Dom thun tapa, bruk khan biai dakvah, pato pakai hukum nagar ka mikva urang Cam Tuy Tinh 2, xa Tuy Phong, tinh Lam Ndong mek hu rilo baoh jak jeng siam mekre, taphia dom bruk pathau khan angaok dom jalan ngak thong tin bhap bani nan jeng njauk khan tal bruk rik daong oh sit di Gru harei Đoàn Minh Duyên.

Tui jalan ndom biak gheih ghang di sa po gru, yau nan ye dom bruk kan langyah di palei Cam di ini, tuk hu sap ndom gheih ghang hu ngaok hu ala di Po Gru harei Duyên ye taong abih bruk hu langyah siam gheih. Po Gru harei gam saong dom urang daok dalam palei hu nao trun tal dom baoh sang, atau pataom mikva veik di Sang Ilamo palei piah pathau khan adat hukum tal mikva.

Sa-ai Mai Văn Bình, Po palei Tuy Tinh 2, xa Tuy Phong, tinh Lam Ndong brei thau, tuk mikva hu taong paoh gauk mesrao malah gauk ka bruk hala paga atau mikva oh njauk hatai haong gauk ka sa bruk hagait nan ye jeng duah tal ong piah langyah pambuak pagam hatung hatai di puk paga palei pala.

“Dalam palei tuk hu rah tabiak bruk srau dhau hagait caong khin hu mbang langyah atau bruk ngak jak ba gul pataom hagait, puk palei payua harak ba-ar daa, ong Duyên jeng ba abih hatai jai mai njauk tukvak, piah pambuak bruk haong ban đieu haanh palei, ginum biai nao mai dahlau piah tuk tame bruk ka nyu siam gheih jang, mbuan laghaih jang. Ong jeng brei panuac rik daong ka mikva dalam palei, sap ndom di ong mboh hu siam laghaih jang.”

Ieu lac sa urang hu angan je, rup ong oh sa janih ngak siam bruk jak ba dom baoh sang, talei paga but pajaih, mikva dalam palei gul pataom sa hatung hatai saong gauk jia tui jalan ba di Ndang, sarak hukum di Karja blaoh daok khan brei thau, rik daong panuac ndom mayai di drei brei ka karja palei dom bruk pandiak bo ong thau ong mboh jeng di puk palei. Tui di nan hu daong ka pakat uy, karja puk palei samar hu jalan lang yah, pacang caga, brei mek hu baoh jeng siam mekre, pagap yau ye: bruk masao malah dalam palei, dom bruk pathau khan chung adat hukum, neh rabha bruk gul pataom taong abih bangsa…

Tinh Binh Thuan dahlau diah hu labaih 80 urang hu angan naih gheih brei vakil lambaok ka labaih 100.000 bhap bani bangsa takik dalam 35 bangsa adei sa-ai dalam tinh. Mai meng angan je di drei, meng bruk abih hatai saong ba akaok nao dahlau, dom urang nan blaoh saong daok rik daong dak padang puk palei dak harei dak patagok, siam gheih, khik ramik hu yaom ilamo meng kan saong paglaong rai diuk ka bhap bani dom bangsa takik. Saong lac Po Gru harei Đoàn Minh Duyên nan lac sa dalam dom urang nan. 

Dom thun tapa, Po Gru harei Đoàn Minh Duyên hu jeng labik pambak biak grap tanat di pakat uy Ndang, Karja dalam bruk jak ba bhap bani padang ngak palei pala bahrau di palei Cam Tuy Tinh 2 hijao – hacih sa-at – gheih ghang karo.

Patagok bruk ngak di drei, bruk ngak di sa urang Po Gru harei, taphia di nan lac Urang hu angan je dalam palei, Po Gru harei Đoàn Minh Duyên tuk halei jeng gheih ghang dalam bruk ndom puac saong ba akaok nao dahlau dalam dom bruk ngak piah ka urang dalam sang, but pajaih, bhap bani mblah ngak tui.  

“Rup dahlak nan ieu lac sa urang halau janeng, langiu di nan jeng lac Urang hu angan je di puk palei, ye bruk ngak di dahlak nan lac pathau khan ka mikva piah grap tanat bruk ngak mbang kinh te xa hoi. Panuac ndom di drei hu mikva pachreih tui.”

Po Gru harei Đoàn Minh Duyên brei thau, tuk Karja hu jalan ba ngak jalan nduac drah, ye mikva di ini hu dom baoh sang mboh daok saneng kuhria, huac kanda kayua lac jalan nduac drah ini nao cagar tapa mblang taneh di drei, nan ye tuk akaok mereip oh ba rup tame pambuak bruk, min tal tuk Po Gru harei abih hatai pathau khan dom jalan ba di Ndang, sarak hukum di Karja ye mikva pang tui, blaoh taduan mek jien ba-yar saong jao veik taneh ka Karja ngak jalan.

Urak ini bhap bani Lam Ndong daok chreih chai mong akaok Karja piah ngak danak dak jalan pasei jalan radaih apui nduac samar drah trục Barak – Meraong. Tuk danak dak ngak salah blaoh ye meda ngak jeng bruk praong tatuak drei dalam bruk nao mai, pakatut jang tukvak nao mai di dom bhum palei. Yau nan min, piah ka du an tamat samar drah yau kuhria dahlau ye biak caong khin hu bruk njauk hatai di meng dom baoh sang hu du an nao tapa, dalam nan hu mikva urang Cam di xa Tuy Phong. Saong tuk nan, bruk ngak di Po Gru harei Đoàn Minh Duyên meda patui veik patagok gam haong dom mban, nganh, kapul nyaom piah jak gauk dakvah pathau khan, jak ba dalam bhap bani./.