Harei ini, amuk Nguyễn Thị Hải daok di palei Phước Thiện, xa Phước Hậu, (dahlau daih lac xa Phước Hậu, ban sit Phước Dân, tinh Ninh Thuan klak) mai Pasak Duh bruk karja xa Phước Hậu ngak harak gar salih bruk pandar taneh. Meng hu urang jakar abih tung tian daong mek lek taka danak, tacei ba pabak dom baoh kadha nan bruk tut angan saong langyah harak gar hu ngak salah blaoh drah samar.

"Meng dahlau daih tame huyen, urak ini mai xa bahrau ngak di xa, dahlak hulin biak njauk hatai. Adei sa-ai urang jakar tacei ba dahlak hulin ngak mboh biak njauk hatai".

Di xa Phước Hậu, (dahlau daih ieu lac xa Phước Vinh, Phước Sơn, Phước Hậu, ban sit Phước Dân, tinh Ninh Thuan klak), Pasak Duh bruk karja tuk halei jeng caga urang jakar raong saong tacei ba rahra mai njauk gah piah hu langyah harak gar karja. Yaok harei, Pasak Duh bruk karja xa Phước Hậu raok yaok rituh urang mai langyah dom harak gar karja. Piah khik kajap langyah harak gar karja ka rahra biak samar abih, xa Phước Hậu hu caga urang jakar tui labik ngak bruk bahrau, khik kajap hu ngak bruk lagaih, oh klaih klaoh dalam bruk taduan raok tuai saong langyah harak gar karja. Njauk ndom mayai lac, bruk pandar phan mem E-Office dalam bruk ngak saong langyah bruk ngak hu daong ka bruk langyah saong khik piah harak gar online hu samu gauk, patakik abih bruk ngak suai, ngak lahik harak gar. Ong Đàng Năng Tom, Akaok UB Bhap bini xa Phước Hậu lac:

"Bruk akaok meti ieu lac brei pataom tame bruk langyah harak gar ka rahra hu pambuak tal harak gar kkarrja. Page ini, khol dahlak hulin pato tacei pasang iek tapak dom ndap nda kaya, urang menuac. Njauk ndom mayai lac, pataom tame pandar jamraik kong nghe khau tin, salih lek taka so duh ka hatai caong di rahra. Tapa bruk langyah harak gar klak di dom xa klak saong huyen mai. Gam saong di nan, ngak harak gar karja bahrau bo rahra ba mai ngak di Pasak Duh bruk karja di xa”.

Tui sarak, meng harei 1/7, 14 harak gar pambuak tal taneh riya hu rabha pakat, rabha bruk pandar ka xa, phuong. Njauk caik hatai sangka lac, akaok UB Bhap bini dom xa, phuong brei tapak mbaoh tangin pabak harak bhong akaok meti ka rahra. Tukvak langyah jeng hu dui katut daok 3 harei ngak bruk ngan haong bruk pabak Harak mbaoh tangin brei bruk pandar taneh akaok meti.

Bahrau ba tame ngak bruk meng harei 1/7 blaoh rilo harak gar di angaok jitvu karja oh ka tani tanat, lagaih. Kayua yau nan, jalan langyah hu pambuak di bruk langyah online saong ngak tapak anak daok hu Pasak Duh bruk karja xa Thuận Nam pandar piah oh ngak kan kandah tal bruk langyah harak gar karja ka rahra. Ong Nguyễn Thái Cường, Phaok Yam ndok Pasak Duh bruk karja xa Thuận Nam hu brei thau lac: "Langyah dom harak gar daok kandaong di xa klak, gam saong langyah harak gar karja bahrau tui jalan ngak bahrau di tinh Khanh Hoa. Pasak Duh bruk karja kham merat langyah mek hu jak jeng ka rahra hu siam lagaih tui adat, duh njauk hatai saong ngak ka rahra”.

Ong Trịnh Minh Hoàng, Phaok Akaok UB Bhap bini tinh Khanh Hoa brei thau: Oh luai ka hagait ngak kan kandah tal bruk langyah harak gar karja ka rahra. Ini lac bruk blaoh taong abih dom bhum palei dalam tinh pandar urang jakar, urang pan bruk njauk brei ngak tui.

"Kadha langyah harak gar karja di dom bhum palei urak ini, tapa bruk pasang iek tapak anak ye bruk taduan, jeng yau langyah harak gar karja biak siam lagaih. Min, ini lac tukvak katut, dom bhum palei jeng daok rilo tavak tavaiy, kan kandah. Abih di nyu nan lac bruk langyah kong nghe khau tin urak ini jeng saong dom kan kandah dalam bruk peih ngak, rilo meng lac dom bruk tacei ba, rabha pakat ka bhum palei jeng daok oh ka tani tanat. Tinh patui bruk pato tacei haong dom so, dom gah patui tacei ba piah ngak yau habar bruk karja di pakat xa ngak bruk lagaih saong langyah harak gar karja ka rahra di bhum palei siam jang”.

Ngak bruk karja palei 2 pakat oh lac bruk salih ka jabat karja blaoh daok lac bruk salih ba karja mai jaik haong rahra jang, duh Rahra siam jang. Tapa di nan, peih tabiak prein ngak bahrau piah dom bhum palei dalam tinh patagok samar, khang saong karo kajap jang dalam tukvak meng anak patui./.