Dom harei jhung bilan 2, di labik bhian njauk pandiak thu, ia mbăk njom tame di huyện Long Phú, min 10 công taneh pala tamun ia di sang sa-ai Nguyễn Tiền Khanh, daok di ấp Cái Xe, xã Tân Thạnh jeng daok hijao mekre, hu baoh paik pablei yaok harei.

Sa-ai Khanh khan lac, bhum ini tok ngak hu 2 vụ padai, bilan pandiak thu, mbăk njom tame, bhian kurang ia taba nan ye jaik abih mikva takik ngak padai Đông xuân muộn (lac vụ padai ka 3). Anak bruk biến đổi khí hậu dak harei dak srau kadau, sang sa-ai brei salih meng ngak padai tapa pala njam patam. Sa-ai Khanh ndom lac, piah ngak hu luac thun, ngak gam bilan pandiak thu, sang sa-ai hu caik tabiak jaik 3.000 mét vuông taneh piah raok bingun, padang ia taba, khik ginup ia pruh ka njam patam, saong hu ngak jalan pruh ia patak pataom. Hadei di rilo thun salih, sang sa-ai hu jien mek tame luac thun: “Adei sa-ai kol dahlak pala jaik 10.000 mét vuông, tamun ia daok tamuh siam saong daok paik baoh. Bilan njom mbăk ini, adei sa-ai hu khik piah ia dalam bingun, ia padang piah meng bilan hajan tal ini, oh mek ia njom mbăk meng langiu tame. Khik piah ia piah pruh jeng mbuan lagaih. Langiu di nan, daok pandar ilamu kỹ thuật pruh ia patak pataom nan ye abih takik ia jang dahlau.

Piah ngak hu siam bruk ngak nong, dom thun tapa, tỉnh Sóc Trăng tuk halei jeng sangka peih ngak bruk salih janih phun pala, athur raong piah lagaih haong biến đổi khí hậu, bo daok lagaih haong taneh riya di yaok bhum, ngak jeng dom bhum pala drak, raong glang siam lagaih, ba mai kein laba glaong.

Pagap yau di xã Thạnh Phú, huyện Mỹ Xuyên, mikva hu padang ngak saong ngak hu jak jeng bruk pala tamekai di takai hamu dalam bilan pandiak thu. Yaok thun, hadei di yuak blaoh padai bilan Đông Xuân, mikva urang ngak nong duah dom mblang hamu di bhum taneh glaong piah pala tamekai. Ong Thạch Giàu daok di ấp Sóc Bưng khan lac, tal bilan pandiak thu ye ong pilih ruah dom công taneh piah pala tamekai. Thun blaoh, tamekai pala njauk, hu rilo baoh, pablei hu yaom, ong duah laba hu jaik 50 triệu đồng sa công hadei di 2 bilan pala. “Ngak hamu ye drei njuk ia tame bak, daok tamekai ye tok pruh ia yaok harei, sa harei pruh  2 mbang, ginup raong diuk phun tamekai lac hu paje.”  

Ong Lê Hồng Quang, Phaok akaok UBND xã Thạnh Phú, huyện Mỹ Xuyên brei thau, bruk pala njam patam, baoh kraoh, abih di nyu lac tamekai di mblang hamu pak ini hu ngak rilo thun saong brei mboh kein laba kinh tế, lagaih haong biến đổi khí hậu, mbăk njom tame. Thun ini, mikva daok pala labaih 22ha phun tamekai mala takai hamu. “jak ba mikva gam ngak 2 vụ padai, 1 vụ njam patam baoh kraoh piah khik ginup ia pruh dalam tuk biến đổi khí hậu, mbăk njom tame, pandiak bhang. Jit ruak, halak halin jeng hu tukvak atah di gauk piah drei taong yaom, bruk ngak ini, njam pataom baoh kraoh trun takai hamu, abih di nyu lac tamekai hu kein laba biak glaong, mikva tuk halei jeng hu laba.”

Ba phun tamekai trun pala di takai hamu bilan pandiak thu hu daong salih janih phun pala dalam tuk biến đổi khí hậu yau urak ini, abih di nyu lac dalam tuk kurang ia taba piah pruh di bilan pandiak thu, gam patagok jien mek tame ka mikva urang ngak nong dalam tuk lahaiy, gam ba bruk ngak pak di labik ka urang ngak dalam palei. Bruk kein laba di bruk ngak ini hu dui pachreih dak harei dak rilo sang urang ngak nong di Sóc Trăng hu mbaok tame pala, ngak./.