Ini lac mbang pataom mbaok tui bilan di Kalup kapul “Raong pato anek siam” di dhar kapul urang kamei palei 1, xã Đưng K’Nớ, huyện Lạc Dương, tỉnh Lâm Đồng. Hu padang tabiak meng bilan 8/2012 haong 10 urang, tal tuk ini hu 61 urang. Sa-ai Bon Niêng K’Pớt, Akaok Kalup kapul brei thau, dahlau daih adei sa-ai kamei palei 1 hu hatai sahneng daok biar ba tui bruk raong pato anek, padang baoh sang oh ka hu ilamo, meng tuk hu Kalup kapul tal tuk ini, adei sa-ai kamei dak harei dak paglaong ilamo, sangka raong pato dom anek hu ginup jang:

 “Meng di tuk padang Kalup kapul tal tuk ini ye adei sa-ai kamei thau hu bruk di urang kamei dalam raidiuk kinh tế xã hội saong baoh sang. Bruk menek anek ka 3 trun hu biak rilo. Dahlau daih labaih 50%, daok urak ini daok 10% min. Bruk lavang lavaih jeng trun hu rilo, dahlau tuk oh ka hu kalup kapul bruk lavang lavaih labaih 45%. Urang dalam Kalup kapul thei jang hu anek thau pang thau puac, bac naih joi, bruk klaak bac meteh dhi jeng hu trun biak rilo.”

Meng rilo jalan ngak yau: Ndom biai nao mai, sua tangi javap jaloi, phat harak bi-ar, pathau khan meng pabah, bruk me-in paik bingu dân chủ…saong pablak tame rilo asal kadha pathau khan, Kalup kapul hu tacei pato dom urang dalam kalup kapul thau ka Hukum Lakhah caga - baoh sang, menek anek tui sarak karja, bruk mbang huak njauk ka urang kumei metian, bruk raong pato anek hu ilamo, tahanek dom var mbang siam saong hu dom jalan caga ruak piah anek praong tagok khang kadang… Sa-ai Rơ ông K'Yồng, urang dalam kalup kapul ini brei thau:

“Dahlau daih tuk oh ka tame Kalup kapul ye tok mbang njam saong lasei min, urak ini thau tahanek lisei ka anek, hu baoh menuk baoh ada, hu ralow ye drei tahanek ka anek mbang hu siam jang"

Tapa dom mbang pataom mbaok, rilo adei sa-ai kamei khang hatai jang, eng nao duah thau dom ilamo ka bruk raong pato anek, sangka baoh sang, tapa nan pandar tame raidiuk. Meng nan bo sang dom uảng dalam kalup kapul hu trei sir, haniem phol. Sa-ai Bon Niêng Kđơng, hu labaih 1 thun hu mbaok dalam Kalup kapul khan lac:

“Langiu di ilamu ilamo raong pato anek, Kalup kapul daok pabak ilamo gah prein yava menek, ngak amaik salamat saong pato tacei pandar dom jalan plaih metian lagaih. Hu dom adei sa-ai kamei brei thau ka bruk raong pato anek dalam sang, meng nan caik hatai tui pang saong pachreih ba anek piah daong ka anek yam tapa dom kan landah.”

Ong Bon Niêng Ha Krai, Phaok Akaok UBND xã Đưng K’Nớ brei thau, palei 1 urak ini hu 207 sang rahra, hu 859 urang, dalam nan labaih 90% lac rahra bangsa takik. Meng tuk Kalup kapul peih tabiak, hu daong ngak brei salih jalan sahneng di mikva. Meng nan, labaih 10 thun tapa, palei 1 oh daok uranaih lavang lavaih, oh hu anek saih klaak bac; 5 thun jaik ini oh hu bruk khin gauk tuk oh ka ginup thun umo, oh daok brik khin gauk dalam but pajaih, taong abih uranaih dalam thun umo jeng hu nao bac, abih tih sang mek hu angan sang hu ilamo.

 “Dalam tukvak tapa Kalup kapul ini hu rilo jak jeng, abih di nyu lac dalam bruk pato anek siam, oh rahtabiak bruk taong paoh dalam sang,oh hu  bruk jhak dalam rahra. Pakat angaok jeng hu rilo harak meyaom Kalup kapul ini. Anak tal, tui bruk patagok di Kalup kapul ini ye peih praong tabiak dom palei, maong ini lac labik piah, pambak tabiak dom palei.”

Kalup kapul “raong pato anek siam” di palei 1, xã Đưng K’Nớ hu paglaong siam lagaih haong rilo bruk ngak siam lagaih saong jeng talei pambuak daong ka adei sa-ai kamei ndom biai sua tangi gauk, bac hu dom ilamo siam, kein laba ka bruk raong pato anek, jeng yau jalan ndom puac daok dang dalam sang saong puk palei, daong padang puk palei hu siam mekre, ginup meda jang, sang dom urang kamei dalam kalup kapul hu trei sir, haniem phol./.