Nan ye yaok thun, tỉnh hu caga dahlau dom jalan ngak piah pacang bala meng langik tasik, piah patrun patakik dom khat lahik ka pala drak, ka raidiuk di bhap bini. Kadha vak di urang vak Thạch Hồng hu ndom biai ka Sóc Trăng caga pacang dom bruk oh lagaih di langik tasik.

Piah pataom tame pacang ia ndik, gah chức năng di huyện Cù Lao Dung tuk halei jeng kham merat pathau khan, jak ba bhap bini pasiam veik ar pacang, pakhang, pakajap dom ar pacang, dalam nan, bhum phun mbang baoh hu maong lac bhum praong njauk hu khik caga dahlau.

Xã An Thạnh Tây hu prein khang gah phun mbang baoh haong 635 ha, yau nan min, xã hu ar pacang dom kaoh hu taong yaom lac oh ka khang, dalam tuk taneh pala duk haong mbaok ia nyu biar jang, abih di nyu lac tuk ia ndik tagok. Nan ye, meyah hu bruk pacah ar lac khat lahik biak praong. Kayua yau nan ye, karja palei daok pataom tame ngak pasiam, pakhang piah pacang caga hu siam, gam haong nan, pathau khan bhap bini pasiam pakhang ar pacang piah khik caga phun mbang baoh haong njam patam. Amuk Nguyễn Thị Tú Quyên, Phaok akaok UB bhap bini xã An Thạnh Tây, brei thau:

 “Hu dom labik jeng oh ka khang kajap, nan ye dahlau di dilan ia ndik mai, xã hu pambuak bruk haong UB bhap bini saong mikva ngak pakhang ar pacang dahlau di bilan ia ndik mai. Langiu di nan, dom labik oh khang bo tapa prein di bhap bini ye jeng hu pok panuac tagok huyện, likau huyện daong jien ngak pakhang, pacang ia ndik".

Ong Trần Hữu Nghĩa, sa urang daok di palei An Phú, xã An Thạnh Tây, daok brei thau lac:

 “Ia ndik bhian tagok glaong di abih meng bilan 8 tal bilan 10 atau bilan 11, ia ndik jeng bhian tagok glaong dalam dom bilan ini, glaong tal tatuak drei. Urak ini bo drei saong karja ba gauk ngak hu dom ar pacang yau ini, lac biak siam, tapa hu dom mbang ia ndik lac biak siam. Dom bilan tal oh hu ia praong, tok hu 3 bilan ia ndik ye trak hatai huac ka ar pacang".

Huyện Cù Lao Dung hu jaik 5 rabau ha taneh pala phun mbang baoh, jaik 3 rabau ha pala njam patam saong jaik 2.700 ha taneh pala tabau haong rilo taneh raong kaya ikan. Piah khik caga kaya nong, kaya ikan, bhap bini saong karja palei daok ngak, daok pok paglaong ar pacang.

Huyện Cù Lao Dung hu ar kraong atah labaih 80 km, ar tasik 17 km saong 360 baoh riabong bak angaok gauk, ar pacang dalam bhap bini samu 1.000 km. Anak dom mbang ia ndik yaok thun, gah chức năng hu pambuak bruk haong karja palei patagok pathau khan saong tabiak panuac brei thau ka ia ndik piah daong ka bhap bini hu bruk kuhria caga dahlau piah pacang, tapa nan, trun hu dom kan kandah di ia ndik tal bruk pala drak, ngak mbang, ngak huak di bhap bini.

Kayua biến đổi khí hậu, nan ye dom thun jaik di ini bhian hu dom mbang ia ndik praong, piah khik caga njam patam di bhap bini, huyện Cù Lao Dung hu caga dahlau dom jalan pacang caga luac thun. Tui jalan ngak “4 di labik” meng akaok thun tal ini, gah chức năng bhian pasang iek, ngak pasiam, pakhang dom danak dak pacang caga bala meng langik tasik, ar pacang, dom jalan “đal” biar bhian njauk ia nduac tapa, dom labik pacang di dom ribaong dom xã… Ong Nguyễn Văn Đắc, akaok jabat ngak nong saong patagok palei pala huyện Cù Lao Dung brei thau:

“Piah pacang caga ia ndik hu siam jang, salih ka bruk dahlau daih dom ribaong nan bhap bini njauk khik iek 2-3 km ye urak ini kol drei pacang veik, daok meng 25-30 m min, bhap bini saong karja palei pataom tame khik iek labik katut panak yau nan bo khik caga sa ar pacang biak praong".

Dahlau daih, dom mbang ia ndik tagok, bhian ngak brei pacah ar pacang tal yaok pluh labik, khat lahik trak tal bruk pala drak, kan kandah tal sang danaok, bruk ngak mbang, ngak huak, nao mai di bhap bini Cù Lao Dung. Min urak ini, meng hu bruk caga dahlau di karja palei, gam haong bruk daong di Trung ương, di tỉnh dalam padang ngak dom bruk pacang caga bala meng langik tasik, nan ye bruk pacah ar pacang di Cù Lao Dung hu trun khang./.