Tapa di nan, mada hu rik tame bruk patrun dom kan kandah ka urang kan kathaot, daong ka urang kan kathaot hu hatai jia yam tapa kan daman dalam raidiuk. Urang vak Thạch Hồng hu kadha vak ndem ka tinh Sóc Trăng sangka sang danaok ka mikva kan kathaot.

 “Tuk hu sang karo kajap, tani tanat piah daok, anek amaik hulin dahlak biak bui sambai”, ini lac panuac khan brei thau di saai Tăng Thị Sô Banh, daok di puk phum Bưng Triết, xã Liêu Tú, huyện Trần Đề tuk taom gaok khol dahlak dalam baoh sang jumpataom bahrau hu puk palei daong. Baoh sang praong labaih 40m2, min ba mai ka sang saai Sô Banh biak bui sambai chreih hatai, njauk hatai, oh daok haduh hatai tuk hu hajan hangin tuh mai.

Saai Sô Banh ieu lac urang di sang kan kathaot, dahlau deih kayua raidiuk kan daman yau nan ye anek amaik gait njauk daok di dalam sa baoh sang taik tahak, praong labaih 20m2. Dua thun dahlau dalam tuk nao ngak pah di sang ngak kiak, saai ruak mata, mata njauk pandik trak, saai njauk padeih ngak piah ieik ruak, saai oh duah halei hu jien ieik ruak, yau nan ye raidiuk di saai dak harei dak kan kandah jang. Tuk hu daong padang ngak baoh sang jumpataom daong ka sang saai hu labik piah daok, abih di nyu nan lac daok ngak ka saai hu hatai jia tame bruk ngak, pamaong tal bruk yam tagok tabiak truh kan kathaot, tani tanat dalam raidiuk.

“Biak bui sambai saong thau dhar phol tal abih urang dalam puk palei, dhar phol tal kanja biak rilo kayua hu daong sang daok ka sang dahlak. Dahlak biak haniem phul tuk hu kanja sangka ka sang drei hu raidiuk dalam baoh sang yau nan”.

 Ong Điền Hùng, lsa urang bangsa Khmer daok di puk Phú Ninh, xã An Ninh, huyện Châu Thành, lac sa dalam dom urang ngak sang danaok. Hadei di labaih yaok pluh thun ngak bruk biak glaih glar, ong jeng ka oh padang ngak hu ka drei sa baoh sang tani tanat piah daok siam makre. Maong mboh kan kandah di dalam sang, thun 2022, ong Hùng hu brei daong sa baoh sang jumpataom: “Dahlau deih dahlak bhian saneng lac oh thau tuk halei jeng meng padang ngak hu sa baoh sang tani tanat yau ini. Urak ini hu puk palei pasang iek, mboh drei kan kandah ye daong hu baoh sang jumpataom drei biak uan tabuan lo. Dahlak hu puk palei daong 50 triệu piah padang ngak sang, daok urang ngak ye drei eng ngak. Urak ini drei hu sang paje, drei njauk daok caik hatai sangka tal bruk ngak mbang piah aval jang yam tagok kan kandah tani tanat raidiuk”.

Hu sang daok tani tanat oh lac bruk bui sambai di taeng mikwa dom dom baoh sang hu mbang tui sarak kanja, bo daok lac bruk bui sambai gam gam di dom pakat Đảng, rajaei di tinh Sóc Trăng saong abih rahra. Meng dalam dom puk palei tal dom baoh sang taik tahak di dom baoh sang kan kathaot dom thun dahlau deih urak ini jeng lac dom baoh sang khang kadang, tani tanat tui asal kadha lac “3 khang” dalam nan lac keng khang, glaong, khung khang, tabung sang khang.

Peih ngak danak dak pacacah “taneh ia hatung hatai kayua urang kan kathaot – oh caik thei daok veik gah likuk”, ngan haong hatai caong “Tương thân, tương ái”, “Lá lành đùm lá rách”, tỉnh hu padang Jalan ngak, peih bruk ba tabiak jak ba gauk daong padang ngak sang danaok ka sang kan kathaot tỉnh Sóc Trăng. Jaik 2 thun tapa, tỉnh hu jak ba, padang ngak hu 3.496 baoh sang, ngan haong abih tih yaom jien jak ba hu labaih 174 tỷ đồng. tal urak ini, hu ngak salah bruk daong sang daok ka urang kan kathaot, daong ka mikva hu sang daok tani tanat, sahanang hatai ngak mbang, yam tagok kan kandah tabiak truh kan kathaot khang kajap. Ong Lâm Văn Mẫn, Akaok pakat Đang Tỉnh ủy Sóc Trăng, brei thau lac: “Mayah pagam tui masa tukvak 2019-2020, tỉnh hu daong ka sang hu sarak kanja lac 1.900 baoh sang, ye tal urak ini, dalam tỉnh hu jak ba saong padang ngak hu 5.200 baoh sang saong ngak salah sang daok ka sang hu hu prein saong kanja, gaok kan kandah di sang daok saong sang kan kathaot suh sah ka sang danaok”.

 Ngan haong baoh sang Jumpataom ka baoh sang kan kathaot di tinh Sóc Trăng oh lac bruk daong di jien padai bo daok lac pachreih hatai sahanang hatai, daong prein piah ka sang urang kan kathaot sahanang hatai, kham marat dalam bruk ngak mbang, eng drei yam tagok kan kandah tani tanat dalam raidiuk./.