngak sarak biak siam laghaih, Sarak hu caong lac gai veih praong piah ka kinh tế di TP.HCM saong di bhum Đông Nam bộ, bhum kinh tế praong gah Meraong cak rok patagok tapa sa vaktu bahrau./.