Meng dom sarak daong di Đảng, kanja, puk palei saong bruk kham marat yam tagok di mikva, raidiuk di urang bangsa khmer di xã Vĩnh Quới, ban sit Ngã Năm dak harei dak ginup meda. Mai tal dom phum sóc di mikva Khmer xã Vĩnh Quới, oh daok mboh dom baoh sang taik tahak, bo hu salih meng dom baoh sang daning kiak khang kakajap, sang halei jeng hu radaih mac, hu pandar đien, ia hacih, hu sangka siam ka prein yava…

Dalam dom thun tapa, tỉnh Sóc Trăng tuk halei jeng sangka tacei pato dom gah, dom pakat peih ngak ginup, samar drah dom sarak bangsa, pataom tame ngak khang dom danak dak, jhul patagok kinh tế - xã hội bhum bangsa takik, abih di nyu nan lac jhul samar bruk peih ngak dom asal kadha, dom bruk di danak dak bruk ngak negar ka cak rok patagok kinh tế - xã hội bhum bangsa takik tukvak 2021-2025. Meng nan, bruk  kinh tế - xã hội bhum bangsa takik hu cak rok patagok, raidiuk di mikva hu caik hatai sangka.

Saai Danh Giang, urang bangsa Khmer daok di puk Phú Ninh, xã An Ninh, huyện Châu Thành, lac sa dalam dom baoh sang pala njam patam, baoh kraoh saong raong limo khan lac, sang dahlau deih jeng kan kandah, hadei ini, saai hu ngak pasiam jaik 1ha taneh pala padai piah pala njam patam pambuak haong raong glang. Piah daong ka sang saai Giang cak rok patagok kinh te hu siam lagaih, gah ngak nong palei hu daong pato pasram ka ilamo pala drak saong daong phun jien ngak sang halam pala njam patam saong jalan pruh ia tự động. Meng nan sang hu jien mek tame tani tanat, yam tagok tabiak truh kathaot, jeng sang hu jien mek tame rilo di palei.

Kuhria tal puac thun blaoh, sang kan kathaot di tỉnh Sóc Trăng trun daok labaih 15 rabau baoh sang, meblah labaih 4,5%, dalam nan, sang urang Khmer kathaot trun daok labaih 7 ribau sang. Dalam tỉnh urak ini, taong abih xã hu sang ilamo, labaih 95% puk palei hu sang taom gaok, ginum biai ka rahra. Bruk pato magru hu sangka ngak siam. Abih di nyu nan lac, tinh hu 10 sang bac phổ thông bangsa gam bac gam daok, hu labaih 3.300 anek saih tui bac. Taong abih dom xã, phường, ban sit dalam tinh jeng hu bilai y tế, rik daong sangka siam prein yava ka bhum bangsa takik. Ong Dương Si Thal, akaok mban khik ramik paha  Prếk On Đớk (paha Cần Đước) xã Thạnh Phú, huyện Mỹ Xuyên brei thau: Mikva Khmer kol dahlak hulin tuk halei jeng jia tame saong caong tame bruk pan akaok di Đảng, Kanja hu caik hatai sangka, oh lac taeng ka urang Khmer kol dahlak bo abih tih dom bangsa dalam tỉnh.

Sóc Trăng lac tinh ngak nong, raidiuk di rahra, abih di nyu lac urang nong puk palei, bhum tapen tasik, bhum bangsa takik daok gaok rilo kan kandah. Dom pakat uỷ đảng, kanja palei tuk halei jeng kham marat piah pataom prein tame cak rok patagok kinh tế - xã hội, abih di nyu nan lac bruk peih ngak dom sarak an sinh xã hội, paglaong raidiuk, mbang ngui di rahra.

Pagap yau meng thun 2019 tal thun 2022, Sóc Trăng hu peih ngak dua mbang jak ba daong sang danaok ka sang sarak kanja, urang hu buh prein ka CM, sang kathaot, sang kan kandah ka sang danaok di dalam tinh ngan haong 5.200 baoh sang hu padang ngak, daong ka mikva hu tani tanat labik daok, tani tanat bruk ngak mbang. Bahrau ini, urang pan akaok Mintri Công an hu jak ba saong daong pabak ka Sóc Trăng 1.200 baoh sang. Ong Lý Rotha, akaok Mban bangsa tỉnh Sóc Trăng brei thau:“Raidiuk, bruk ngak mbang ngak huak di mikva, abih di nyu nan lac mikva bangsa Khmer daok hu hadah hadai tagok. Abih di nyu nan lac dalam tukvak bahrau ini, rajaei hu patabiak dom sarak, jalan ngak bahrau, nan lac danak dak bruk ngak negar cak rok patagok kinh tế - xã hội bhum bangsa takik saong tinh daok ba tabiak ngak. Dom jak jeng camriep jeng mboh chreih chrai, mikva biak uan tabuan.

Anak tal, tinh daok peih ngak hu siam dom danak dak saong sarak bangsa di tỉnh, abih di nyu nan lac peih ngak danak dak bruk ngak negar ka cak rok patagok kinh tế-xã hội bhum bangsa takik; Patagok labik dang, bruk ngak di urang hu angan je dalam bhap bini bangsa takik; peih ngak siam bruk khik ramik, pok mayaom saong patagok dom yaom glaong ilamo, sap ndem panuac puac, akhar vak, adat cambat tanarakun siam mekre meng kan mai di bhap bini bangsa takik.. piah pamaong tal bruk paglaong siam mekre raidiuk di mikva bangsa Khmer daok di dalam tỉnh./.