Amuk Kim Thị Hoàng, daok di ấp Trường Thọ, xã Trường Khánh dom harei camereip tuk bahrau bac bruk pagam baoh nyuk, amuk khin padeih bac kayua nyu biak kan ngak, min hu Kapul urang kamei xã pachreih ba, mboh hu kein laba di bruk bac bruk ngak nan ye amuk kham merat yam tapa. Tal urak ini, amuk ngak hu rilo pandap meng asar baoh nyuk. Tui pandap ngak tabiak, cơ sở hu blei veik yaom meng 50.000đ tal 100.000đ sa pandap, daong ka amuk Hoàng hu jien mek tame.. Amuk Kim Thị Hoàng khan lac:“Dahlak uan tabuan lo saong thau dhar phor UBND xã saong mBan Nhân dân ấp hu tacei pato ka kol dahlak bac tal pagam baoh nyuk ini, meng hu jien mek tame, hu bruk hit ngak mbang piah tabiak truh kan kathaot khang kajap”

Tukvak tapa, meng patagok pathau khan, jak ba, hu daong ka rahra mboh hu kein laba  di bruk hu mbaok tame dom tal pato bruk ngak ka urang ngak palei pala, tapa nan, hu daong ngak brei salih jalan sahneng, pachreih mikva tame dom tal bac bruk ngak dak harei dak rilo. Kuhria dalam thun 2023, huyện Long Phú hu pato bruk ngak ka labaih 2.700 urang ngak. Dalam nan, urang ngak bruk hu tukvak tui harak pambuak bruk di taneh ia langiu lac 28 urang, pato bruk ngak ka 758 urang. Hadei di bac bruk ngak blaoh, hu bruk ngak labaih 95%. Sa dalam dom bruk pato bruk ngak hu siam lagaih lac bruk pak pandap mỹ nghệ meng talei njam baok saong pagam baoh nyuk, jaik abih dom urang bac bruk ngak ini jeng mek pandap mai sang ngak, duah hu jien tame. Sa-ai Trần Thị Ngọc Bích daok di  ấp Chùa Ông, xã Hậu Thạnh, huyện Long Phú brei thau:“Dom adei sa-ai kumei ngak bruk puh cakak, bruk sang danaok blaoh, tuk lahaiy ye sa harei ngak jeng duah hu dom pluh ribau piah pandar cai”.

Siam lagaih meng pato bruk ngak ka urang ngak palei pala hu daong patrun kathaot di huyện Long Phú. Dalam thun blaoh, dom sang kathaot trun hu 921 baoh, dalam nan sang kathaot bangsa Khmer trun 410 baoh. Ini lac bruk ngak hu meng jhul khang pathau khan paglaong akaok sahneng di bhap bini, bruk buh jien tame piah peih dom tal pato bruk ngak daok patagok hu siam lagaih. Ong Trần Văn Thuyền, Yam ndok Pasak Pato bruk ngak saong pato pakai gam gam huyện Long Phú daok brei thau lac:“Bruk pato bruk ngak ka urang ngak palei pala hu bruk sangka di UBND huyện, dalam thun 2023 pato hu ka 758 urang, lac labaih 250% duk haong bruk ba tabiak. Bruk pambuak gauk haong UBND dom xã, ban sit, kapul nyaom hu daong thau cambaih hadom urang bac bruk ngak, dom menuac hu bruk ngak  hadei di bac bruk ngak blaoh lac labaih 95%, duk haong bruk di Sarak ba tabiak”.

Piah daong paglaong kein laba bruk pato bruk ngak ka urang ngak palei pala dalam tukvak anak tal, urang pan akaok huyện Long Phú brei thau, huyen brei pataom tame pato bruk ngak pambuak haong ba bruk ngak bahrau meng dom jalan pambuak gauk haong dom doanh nghiệp, labik ngak pandap pablei salih, pamaong tal bruk daong palagaih ka urang ngak hu bruk ngak tani tanat di dom labik ngak dalam saong langiu huyện piah rik daong praong tame bruk patrun  kathaot khang kajap di puk palei./.