Raok thun bac bahrau ini, baoh sang bac Tiểu học Đại Ân 2A, huyện Trần Đề hu padang ngak biak gheih, mekre, haong yaom jien padang ngak abih jaik 15 tỷ đồng, hu ba tame pato di thun 2022. Gru Trà Tấn Khanh, Hiệu trưởng sang bac brei thau, hadei di rilo thun bac ta-a dalam baoh sang bac klak, khut, 3 thun ini mai, baoh sang bac bahrau, gheih, mekre hu 14 duk bilik bac saong 7 duk bilik chức năng. Langiu di nan daok hu sang pakacah đa năng piah dom adei pasram pahat rup hu daong paglaong bruk pato saong bac di gru saong saih.

“Sang bac hu 20 tal bac haong 650 adei, dalam nan anek saih Khmer hu labaih meteh. Dom anek saih Khmer ye sang bac brei tame bac dahlau di harei peih thun bac 2 adit piah pato sap Việt ka dom adei thau ndom menytai piah hu mbuan lagaih jang tuk yam tame thun bac bahrau”.

Sóc Trăng lac tỉnh hu rilo urang bangsa Khmer dalam bhum taneran kraong Cửu Long, meblah labaih 30% dom menuac sia di tỉnh. Tukvak tapa, tỉnh tuk halei jeng sangka brei ngak dahlau sang bac ka bhum urang bangsa Khmer, piah daong ka dom adei bac ta-a hu siam, dui katut panak veik bruk glaong biar jang gauk di bhum bangsa saong thành thị.

5 thun dahlau, Sang bac Bangsa gam bac gam daok Trung học cơ sở Trần Đề, huyện Trần Đề hu padang ngak saong ba tame pato hu daong ka jaik 300 adei anek saih bangsa Khmer mbuan lagaih dalam bac ta-a. Tui panuac khan di gru Trần Sung, Hiệu trưởng Sang bac Bangsa gam bac gam daok Trung học cơ sở Trần Đề, sang bac hu 3 labik, lac labik bac hu 10 duk, labik hành chính hu  16 duk saong labik gam daok hu abih tih 36 duk daok, pabak ka dom adei bac saong daok.

“Sang bac tuk padeih hè hu kuhria caga abih janih. Ka sa lac tacei pato gah Gilang tapuk rami ramik tapuk giáo khoa, yaok pataom dom tapuk halei daok kurang tui bộ môn, tui tal bac, tuk anek saih tame bac ye langyah hu ginup ka anek saih nyim tapuk 100%. Ka dua lac pandap pato bac, urak ini, sang bac pasang iek veik, brei pabak tame dom cơ sở vật chất, pandap pato bac piah pabak bruk pato bac, labik gam daok jeng hu ramik ngak pasiam”.

Meng bruk sangka buh jien tame padang nak cơ sở vật chất, sang bac, tal bac bhum urang bangsa Khmer. Dom thun tapa, bruk pato pakai bhum urang bangsa dalam tỉnh oh padeih hu paglaong tagok.

Ong Trịnh Văn Bé, Phaok akaok UB bhap bini huyện Trần Đề brei thau, di huyen Trần Đề urak ini hu 46 sang bac công lập. Dom sang bac hu ngak pakhang tagok biak rilo piah pabak ka bruk pato bac 2 var sa harei. Bruk pandar kong nghe thong tin dalam pato bac jeng pabak hu pato pakai dalam sang bac. Kuhria tal urak ini, dalam huyện hu 41 dalam 46 sang bac mek hu tanut chuẩn negar, lac 89%. Dahlau di nan, huyện hu tacei pato dom sang bac pasang iek labik pato, pandap pato hu siam di abih piah peih thun bac bahrau.

“UBND huyện hu tacei pato dom phòng, ban chuyên môn pasang iek, ramik ngak pasiam di 24 sang bac haong yaom jien ngak abih  23 tỷ 219 trieu 748 rabau đồng; blei bàn, kik, bảng, thiết bị. Tapa nan, pabak hu bruk peih ngak Danak dak pato megru phổ thông 2018 di taong abih dom tal bac meng tal 1 tal tal bac 9 meng thun bac 2024-2025”.

Langiu di nan, bruk jak ba, sangka anek saih mai bac, abih di nyu lac dom adei daok di bhum atah baya, bhum biak kan kandah, bhum hu rilo urang bangsa takik, daok hu jhul khang piah ka taong abih aneh saih dalam umo bac ta-a, hu nao tal sang bac, paglaong abih gah bruk pato pakai dalam tỉnh./.