Phường Vĩnh Phước ieu lac sa labik dalam dom phuong tapen tasik di ban sit Vĩnh Châu. Rilo thun tapa, Pakat Đảng Phường tuk halei jeng iek glaong bruk cak rok patagok paralo urang đảng, dalam nan hu bruk ba tame đảng urang bangsa takik. Dom rai urang đảng daok dam di Phường Vĩnh Phước jeng hu pasram, praong tagok mang pakat palei. Tapa dom danak dak, bruk ngak di dom kapul Damdara Cộng sản, kapul Hoi, rilo urang hu angan mada hu yaih khan saong hu ba tame Đảng.

Saai Sơn Ngọc Thái, lac urang bangsa Khmer, Akaok kapul Biển Trên A, ngan haong bruk hu jao brei, saai tuk halei jeng thau cambaih dom urang dam dara dalam umo thun nao ngak lin. Patui di nan, yaok thun hu mbaok tame ngak siam bruk pilih ruah saong ieu dakwah rahra nao kapul buan lin. Lac salabik tapen tasik, saai daok hu mbaok tame pathau khan ka hukum tasik piah ka mikva nao taong cap kaya ikan ngak njauk hukum nagar, rik tame bruk khik kajap karo rup ngak po di bhum tasik, kaoh pulao. Dalam tuk ngak bruk, saai mada hu chi bộ caik harak, pasram ba tame đảng saong tal thun 2022 saai hu hadah mbaok mata hu dang tame kapul đảng. Saai Thái brei thau lac, nan lac bruk hadah mbaok mata di drei mai meng meda khin kham marat rilo jang veik, ba akaok nao dahlau, lac kreih camin piah njauk lac sa urang đảng.

“Bruk ngak di puk palei meda kham marat jang piah ngak salah, ngak siam bruk hu jao brei, njauk lac sa urang đảng di Đảng CSVN, deih yau dom urang nao dahlau. Bruk ngak cambaih laih di drei lac thau cambaih rahra, jak ba rahra dam dara nao ngak lin. Pagap yau bruk pilih ruah nao ngak lin bahrau blaoh, ye drei jeng hu ngak salah, ngak siam bruk pilih ruah dam dara nao ngak lin di thun 2023”.

Saai Ngô Thảo Trang lac Bí thư kapul Puk Xẻo Me, phường Vĩnh Phước, ban sit Vĩnh Châu lac urang kumei par akaok dam dara tuk halei jeng caga dahlau bruk pambuak jaik saong pakat palei, duah tabiak rilo jalan pataom mbaok dam dara, pato tacei peih bruk ngak. Saai tuk halei jeng paglaong bruk khik tani tanat saong paglaong raidiuk di kapul damdara chi đoàn, samar drah thau cambaih hatai caong khin di dom urang dalam kapul dam dara. Meng nan, saai hu gam haong puk palei peih rilo bruk ngak siam lagaih. Hadei di 2 thun ngak bruk saong pasram rup, saai Trang hu ba tame đảng. Saai Ngô Thảo Trang bui sambai khan lac: “Urak ini ye adei hu bac salah tal sahaneng ka Đảng, dalam tukvak anak tal, ye adei oh padeih piah paglaong ilamo, bac taa, pasram dom ilamo ka kadha chính trị piah paglaong ilamo di drei saong ngak salah siam dom bruk ngak hu jao piah dang tame kapul di Đảng”.

 Mai mang bhum palei hu rilo mikva bangsa takik abih di tỉnh Sóc Trăng, dalam dom thun tapa, Pakat Đảng ban sit Vĩnh Châu tuk halei jeng paglaong bruk cak rok patagok đảng bhum mikva bangsa takik saong hu brei thau ini ieu lac bruk ngak yaok harei, hu makna praong. Di ini hu labaih 4.200 urang đảng, dalam nan hu labaih 1.700 urang đảng ieu lac urang mikva bangsa takik.

Tui Phó Bí thư Thị ủy Vĩnh Châu, Phan Thị Xinh Hưởng, urang đảng lac urang bangsa takik, dom urang ini gam lac dom urang hu angan je, gam lac dom urang ba akaok nao dahlau, dom kreih camin dalam bruk peih ngak dom danak dak bruk ngak cách mạng di bhum palei, abih di nyu nan lac dalam bruk padang ngak palei pala bahrau. Phó Bí thư Thường trực Thị ủy Vĩnh Châu Phan Thị Xinh Hưởng ndem mayai lac: “Sa panuac ndem mayai di dom urang đảng ieu lac urang bangsa takik meda hu lagaih biak glaong ngan haong mikva bangsa. Kayua mbuan langyah jang yau jaik taphia, tuk ndem mayai nao mai, pathau khan jeng lagaih haong mikva bangsa jang. Kayua yau nan ye, kol dahlak taong yaom biak glaong dom bruk ngak di dom urang đảng urang bangsa takik, jang yau lac bruk ngak siam lagaih, yau kreih camin, ba akaok nao dahlau dalam bruk peih ngak tui dom panuac pato tacei di ban sit dalam bruk cak rok patagok ekonomi rairah manusia xã hội”.

Ngan haong dom jalan ngak lagaih, bahrau, bruk cak rok patagok Đảng  urang bangsa takik di ban sit Vĩnh Châu hu ba mai dom bruk ngak siam lagaih. Bruk nan hu ngak cambaih tapa dom bruk ngak hu, dom dom pakat politik, dom kapul đảng khang kajap, brei mboh bruk pan akaok rahra dalam bruk patagok ekonomi, ilamo, rahra manusia xã hội, khik kajap karo nagar palei... di bhum bhum bhaok taneh riya drei./.