Rai duik di mik va Khmer dak harei dak salih bahrau 

Ong Sơn Hang, urang bangsa Khmer daok di palei Trà Bết, xã Tham Đôn, huyện Mỹ Xuyên peih bruk raong limo ia tasau meng thun 2009. Min bruk raong ini tok hu kein laba glaong meng thun 2015 tuk ong hu mbaok tame Danak dak raong limo ia tasau di tỉnh. Ong Sơn Hang brei thau, meng hu daong ilamu raong, anek pajaih…., tapon limo dak harei dak rilo saong hu kein laba glaong. Meng bruk raong limo ia tasau, urak ini, sang ong Hang yam tagok jeng sang kaya meda.

"Kol dahlak pablei ia tasau ka bilai blei ia tasau di Cty Vinamilk. Meyah yaok harei drei mek hu 100kg ia tasau ye 1 adit pablei hu labaih 9 triệu đồng, kaoh tabiak jien blei pandap mbang, jien điện, jien ia raong limo ye drei daok laba hu labaih 6 triệu đồng".

Tham Đôn lac xã hu labaih 73% menuac lac urang Khmer. Ini jeng lac xã bahrau hu tỉnh Sóc Trăng brei angan lac xã palei pala bahrau paglaong. Ong Tăng Trung Bảo, Bí thư Đảng ủy, akaok UB bhap bini xã Tham Đôn brei thau, meng bruk palei pala bahrau bo xã samar hu hadah hadai, raidiuk bhap bini hu glaong tagok, rilo bruk ngak mbang cakrok yau raong limo ia tasau, raong hadang, pala njam patam pambuak haong pala rilo janih hu ba jien tame glaong ka urang ngak nong.

Jeng yau xã Tham Đôn, xã Viên Bình, huyện Trần Đề hu ngak salah bloh bruk padang ngak palei pala bahrau paglaong di puac thun 2021. Mai tal xã Viên Bình dalam dom harei akaok thun bahrau, abih menuac sia jeng mboh hu bhum palei pala hadah hadai. Angaok jalan nhựa meng pasak xã mai palei Lao Viên lac dom baoh sang bac praong, siam, dua gah jalan hu mikva pala bingu hadah mekre. Ndom ka bruk salih bahrau di palei drei, ong Kim Suôl, daok di palei Lao Vên, xã Viên Bình, khan lac:

"Dahlak mboh hu bruk salih bahrau biak praong. Dahlau daih bhum ini biak kan kandah. Urak ini ilamu, akaok sahneng di mikva drei hu glaong tagok. Bruk ngak mbang jeng hu kein laba jang. Yau drei mboh nan, sang danaok urak ini hu padang ngak bahrau abih paje"

Tui jalan ngak lac “karja haong bhap bini ba gauk ngak”, meng thun 2018 tal ini, xã ieu pataom hu labaih 92 tỷ đồng piah buh tame padang ngak palei pala bahrau paglaong, dalam nan bhap bini rik tame 3,5 tỷ đồng. Urak ini, dom jalan meng pasak xã tal dom jalan huyện jeng hu tuh nhựa abih, dom jalan palei, jalan pambuak dom palei jeng hu tuh bê tông, pabak bruk pajeng ba pandap panda saong bruk nao mai di bhap bini, rik daong praong dalam bruk cakrok patagok kinh tế - xã hội di puk palei. Ndom ka ilamu piah xã mek hu siam mekre yau ini, ong Lê Trung Tuấn, Bí thư Đảng ủy, akaok UB bhap bini xã Viên Bình, huyện Trần Đề, brei thau:

Tapa bruk jhul tagok di mBan tacei pato xã, bhap bini abih drei hu mbaok tame dom bruk ngak kein laba ka palei. Abih di nyu lac rik daong gah truac hadah gom năng lượng ia harei meng Pasak xã tal baha Lao Vên. Urak ini kol dahlak daok jhul tagok bruk bhap bini daong ngak gom năng lượng ia harei angaok dom jalan sit  bahrau hu ngak pasiam piah lagaih ka bhap bini nao mai.

Bruk salih bahrau dalam bhum urang bangsa Khmer di Sóc Trăng harei ini brei mboh bruk sangka iek glang di Đảng saong Karja ngan saong bruk patagok yaok gah di bhap bini. Ini jeng lac prein khang daong ka mikva pakacah gauk ngak mbang, pala drak saong dak padang raidiuk ilamu, rik daong tame bruk ngak  hu makna dalam bruk padang ngak palei pala bahrau, ba mai hadah hadai ka puk palei./.

Urang lang: Mousaphuong- 9/2