Dự thảo ini di Mintri Lao động thương binh saong xã hội daok hu ba tabiak mek  panuac meng kreih bilan 3 saong tuk hu sua tangi ye jaik abih sinh viên daok ngak them jeng brei thau lac, jhui ba tabiak adat biak catang yau nan. Tui sinh viên, anak mata bruk ngak them urak ini bhian rilo maong jang dom maong dalam dự thảo min ngak hu. Ngak them hu daong ka sinh vien hu jien mbang cai pandar bo daok hu daong ka rilo urang peih praong ilamo jang, gaok mai duah hu bruk ngak lagaih hadei di tuk bac tamat blaoh.

Lê Thị Hồng Phấn urak ini lac sinh vien thun ka 4 Sang bac Đại học Kinh tế TP.HCM saong daok gam bac gam ngak bruk khik ramik sa cua hang pablei khan ao pandap ngui cuk. Hồng Phấn brei thau, bac Quản trị kinh doanh nan ye ngak them bruk ini daong ka Phấn hu thau cambaih jang ka jalan bo sa doanh nghiep ngak bruk, pataom ilamo saong kỹ năng. Tui Phấn, bruk khik ramik tukvak piah nao bac saong nao ngak lac biak kan min jeng ngak hu: “Cửa hàng jeng daong palagaih di abih ka sinh vien nao ngak nan ye drei meda kuhri kuhria hu tukvak nao bac nao ngak. Ngan haong drei, bruk nao ngak oh ngak kan kandah rilo tal bruk bac taa pak sang bac. Mayah pasang iek, patakik maong ngak bruk di sinh vien ye ngan haong dom urang nao ngak  piah duah jien, daong kak jien bac ye kan kandah tal jien padai di dom ayut saabat nan biak rilo.”

Jeng nao ngak them, Nguyễn Huỳnh Mẫn, sinh viên thun ka 4 sang bac Đại học Khoa học Tự nhiên - Đại học Quốc gia TP.HCM daok ngak tal 8 maong sa harei ka sa Cty ngak gah daong cak rok patagok phần mềm. Ngak bruk ini abih rilo tukvak, glaih glar saong rami ramik bruk bac kan jang min tapa nan, Mẫn hu jien mek tame rilo, ngak njauk haong bruk daok bac, hu thau ka bruk ngak jabat saong hu taom gaok dom urang ngak haong gauk. Tui Mẫn, bruk patakik maong ngak bruk meda daong ka sinh vien rami ramik mong bac saong maong ngak, oh ngak rilo min meng nan lac lahik nao bruk lagaih hu ngak njauk bruk bo drei bac ngan haong jien mek tame biak glaong: “Jalan ba tabiak ngak ini tui drei lac biak kateik greik lo. Kayua drei umo labaih 18 thun paje, drei hu pilih ruah ka raidiuk di drei. Tui drei, jalan ngak ini piah khik ka prein yava di sinh viên- dom ayut saabat ngak rilo yau drei min jeng lahik nao quyen pilih ruah ka raidiuk di drei.”

Anak mata mboh lac, tui jalan ngak ini, anek saih, sinh viên ginup umo thun ngak bruk meda ngak them oh tapa 20 maong sa adit dalam kỳ học saong oh tapa 48 maong sa adit dalam mbang padeiih, lac daok palagaih ka anek saih, sinh viên ngak them, gam khik kajap prein yava, tukvak bac ka dom adei, min mayah jeng adat brei pandar chip meda lac oh ngak hu. Langiu di nan, ba bruk khik ramik bruk ngak them di anek saih, sinh viên di labik pato magru, jeng kan piah ngak hu. Kayua sang bac oh hu bruk pasang iek sinh viên hu atau oh nao ngak them saong jeng oh pasang iek hu.

Thạc sĩ Phạm Thái Sơn, yam ndok pasak pilih ruah saong brei thau, Đại học Công Thương TP.HCM khan lac, adat brei patakik maong ngak daok hu rilo taneh ia cak rok patagok daok ngak. Min, mayah pandar di Việt Nam lac daok biak aval. Pagap yau di sang bac đại học, sinh viên hu ginup umo 18 thun, ginup umo piah taduan bruk ngak saong sahaneng mboh, sang bac tok meda kakei sinh viên ye oh pandar kateik greik ngak them njauk tukvak: “mayah hu ye anak mata tok njauk pachreih ba, kapul dam dara sang bac, jabat ngak bruk sinh vien pachreih ba sinh vien ngak them 20 maong sa adit, tuk vak daok veik duh ka bruk bac taa saong roh duah. Rilo tuk sinh viên sangka ngak them bo var tukvak bac saong roh duah,  oh caik hatai tame bruk bac taa.”

Tui rilo urang ilamu dalam gah pato magru, ngak bruk, urak ini dom sang bac đại học, cao đẳng hu blaoh dom jalan ngak khik ramik sinh vien bac tín chỉ, hu pakacah saong taong yaom cambaih laih. Bruk anek saih, sinh viên ginup umo thun ngak bruk, nao ngak them lac bruk njauk pachreih ba, daong ka dom urang ranaih meda duah hu jien cai pandar, kuhri kuhria ka raidiuk, hu thau jang raidiuk, hu pabak ilamo./.