Rilo labik brei pandap dong ka rilo urang ruak dalam tuk jit prong 

Meng bhum taneh Tây Bắc atah bayah, urang kamei bác sĩ Nguyễn Thị Huế, Khoa Nhi, Pasak Y tế huyện Tân Uyên, Lai Châu, hu tame TPHCM piah ngak bruk taong ruak ka urang njauk Covid-19 di Sang iek ruak Dã chiến ka 6. Harei harei, bác sĩ Huế pasang iek ruak, iek glang urang ruak meng bruk mbang munyum, ndih daok, aih ma-iuk, tal bruk taong ruak, brei jru menyum, klauk jru, pachreih ba urang ruak... Bác sĩ Huế khan lac. “Dom harei akaok mereip, urang ruak rilo nan ye dom gah di sang iek ruak jeng tapa prein ngak bruk. Hu tuk, meteh melam urang ruak trak tagok, glaih glar kan suak yava, tagok darah, khaol dahlak njauk langyah, ba urang ruak trun duk cấp cứu. Kayua panuac ndom di bhum palei nyu karei hasit nan ye dahlak gaok kan kandah tuk ndom biai nao mai dalam dom harei akaok mereip. Gam haong nan lac labik karei, pandap mbang menyum jeng karei. Hadei di sa tukvak, lavik lavik nao jeng mboh randap, urang tanek lisei ngak mbang huak jeng ramik ngak veik dom pandap mbang nan ye jeng trun meneng kan kandah.”

Labaih 1 bilan tame TPHCM jeng lac tukvak urang kamei bác sĩ umo 29 thun ini atah anek sit umo 3 thun. Tuk anek ruak, anek hia, urang amaik ranaih gilac mboh hadar sang. Sa-ai khan lac: “Dalam kapul urang tame ngak bruk di TPHCM, hu rilo urang hu anek sit. Yam tapa taong abih, khaol dahlak pachreih gauk kham merat ngak bruk. Di sang iek ruak jeng hu dom uranaih ruak, mong mboh dom uranaih hu umo thun samu haong anek drei mboh biak ranam”.

Ngan haong urang kamei điều dưỡng Lê Thị Hồng Gấm, Sang iek ruak Da liễu Trung ương, yaom lac bruk iek glang urang ruak di Sang iek ruak Dã chiến ka 11 biak glaih glar min tuk taduan mek hu harak thư thau dhal phol di urang ruak vak angaok ba-ar caik pandap mbang blaoh thaot veik ndua dhal phol dom gru jru, sa-ai mboh biak drut droi saong mboh lac njauk kak kajap jang haong bruk ngak. Dom hatung hatai nan, hu sa-ai khik veik saong khan brei gauk gar thau piah pachreih manuac urang dalam sang di drei. “Khaol dahlak nao tame ini ngan haong hatai ba akaok nao dahlau. Dahlak hu dua urang anek sit min kayua TPHCM anit ranam nan ye dahlak likau urang dalam sang di drei brei nao tame piah hu mbaok ngak bruk pacang caga jit. Dahlak mboh khang hatai jang tuk hu bruk pachreih tui di manuac urang dalam sang di drei” – Urang điều dưỡng Lê Thị Hồng Gấm brei thau yau nan.

Sa-ai khan lac: “Tuk nao ngak bruk, brei cuk pandap bảo hộ pacang sir abih rup luac 6 tuk nan ye mboh biak glaih glar, hu tuk ia hauk tabiak bak rup. Khan ao bảo hộ jeng ngak kan kandah jang tuk ngak bruk. Min taong abih thei jeng kham merat ngak siam bruk ngak di drei. Tuk taom gaok urang ruak jeng oh plaih hu dom bala. Tuk mehit urang jaka  y tế njaom mbak ruak, khaol dahlak pachreih ba gauk kham merat juai brei ka nyu njaom mbak, yam tapa dom kan kandah, pataom tame ngak siam bruk  iek glang urang ruak”.  

Hu mbaok tame iek glang urang ruak di Khoa Pasiam veik pren yava, Sang iek ruak Dã chiến ka 10, điều dưỡng Nguyễn Thị Hạnh, Sang iek ruak Đa khoa Yên Thế (tỉnh Bắc Giang) brei thau, sa-ai tame TPHCM ngak bruk hu labaih 1 bilan. “Khaol dahlak mboh biak bui sambai tuk hu daong ka ban raya. Meng akaok bilan 10 mboh urang ruak trak takik jang, ban raya dak harei dak yam tapa jit prong, dahlak mboh biak uan tabuan”- sa-ai Hạnh khan lac yau nan.

Sa-ai hadar gilac, harei tabung glaong urang nao tame sang iek ruak biak rilo, bruk ngak biak glaih glar, min meng hatai ranam bruk ngak sa-ai haong ayut sahabat kham merat mong iek, taong ruak ka urang ruak. “Tuk nao tame sang iek ruak, urang njauk Covid-19 oh hu anek bhik, oh hu gauk gar daok jaik taphia piah iek glang nan ye mboh biak metui. Hu dom urang ruak, tuk akaok mereip oh pang tui hagait, tok ndok nao sang. Tuk nan, urang jakar y tế njauk salih mbaok jeng urang dalam sang piah pachreih ba, ndom glai nao mai haong urang ruak piah ka urang ruak daok veik dalam sang iek ruak taong ruak” – sa-ai Hạnh khan yau nan.

Dalam dom kapul nyaom hu mbaok tame daong ka TPHCM pacang jit hu dom urang bac di Học viện Quân y umo daok ranaih. Adei Lưu Quang Trung brei thau: “Dahlak daok bac thun ka 4 di Học viện Quân y. Tuk thau ka jit ruak di TP.HCM tagok glaong, dahlak vak harak likau tame ini ngan haong hatai kham merat biak glaong, abih drei daong ka rahra. Ini jeng lac mbang akaok meti dahlak hu mbaok tame bruk pacang caga jit ruak saong jeng lac mbang akaok meti nao tame TPHCM. Sang dahlak tuk halei jeng duh hatai, hadei di nan meng thau cambaih saong pachreih dahlak. Nao tame ini dahlak mboh bhap bani pak ini biak anit ranam, abih drei daong ka kol dahlak ngak siam bruk ngak di drei”.

Tuk tame TPHCM, sa-ai Trung hu mbaok tame ngak bruk di sa balai y tế lưu động di Phường 26 quận Bình Thạnh. Yaok harei, sa-ai hu mbaok tame ngak xét nghiệm ka bhap bani, daong bruk klauk jru vaccine ka urang ruak. Tuk bahrau tame ngak bruk, gaok harei mai dom urang ngak dalam balai y tế njauk nao xét nghiệm ka bhap bani meng page tal biar harei sup. Tuk daok ngak di balai, dom adei sa-ai ngak bruk luac harei melam. “Tuk urang ruak mboh glaih glar khaol dahlak njauk pathau khan ka urang ruak thau jalan iek ruak. Gaok tuk mai, mon 2 – mon 3 dah page jeng bak bình oxy nao daong urang ruak. Bruk ngak  glaih glar, abih di nyu lac tukvak akaok mereip min mnoh hu bruk bui sambai di urang ruak tuk hu urang jakar di balai y tế ba jru mai atau mboh dut iek âm tính, dahlak mboh bui sambai paje. Dalam tuk taom gaok, daong ka bhap bani, dahlak jeng bac megru hu ilamu ndom biai nao mai” – sa-ai Trung brei thau yau nan.  

Hadei di dom harei bilan cuang kandah, TPHCM dak harei dak pasang iek hu jit ruak, dom manuac tame sang iek ruak, urang njauk ruak trak saong urang metai jeng trun daok takik. Di van pok meyaom dom kapul njaom hu mbaok tame bruk daong pacang cakak jit Covid-19 di ban raya bahrau rah tabiak, khaol dahlak mboh hu dom bui sambai tapa mbaok meta, tapa dom dalikan ndom ka dom kapul nyaom mai TPHCM daong ngak. Nan lac kadha bui sambai tuk mboh hu dom jak jeng bo ban raya mek hu dalam bruk pacang caga jit ruak, dalam nan hu bruk rik daong biak prong di dom kapul nyaom. Saong dom bui sambai tuk hu bruk sangka, anit ranam di Đảng bộ, karja  saong bhap bani ban raya HCM./.

Urang lang: Jasi-27/2