Danak dak ngak pasiam, peih praong jalan Roya 14 labik nao tapa Đồng Xoài - Chơn Thành, tỉnh Bình Phước atah labaih 24km, praong 46m hu 6 jalan radaih praong, 2 jalan radaih sit saong takai jalan. Danak dak hu jien buh tame ngak abih tih jaik 1.450 tỷ đồng meng kadung jien kanja. Tukvak peih ngak danak dak meng thun 2022- 2025.

Thun 2022, UBND tỉnh Bình Phước hu Sarak brei tapa harak pathau khan, duah thau bruk meda padang ngak hu danak dak pasiam veik, peih praong Jalan roya 14 labik nao tapa Đồng Xoài-Chơn Thành. Min kayua tavak Hukum Kadung jien kanja, Hukum jalan mbak nao mai saong Hukum khik ramik drap ar kanja nan ye ka oh pilih ruah hu jalan to yaom piah padang ngak.

Kayua yau nan ye, ngan haong Sarak ngak iek dom sarak karei ka bruk buh jien tame padang ngak dak dak jalan mbak, dalam nan hu Danak dak ngak pasiam veik, peih praong jalan Roya 14 labik nao tapa Đồng Xoài - Chơn Thành lac sa dalam 6 danak dak hu brei adat ka palei ngak jabat khik ramik, taoh talaih dom cuang kandah piah ka bhum palei samar drah padang ngak danak dak.

Ong Bùi Ngọc Tiếp, Phaok Jabat hạ tầng jalan mbak Sở Jalan mbak pajeng ba tỉnh Bình Phước brei thau, bruk rami ramik lagaih kadung jien kanja bhum palei piah peih bruk buh jien tame ka danak dak, samar drah ba danak dak hu ngak salah di thun 2025 meda rik tame bruk patagok kinh te di palei:

“Danak dak samar hu ngak salah meda daong ka tỉnh Bình Phước pasiam jalan mbak nao mai dom bhum. Jalan Roya 14 jeng lac sa jalan praong piah pajeng ba pandap panda meng dom tinh, ban bhum Tây Nguyên mai bhum Đông Nam bộ, bhum Tây Nam bộ. Kayua yau nan ye, tuk ngak salah Jalan Roya 14 labik nao tapa Đồng Xoài - Chơn Thành tui njauk bruk ba tabiak di palei, meda ngak jeng jalan pajeng ba bahrau trun manieng bruk gar jalan di dom tuk tabung glaong.”

Langiu di nan, di dom tinh, ban dalam bhum Đông Nam bộ, jeng meda hu dom danak dak karei hu mbang tui Sarak ini, yau ye Danak dak jalan nduac samar TP.HCM - Thủ Dầu Một - Chơn Thành labik nao tapa tỉnh Bình Phước; Danak dak padang ngak jalan nduac samar Biên Hòa - Vũng Tàu vaktu ka 1; Danak dak padang ngak jalan nduac samar Tân Phú (tỉnh Đồng Nai) - Bảo Lộc (tỉnh Lâm Đồng) tui jalan pambuak gauk công tư; Danak dak padang ngak jalan nduac samar Dầu Giây - Tân Phú (vaktu ka 1) tui jalan ngak PPP; Danak dak padang ngak jalan nduac samar Ban raya Hồ Chí Minh - Mộc Bài…

Tui PGS - TS Chu Công Minh, Đại học Bách khoa TP.HCM, Sarak ngak iek dom sarak karei ka bruk buh jien tame padang ngak danak dak jalan mbak tabiak rai tuk ini lac sa bruk ngak hu makna praong dalam bruk padang ngak danak dak jalan mbak nao mai: “PPP lac gah jak ba phun jien siam lagaih abih langiu di bruk buh jien tame di kanja. Kol drei thau lac phun jien di kadung jien karja oh rilo, dalam tuk dom danak dak jalan mbak, pajeng ba lac praong, biak praong. Kayua yau nan ye, bruk padang ngak dom sarak habar ka PPP hu siam lagaih lac bruk hu makna biak praong, dak aval dak siam ka dom danak dak jalan mbak nao mai, bo dak cang, caik suai veik ye phun jien tagok biak rilo”.

Daok TS Nguyễn Hữu Nguyên, Kapul Quy hoạch cak rok patagok đô thị Việt Nam ndom lac, bruk Sarak ngak iek dom sarak karei ka bruk buh jien tame padang ngak jalan mbak nao mai hu ba tame pandar chip brei mboh bruk khang hatai di Quốc hội dalam kham marat jhul samar padang ngak dom danak dak jalan mbak nao mai dalam taneh ia.

Urak ini, taneh ia daok dalam vaktu chreih chrai ka bruk cak rok patagok jalan mbak nao mai di grauk labik dalam bhum. Kayua yau nan ye, hu veik sa jalan ngak karei piah taoh talaih dom cuang kandah ka jalan mbak, abih di nyu nan lac phun jien./.