"Tukvak tapa, adei hu sa baoh sang tra tuk hu amaik ame saong dom adei saai sangka tal, bhian sua tangi bruk bac taa, mbang huak, ndik daok” -  nan lac panuac khan di Marivong Nando, umo 22 thun, sinh viên sang bac Đại học Nguyễn Tất Thành (quận 4) tuk hu mbaok tame danak dak “Bao sang Việt haong sinh viên Lào, Campuchia daok bac taa di TP.HCM”. Hatung hatian di amaik ame raong, di mikva puk palei saong dom urang daok jaik taphia nyu ngak ka Nando dak harei dak mboh anit ranam taneh ia, anek manuac Việt Nam saong caong khin kak kajap miat haong labik ini: “Amaik Hằng ndem lac meda raong adei tal tuk halei bac tamat. Dhal phol ini adei jeng oh thau ndem hagait veik, biak drut druai! Sang amaik jaik sang bac, nan ye jala pandiak atau bier harei, adei vaih tame huak lisei haong amaik, harei adit ye hu mbaok tame puh ramik ngak hacih saat saong rilo bruk ngak ilamo karei pak di khu phố. Adei hu duah thau ka ilamo, raidiuk di urang Việt. Amaik ame anit ranam, dom cei nai daok dalam palei jeng anit ranam adei, maong adei yau anek kamuan dalam sang”.

Taduan raong sinh viên Lào, Campuchia meng thun 2022 tal urak ini, amuk Phạm Thị Bích Ly, daok di quận 5, mboh hu bruk pambuak gauk, anit ranam gauk, biak jaik taphia haong gauk tuk ngak amaik di dom urang anek “dunya”. Bruk krah raba, daong ka dom anek dalam bruk bac taa saong dom bruk ngak di langiu jeng hu ba mai ka abih menuac dalam sang amuk dom bruk biak bui sambai: “Drei daong dom anek dalam bruk ndem mayai nao mai haong ayut saabat. Dalam raidiuk hu tuk gaok ayut oh siam ye drei tacei pato ka anek drei mboh. Kayua dom anek lac sinh viên dunya nan ye meda oh thau cambaih,, oh thau hu dom bala dalam xã hội di pak ini. Drei maong dom anek dreih yau anek pajeng di drei, ngak habar piah daong ka anek drei jeng rahra siam, tuk mai veik palei negar patui veik bac taa saong ngak bruk siam”.

Hadei di tukvak klaih klaoh kayua jit ruak, thun 2022 danak dak hu peih ngak gilac veik. Ủy ban MT negar TP.HCM pambuak haong Thành Đoàn, Kapul urang kumei saong dom kapul nyaom di ban raya peih ngak rilo bruk  biak chreih chrai, yau ye bruk pataom mbaok raok Xuân; yaih khan ilamo, adat cambat tanarakun di dua taneh ia; harei pataom aw kamei alin hadiah 30 blah aw kamei ka urang kumei sinh viên Lào, Campuchia. Gam haong nan lac Harei pataom “Baoh sang Việt Nam - Lào - Campuchia” haong dom bruk pakacah klauk bingu, cih thaot, nặn tò he, daoh tamia, jalan mai veik halau gah di labik mesuh meng kan glai Rừng Sác - Cần Giờ, labik inem mek sajarah Địa đạo Củ Chi saong Labik daok ngak bruk di cách mạng Sài Gòn - Gia Định.

Sinh viên Lào, Campuchia daok hu nao rivang iek bruk ngak nong pandar công nghệ glaong, duah thau bruk dreih yau gauk di bruk ngak nong, urang nong, puk palei di 3 taneh ia Việt Nam, Lào saong Campuchia. Abih di nyu nan lac, Ủy ban Mặt trận negar Ban raya hu peih bruk ba 9 sang urang Việt tapa Lào, rivang sang di 3 sinh viên Lào daok tui bac di TP.HCM.   

Tui ong Ngô Thanh Sơn, Phó akaok Ủy ban MT negar TP.HCM, jak jeng praong abih lac hu daong ka sinh viên dunya hu mbuan lagaih piah bac taa siam abih di Ban raya. Thun ini dom urang hu mbaok tame danak dak tagok rilo jang tal dua mbang, hu 67 baoh sang saong 102 sinh viên, nan ye brei hu bruk parabha bruk ngak cambaih laih piah ba  mai siam lagaih glaong abih: “Mban Thường trực MT negar meda daa dom baoh sang di Lào, Campuchia hu anek daok bac di TP.HCM tapa ini, taom gaok sang gah ini saong maong iek tapak anek bhik di drei  daok  bac megru di Ban raya yau habar. Nan lac bruk pachreih ba dom adei bac taa, mek hu siam lagaih jang. Urak ini daok peih ngak, tui kuhria lac bilan 11 kol dahlak meda ba tapa”.

 “Daok atah sang, oh hu amaik ame daok jaik taphia, min meng di tuk mai tal Việt Nam ka oh tuk halei mboh daok sa drei meng hu bruk anit ranam, sangka abih drei di baoh sang Việt” – rilo sinh viên Lào, Campuchia daok bac di TP.HCM drut druai khan lac yau nan. Jalan pambuak gauk hu makna biak praong di dom baoh sang Việt saong sinh viên Lào, Campuchia daok daong pabak tame, kak kajap talei jumpataom gauk meng kan mai, talei rohim siam makre di klau taneh ia adei saai./.