Di kreh pandiak bhang thu bilan 3, dom mblang taneh pala njam patam dalam hamu apuh di Trần Đề jeng that hijao, janji meda brei mek hu rilo njam patam baoh karaoh. Sa-ai Thạch Nươl, daok di palei Bưng Chông, xa Tài Văn mbang ini pala hu jaik 3 kong tamekai angaok laok hamu. Urak ini, tamekai  daok brei baoh, tui kuhria meda peih hu baoh dalam bilan. Sa-ai Thạch Nươl brei thau, ribaong ba aia di mblang hamu hu padang ngak siam mekre, pataom khik ia siam, min padai caong khin hu biak rilo ia, kayua yau nan ye, sa-ai panduan salih tapa pala tame kai.  

“Oh ngak padai mbang 3 ye pala tamekai, hu dom urang ye nao duah bruk ngak tuk daok saoh, daok dahlak daok di sang ye pandar taneh piah pala tamekai piah duah jien mek tame, drei pah urang ngak rok ribaong 2 gah  yau nan ka ba ia tame pruh.”

Trần Đề ieu lac sabaoh huyen daok di dalam bhum ribaong kraong, yau nan ye nyu meda susah meyah ia mbak njaom tame saong kurang aia taba dalam bilan thu. Kayua yau nan ye, gah ngak nong bhian tui iek, duah thau khao tin tanut mbak angaok dom baoh kraong, ribaong. Peih ngak dom bruk ngak ba ia, khik aia saong hu danak padang khik ia taba caga ia mbak glaong. Dalam nan ieu lac khan brei ka mikva thau dahlau oh ngak padai mbang ka 3, salih tame nan lac ba njam patam trun laok hamu piah patagok jien mek tame. Amuk Phan Bạch Vân, Akaok duk ngak nong saong alam huyen trần Đề brei thau:  

“Peih ngak dom jalan ngak padang khik ia piah duh ka bruk pala drak, dalam nan nyu lac tukvak njaom ia mbak, kurang aia pandar, praong abih di nyu ieu lac di dalam tukvak taung glaong dalam bilan 3, bilan 4 yau urak ini, khaol drei meda pala pablak dom janih njam patam angaok dom ar ribaong jeng yau dom janih phun katut panak harei yau ye tamekai, baoh ploi, baoh dak piah paralo jien mek tame sang”.

Di huyen Long Phú, kuhria dahlau ye mboh bruk njaom ia mbak thun ini meda rah tabiak kan kandah jang, nyu tamuh aval jang tukvak ini thun dahlau yau nan ye huyen pathau khan brei ka mikva thau dahlau oh ngak padai Đông - Xuân. Salih tame nan, jak ba mikva urang ngak hamu apuh peih ngak bruk li-ua pambu taneh, panduan salih tapa dom phun pala katut panak harei.

Dalam mbang pasang iek bruk pacang caga pandiak bhang, njaom ia mbak dalam tỉnh bahrau ini, ong Trần Văn Lâu, Akaok UB Bhap bini tinh Soc Trang khang panuac lac ka bruk hu peih ngak siam dom jalan ngak, dalam nan hu bruk samar drah dalam bruk khan brei ka mikva thau dahlau ka pandiak bhang, njaom mbak, pachreih mikva trun pajaih njauk haong tukvak ba tabiak; peih ngak siam mekre dom bruk ngak binek ia kraong ribaong, padang khik ia brei ka bruk pala drak daong ka mblang taneh padai saong phun mbang baoh plaih di njauk khat lahik trak, bhap bini mboh bui sambai. 

“Padai di thun 2024-2025 ini, mikva biak bui sambai, gah ngak nong saong puk palei jeng hu ngak siam bruk khan brei ka mikva thau dahlau piah peih ngak ka njauk bilan ngak. Tal tukvak ini, dalam baoh ribaong jeng daok hu ia nan lac siam paje, brei mboh bruk kuhria caga padang khik ia di dom gah chuc nang saong mikva, ini lac jalan ngak biak siam.”

Tui kuhria dahlau, meng ini tal puac abih bilan thu, ia mbak daok njaom tame dalam kraong ribaong, kayua yau nan ye tinh Soc Trang tacei pato dom gah ngak nong saong dom puk palei patui peih ngak bruk pathau khan ka bhap bani thau piah pacang caga haong njaom mbak, duah thau dahlau brei ka ia mbak angaok dom baoh kraong, ribaong, pachreih bruk pandar aia kali kalih, panduan salih tukvak pala drak piah plaih njom ia mbak; ba dom bruk ngak ia binek kraong ribaong bahrau tame pandar piah pacang caga njom ia mbak…/.