Xã Đại Tâm, huyện Mỹ Xuyên hu 1.670 ha ngak 2 vụ padai, 298 ha pala njam patam, langiu di nan, mikva urang nong daok hu raong lamo ia tasau, lamo ralow mek hu rilo kein laba. Ong Trương Tấn Lâm, Phaok akaok UBND xã Đại Tâm brei thau, xã tuk halei jeng sangka ngak siam dom bruk hu prein khang di palei nan lac cakrok bruk ngak nong tapa dom bruk kinh tế kapul nyaom, pandar ilamu công nghệ glaong piah patagok jien mek tame ka rahra. Tal urak ini, xã padang hu 1 HTX ngak padai, 14 kapul pambuak gauk ngak padai, raong glang, pala njam patam. Njauk ndom tal di abih lac bruk “mblang hamu praong” ngak padai ST24, ST25 haong taneh praong 656 ha, ngak tui ilamu “3 trun, 3 tagok”, “1 njauk, 5 trun” ngak tui tanut VietGAP, ngak padai tui jalan hữu cơ, pandar jamriak ngak taneh, tuh ia, pruh jru saong paik, yuak… hu pambuak bruk haong doanh nghiệp piah pabak brei pajaih, pandap ngak saong pablei padai. Ong Trương Tấn Lâm, Phaok akaok UBND xã Đại Tâm lac: " Dalam bilan 8 meng blaoh jien mek tame kuhria tui akaok menuac hu jaik 80 triệu đồng sa urang sa thun. Anak tal kol dahlak daok daong duah, ba bruk ngak ka urang ngak dalam palei, daong padang dom bruk ngak kinh tế kapul nyaom, yau ye HTX, kapul pambuak bruk piah patagok jien mek tame, pamaong tal daong bruk ngak nong hijao, hacih, kuhria gam bruk raong glang piah paglaong yaom kaya nong dalam dom thun patui di nan piah khik kajap bruk paglaong jien mek tame".

Mban Tacei jalan dom danak dak bruk ngak negar tỉnh Sóc Trăng mboh lac, urak ini, bruk pakacah gauk buh prein padang ngak palei pala bahrau hu pambak tabiak tal bol bhap, rahra palei pala, taphia di bruk ngak mbang, pala drak, mikva daok hu pakacah gauk ngak dom bruk di baoh sang ilamu palei pala bahrau, palei ilamu palei pala bahrau, jalan palei pala kiểu mẫu. Ong Đào Đắc Hùng, Phaok akaok UBND huyện Mỹ Xuyên, ndom lac: “Bruk padang ngak ka nyu mekre mbaok meta di huyện ye huyện padang ngak hu rilo bruk, yau ye harei senecar hijao, harei adit halan hatian, ngak hu bruk pachreih ba rahra hu mbaok tame. Abih di nyu lac dom jalan praong, yau ye jalan roya, jalan tỉnh…"

Meng thun 2021 tal urak ini, Sóc Trăng jak ba hu labaih 8.300 tỷ đồng piah padang ngak palei pala bahrau. Dalam tỉnh urak ini hu 64 xã mek hu angan palei pala bahrau, 16 xã palei pala bahrau paglaong, hu 3 huyện mek hu angan palei pala bahrau. Tal jhung thun 2022, dom sang kathaot di palei pala lac labaih 4,7%; dom sang hu sang khang kajap di dom xã lac labaih 87%.

Sóc Trăng ba tabik bruk lac kham merat tal jhung thun 2025,hu gac takik di nyu 8 xã mek hu angan palei pala bahrau, 16 xã palei pala bahrau paglaong, 8 xã palei pala bahrau kiểu mẫu. Piah ngak hu yau ini, bruk praong bo Sóc Trăng pamaong tal lac pataom tame cakrok kinh tế palei pala. Ong Trần Văn Lâu, Akaok UBND tỉnh Sóc Trăng ndom lac: “ Kol drei meda pablak tame bruk ngak công nghệ glaong haong du lịch cộng đồng, bruk ini jeng hu kein laba. Padang ngak palei pala bahrau ngak nong ye brei pandar công nghệ, ilamu kỹ thuật, salih số, pablei salih kaya pandap di mangaok mạng saong tỉnh brei roh duah bhum pala, bhum raong, brei khik kajap hạ tầng pandar haong gauk".

Hadei di labaih 10 thun padang ngak palei pala bahrau, tal urak ini, jalan sahneng saong jalan ngak di mikva hu salih bharau biak siam. Urak ini mikva oh daok pagam pambak tame karja bo halan hatian brei taneh, padang ngak siam mekre mbaok meta palei pala, baoh sang ilamu, padang bruk ngak nong thông minh… meng hatai sahneng duah bahrau, piah gam haong puk palei pamaong tal ngak hu jayah bruk padang ngak palei pala bahrau./.