Dalam mblang padai He Thu bahrau blaoh, 50 ha padai di HTX Ngak nong Hưng Lợi, xa Long Đức, huyen Long Phú hu palih ruah ngak iek tui Danak dak 1 triệu ha taneh pala padai asar siam, tathuak nerak biar pagam haong patagok hijao hacih sa-at di bhum taneran kraong Cuu Long tal thun 2030 di tỉnh Soc Trang. Pajaih padai hu palih ruah pala lac ST25. Mbiah tal ini, hamu padai ini hu yuak blaoh brei rilo asar padai brah.

 Hadei mbang akaok meti pala tui danak dak, ong Nguyễn Ngọc Hưởng, urang dalam HTX ngak nong Hưng Lợi hu 2 ha hamu ba  tame ngak iek, ong Hưởng brei thau:

Dahlau daih ngak tui jalan ngak meng kal ye kol hulin dahak drak pajaih yaok sa công 10 kg ngan haong công taneh sit, daok công taneh praong ye labaih 13 kg, urak ini trun daok 6kg sa công sit. Anak meta ye drei hu kein lagaih meng padai pajaih. Ka dua veik lac khak pandar takik jang jalan ngak klak. Dahlau daih drak meng 50-60kg khak ye urak ini daok 40-45kg sa công. Langiu di nan, hu trun jien blei jru pacang phun pala, halak halin.

Padai ba tabiak dalam Danak dak mbang padai He Thu 2024 bahrau blaoh hu 6,5 tan sa ha, haong yaom padai ST25 hu pablei 10.800 sa kg, urang ngak nong hu mbaok tame danak dak duah hu jien laba jaik 49 trieu đong sa ha, glaong jaik 12% dut haong taneh pala langiu di bruk ngak.

Tui So Ngak nong saong Patagok palei pala tinh Soc Trang, bruk ngak hu peih ngak catang tui jalan ilamo ba tabiak padai asar siam saong tathuak nerak biar bhum taneran kraong Cuu Long. Dalam nan, pandar jamraik dalam bruk ngak taneh; drak meng mac drak gam haong buh khak saong oh buh khak. Haong pajaih pandar lac 60kg/ha, trun meng 20-40 kg/ha dut haong urang ngak nong langiu di bruk ngak. Langiu di nan, daong ka urang ngak hamu hu trun 4 mbang pruh jru pacang caga phun pala dut haong bruk ngak gah langiu danak dak.

Yau nan, tapa sa mbang pala drak, meng bruk jak jeng kein laba tuk camereip brei mboh bruk patrun jien blei jru blei khak blei pajaih bo oh ngak lahaik padai saong daok ba tame urang ngak nong kein laba. Ini lac daong prein piah pachreih rahra peih praong bruk ngak dalam harei hadei. Ong Trương Văn Hùng, Yam ndok HTX ngak nong Hưng Lợi brei thau:

Piah ngak hu jak jeng siam dalam tukvak anak tal ye HTX patui veik paglaong hatai gul pataom, pambuak gauk saong ngk tui pato tacei di jabat chuyen mon saong pala padai khik kajap bruk ngak suai atah, pandar bruk langyah pong saong pasang iek ia, khak.

Sóc Trăng lac tinh ngak nong, hu lagaih gah pala padai haong taneh drak yaok thun labaih 320 ribau ha, hu padai labaih 2 trieu tan. Thun dahlau, yaom pablei tabiak negar langiu ngan haong brah di tỉnh hu labaih 400 trieu USD. Angaok bruk pato tacei di Mentri Ngak nong saong Patagok palei pala, Soc Trang hu pato tacei gah ngak nong ngak rilo danak dak patagok bruk ngak piah paglaong asar padai, brah yau: danak dak patagok padai hu angan jia di lbik nan, danak dak ngak nong hữu cơ. Abih di nyu nan lac tỉnh daok hu mbaok tame danak dak 1 trieu ha pala padai asar siam, tathuak nerak biar pagam haong patagok hijao hacih sa-at bhum taneran kraong Cuu Long tal thun 2030. Dalam mbang padai he thu bahrau blaoh, tỉnh hu bruk ngak iek dalam danak dak 50ha taneh padai di HTX ngak nong Hưng Lợi saong hu jak jeng biak siam. Ong Vương Quốc Nam, Phaok akaok UB Bhap bini tinh Soc Trang brei thau:

“Haong bruk ngak jak jeng, siam lagaih meng bruk ngak iek 50ha padai di HTX ngak nong Hưng Lợi, dalam tukvak anak tal tinh hu patui veik ngak dom bruk ngak pala padai asar siam, tathuak nerak biar saong 50 ha taneh di sa bruk ngak meng jien rik daong di tinh, huyen saong pagam pambuak  dom danak dak karei. Atah jang lac patui veik peih praong dom bruk ngak piah njauk haong taneh bo tinh hu tut angan haong Mentri Ngak nong saong Patagok palei pala”.

Patui bruk ngak iek hu jak jeng siam mekre di bilan padai He Thu 2024 di huyen Long Phú, tinh Soc Trang kuhria hu peih praong tabiak bruk ngak iek dalam yau nan dalam tỉnh. Bruk ngak iek lac 8 bruk ngak ngan haong 340ha taneh hu ngak meng rilo jien rik daong karei dalam nan hu jien karaj meng Mentri Ngak nong saong Patagok saong kadung jien di tinh./.