Lac sang Khmer kan kathaot, dua diuk pasang sa-ai Huỳnh Thị Cẩm Tú saong sa-ai Thạch Thường daok di palei Vĩnh Thanh, xã Vĩnh Quới ba gauk tagok Bình Dương ngak kong nhan. Tuk jit Covid-19 tamuh tabiak di thun 2021, diuk pasang gilac mai palei, hu amaik ame brei taneh padang sang daok karei, ngak pah duah jien. Dom thun tapa oh hu radaih nao mai nan ye bruk ngak mbang gaok biak rilo kan kadha. Nan ye, tuk hu pilih ruah daong 10 triệu đồng piah salih bruk ngak, dua diuk pasang hu blei radaih piah ngak takai nao mai, gam pajeng baoh kayau nao pablei. Sa-ai Huỳnh Thị Cẩm Tú brei thau, meng hu radaih bo bruk pablei salih di sang hu mbuan lagaih jang:

"Jien duah hu oh tani tanat, oh hu phun jien, oh hu radiah piah nao mai pablei salih, blaoh hu karja daong ye blei hu sa sruh radaih piah nao pablei salih, urak ini salih bruk ngak tapa pablei salih. Sa bilan jeng duah hu 7-8 triệu đồng, pablei baoh tamekai, baoh ia tasau, baoh uas. Sang jeng biak thau dhar phor Đảng, Karja hu daong brei ka dahlak jien piah diuk pasang pablei salih, dua diuk pasang kham merat piah abih kathaot, dahlak caong takre raidiuk hu siam lagaih jang"

Daok amuk Sơn Thị Lùng, daok di palei Vĩnh Thành, xã Vĩnh Quới, haong yaom jien 10 triệu đồng hu daong meng Danak dak bruk ngak negar patagok kinh tế - xã hội bhum bhap bini bangsa takik, amuk blei sa drei pabui pajaih, ramik pasiam veik var ro klak saong blei kaya mbang ka pabui dalam dom bilan camereip. Pandar taneh bein likuk sang, amuk pala njam piah ngak kaya mbang ka pabui. Hadei di jaik 4 bilan raong, amuk daok caga pablei pabui raong meng mbang camereip, haong 13 drei pabui, kuhria jien mek tame hu labaih 20 triệu đồng.

"Hu daong yau nan dahlak hulin thau dhar phor biak rilo. Urak ini pabui menek hu labaih 10 drei, saong dahlak hulin pablei abih kapul pabui. Dahlak hulin raong biak tani tanat, jien tame jeng hu daong ka sang dahlak tani tanat".

Tal tuk ini, meng danak dak hu daong taneh daok ka 1 sang saong yaom jien 44 triệu đồng; daong sang daok ka 35 sang haong yaom jien labaih 1,5 tỷ đồng; daong salih bruk ngak ka 87 sang haong yaom jien labaih 767 triệu đồng; daong ia pandar ka 9 sang haong yaom jien 27 triệu đồng. Langiu di nan, palei daok peih ngak 2 bruk ngak daong patagok pal – ngak, parilo jalan ngak mbang duah jien ka  bol bhap rahra, hu bruk raong ada xiem Pháp, ikan caklait di palei Vĩnh Thuận, xã Vĩnh Quới saong bruk raong ada xiem Pháp di palei Long Thành, xã Tân Long haong yaom jien labaih 343 triệu đồng saong daok brei peih ngak, pambak praong dalam thun ini. Ong Huỳnh Văn Lơ, Akaok Jabat Lao động, Thương binh saong Xã hội ban sit Ngã Năm, tỉnh Sóc Trăng brei thau:

"Kol dahlak hulin daok hu panuac biai haong UB Bhap bini ban sit, peih ngak ginup jalan ba tabiak, saong ngak ginup sarak tui danak dak patrun kathaot kajap khang, danak dak patagok kinh tế - xã hội bhum bhap bini bangsa takik saong bhum ceik, pataom tame salih bruk ngak, pato pakai urang ngak daok di palei piah ka urang hu ilamo ngak bruk, ba jien tame patagok kinh te sang".

Danak dak langyah bruk kurrang taneh daok, sang daok, taneh ngak mbang salih bruk ngak saong ia pandar hu makna biak praong, piah daong ka dom sang Khmer kathaot hu salih bruk ngak, paglaong raidiuk, mbang ngui daok dang. Kayua yau nan ye, bruk peih ngak daok hu tỉnh Sóc Trăng saong ban sit Ngã Năm pataom tame ngak, khik ka njauk menuac, sumu tukvak ba tabiak piah ka dom baoh sang hu jalan yam tagok, daong ngak brei salih bahrau mbaok meta, raidiuk kinh tế - xã hội bhum bhap bini bangsa takik dalam tukvak anak tal./.