Sang ong Mã Thanh Sơn, palei Mỹ Thọ, xã Mỹ Quới kak kajap haong bruk pak pandap meng njam hang hu 5 thun. Ong khan lac, rahra Ngã Năm tok ngak 2 bilan padai, nan ye tukvak lahaiy daok rilo, tui nan, palei cakrok bruk pak njam hang piah ba bruk ngak ka urang ngak di puk palei. Pak sang ong Mã, lingiu di pala 2ha padai, ye hu 3 urang hu mbaok tame pak njam hang, yaok thun duah hu jien tame meng 70-80 trieu dong.“Sang dahlak sa adit pak meng 240-300 khuông, yau nan sa bilan kaoh tabiak pandap ngak ye bilan blaoh kong ti biyar ka sang dahlak labaih 8 trieu dong meng bruk pakt. Meyah sang halei taring ngak, ye raidiuk biak tani tanat, meda hu jang nao ban raya, kayua angaok ban raya drei daok buh jien mbang, jien pah sang, taong abih hagait jeng blei, min pak ini ye bilan hajan drei meda pala hu, jien tame tanat jang pak ban raya”.

Tok ngak 5 công taneh hamu, min raong 3 anek sit, kinh te sang sa-ai Phạm Thị Giang daok pak palei Mỹ Phước, xã Mỹ Bình dom thun dahlau biak kan kandah. Jaik 3 thun ini, tuk taduan mek pandap mai sang ngak, yaok harei sa-ai Giang duah hu labaih 150.000 dong, daong ka raidiuk sang sa-ai hu tani tanat jang. Sa-ai Giang brei thau: “Bruk ini jeng biak lagaih ka khol dahlak menuac ngak nong, hu anek nao bac. Brei ka anek nao bac, hu jien ye raidiuk hu tani tanat jang. Sang dahlak tok hu dahlak ngak duah jien, gaok tuk mai jeng hu anek daong lingiu di tuk nao bac, jien duah hu meng 160.000-170.000 dong.”

Mikva bhum palei pala di ban sit Ngã Năm daok brei thau lac, bruk pak njam hang biak njuel njac, hu caong bac bruk, gheih tangin, kham merat lac meda duah hu jien, taha mada jeng ngak hu. Abih di nyu nan lac ngak di sang nan ye meda ngak tuk halei jeng hu. Yau amuk Nguyễn Thị Mai, daok di palei Mỹ Phước, xã Mỹ Bình, thun ini umo 68 thun min amuk jeng bac bruk saong pak haong dom menuac dalam sang. “Jien tame hu harei 100 ribau, hu harei 80 ribau, 90 ribau, tui bruk dreii ngak rilo atau takik, hu harei jeng duah hu 120 ribau, harei halei jeng yau nan, jeng ngak abih.”

Ngã Năm lac bhum kraong ia, hu biak rilo kraong ribaong, rilo phun njam hang theik angaok kraong luac thun, rahra mek phun njam hang praong taha, kaoh klaak hala, blaoh ba pambu pandiak ngak pandap tamo piah pak pandap meng njam hang. Bruk ini jeng hu meng 20 thun ini mai di palei ini.  

Meng bruk ngak di sang, jien tame tani tanat saong ngak tuk lahaiy nan ye bruk pak njam hang dui pachreih hu rilo urang ngak di puk palei. Sa-ai Nguyễn Kim Liên, Chu nhiem hop tac xa pak njam hang Hương Liên daok di palei Mỹ Phước, xã Mỹ Bình brei thau, urak ini hop tac xa di sa-ai hu labaih 350 urang hu mbaok tame pak njam hang…Dahlau di tuk tame HTX, mikva hu bac pak meng hu karja palei daong. Tuk ngak hu, mikva mek pandap mai sang ngak mbang pah nan ye biak lagaih. Yaok adit hop tac xa pataom mek pandap sa mbang meng 12.000 -13.000 pandap piah jao ka gah pambuak bruk. “Ngan saong urang ngak abih di nyu nan lac urang kumei di puk palei, raong anek, puh cakak blaoh jeng oh hu hagait piah ngak, jeng lahaiy, dahlak mboh bruk ini daong ka adei sa-ai kumei hu jien tame biak rilo, rilo sang daok maong ini lac bruk duah jien tame praong abih.”

Meng bruk pak njam hang hu daong ka urang lahaiy di puk palei duah hu jien kuhria ka raidiuk, hu bruk ngak saong ngak brei takik veik bruk mikva klak palei nao ngak mbang atah. Pandap ngak tabiak jeng siam ka alam langik tasik. Ini jeng lac bruk hu Akaok ban sit Ngã Năm sangka peih praong piah daong ka rahra dalam ban sit hu jien tame, dak harei dak tani tanat raidiuk./.