Sang sa-ai kamei Sơn Thị Kim Sang, daok di ấp Tân Lịch, xã Tân Hưng lac sang kathaot, yaom lac kham merat ngak pah, patak pataom jaik 10 thun ini mai bo oh ginup jien padang sang siam mekre piah daok. Tuk hu karja daong ngak sang tui danak dak bruk ngak negar patagok KTXH bhum urang bangsa takik, diuk pasang uan tabuan lô. Hadei di tuk daong padang sang, karja palei daok hu daong 200 drei manuk pajaih piah raong, meng nan raidiuk takik glaih glar, hu jien brei ka dom anek nao mbang bac. Sa-ai Sang lac: “Sang ini hu karja daong brei 44 triệu, adei pabak tame 6 triệu piah ginup 50 triệu ngak sang. Hu karja daong brei sang, 2 diuk pasang adei uan tabuan lô.”

Danak dak bruk ngak negar patagok KTXH bhum urang bangsa takik tukvak 2021 – 2025 tal urak ini hu peih tabiak ngak di huyện Long Phú haong yaom jien jaik 66 tỷ đồng, meng nan, huyện hu daong sang daok brei ka 284 sang, salih bruk ngak ka 395 sang, ia pandar ka 92 sang daok atah di gauk, padang 27 jalan nao mai di dom xã, ấp biak kan kandah, bhum bangsa takik, ramik ngak pasiam veik 10 jalan radaih.

Pagap yau jalan di ấp Tân Quy B, xã Tân Hưng dahlau daih daok hu sa labik lac jalan haluk. Thun 2022, huyện daong jien ngak nan ye labik jalan atah jaik 1km hu tuh bê tông ginup abih, ba mbuan lagaih ka bruk nao mai, pajeng ba pandap panda di bhap bini. Ong Sơn Phương, urang daok di ấp Tân Quy B, khan lac: “Dahlau daih jalan ini lac jalan haluk, mikva, anek saih nao mai kan kandah. Tal bilan 11 thun 2022 hu pakat angaok buh jien ngak jalan praong 2,5m ye mikva bui sambai chreih chrai lô. Hu karja brei ngak jalan ye mikva uan tabuan lô, brei taneh, kaoh phun kayau, njam patam piah mek labik ngak jalan. Anak tal ngak tui jalan palei pala bahrau, jak ba mikva pala bingu 2 gah takai jalan, ngak paga, gheng daok, gom truac hadah.”

Huyện Long Phú daok padang ngak 9 danak dak daong bruk ngak mbang duah jien, rilo meng lac raong lamo menek. Piah ka dom bruk nan tagok hu kein laba, dom puk palei hu pambuak bruk haong gah chuyên môn pato pasram ilamu kỹ thuật, tacei pato jalan iek glang, gam haong bruk tari taring oh huac glaih glar di mikva, nan ye dom bruk ngak jeng ba mai siam mekre, daong salih bahrau raidiuk. Langiu di nan, jeng peih hu 47 tal pato bruk ngak ka 846 urang tui bac... Jaik abih dom urang hadei di tuk hu bac bruk ngak, jeng taduan pandap nao sang piah ngak mbang pah, duah hu jien tame... meng nan, raidiuk di mikva hu rilo salih bharau siam mekre, rik daong praong dalam bruk patrun kathaot yaok thun. Thun 2023, abih tih dom sang kathaot trun daok labaih 1.200 baoh, samu 4,53%.

Ong Lê Thanh Phương, Phaok akaok UBND huyện Long Phú brei thau, meng dom jak jeng nan, hu daong ngak brei patrun sang kathaot bangsa takik, mbaok mata palei pala bahrau bhum urang bangsa takik dak harei dak salih bahrau, bruk cakrok ilamu, pato megru, iek glang prein yava ka bhap bini hu iek praong, ilamu siam mekre meng kan di bhap bini bangsa Khmer daok hu khik ramik saong cakrok. Ong Lê Thanh Phương daok brei thau lac: “Bhian ngak siam bruk pathau khan, brei thau cambaih, paglaong akaok sahneng di urang jakar, công chức, viên chức saong bhap bini ka bruk bangsa. Patagok prein khang di abih hệ thống chính trị dalam peih ngak sarak di Đảng, hukum di Karja pambuak tal bruk bangsa.”

Bruk peih ngak dom danak dak bruk ngak negar, sarak bangsa hu daong ngak brei mbaok mata palei pala huyện Long Phú, tỉnh Sóc Trăng dak harei dak hadah hadai, hạ tầng KTXH bhum bangsa takik hu salih bahrau, raidiuk, mbang ngui daok dang di bhap bini dak harei dak hu glaong tagok./.