Hadei di tuk menek anek, sa-ai Mai Thị Trang meng thau lac, Cty TNHH Asia Garment padeih đóng jien BHXH ka drei meng labaih 2 thun dahlau. Kayua oh hu đóng BHXH, sa-ai Trang oh hu thẻ BHYT piah kaoh jien sahui ndih tapui anek, oh hu mbang tui sarak menek anek.  Sa-ai Mai Thị Trang, urang ngak di Cty TNHH Asia Garment ndom lac:“Tuk nao khám ye Cty ndom lac nao nao, blaoh mek harak tame ini cty bayar jien veik. Bo cang jaik 2 thun, anek praong hu 2 thun nao bac paje. Công nhân kan kathaot, oh ndom biai hagait hu nan ye drei biak pandik hatai. Drei kan kandah lo, mboh urang nao pathau, drei jeng ngak tui, oh thau mek hu jien hagait halei oh”.

Tal abih bilan 4/2023, Cty TNHH Asia Garment suai đóng BHXH labaih 9 tỷ 548 triệu đồng. Cty ini jeng njauk UBND TP.HCM taong phạt 150 triệu đồng. Piah “ndok sraiy” ka urang ngak, LĐLĐ quận Tân Bình hu tacei pato urang ngak harak pathau tabiak tòa. Yau nan min, hadei di sa tukvak atah nộp đơn, jaik sa ratuh urang ngak nao tòa pathau urak ini oh daok cang hu, nan ye klaak bruk pathau.

Urak ini ban raya hu 58.878 doanh nghiệp suai đóng BHXH bắt buộc. Abih tih yaom jien suai đóng di dom doanh nghiệp ini, lac labaih 4.568 tỷ đồng.

Tui kuhria dalam thun ini, BHXH TP.HCM meda pasang iek 3.174 mbang di dom labik, dom đơn vị piah taong phạt jien ka dom bruk ngak suan adat hukum gah đóng BHXH, BHYT, BH thất nghiệp meyah mboh ngak suan.  Tal urak ini, BHXH TP.HCM hu payua harak gar di 87 đơn vị tal Gah điều tra Công an ban Thủ Đức, quận, huyện gam haong panuac caong ba tabiak  kaoh tui hukum.

Tui ong Hoàng Văn Dũng, Chủ tịch Công đoàn Cty Cổ phần nhựa Minh Hùng, quận Bình Tân, bruk mek jien di urang ngak min rilo doanh nghiệp plaih njaik adat hukum, oh đóng, ngak lahik quyền lợi di urang ngak, tui nan ngak ka raidiuk di urang ngak gaok kan kandah. Ong Dũng caong lac:“Karja brei hu dom jalan ngak khang, langyah catang dom doanh nghiệp oh đóng BHXH ka urang ngak. Pagap yau suai 1 bilan ye meda ieu, pahadar, min bilan ka 2 ye brei hu jalan langyah. Bilan ka 3 brei hu dom jalan ngak yau ye pacang veik tài khoản atau trak jang lac pakauk tabiak negar langiu, oh brei nao truh labik daok”.

Pathau tabiak tòa jeng lac jalan ngak puac di abih saong glaong di abih bo TP.HCM, labik camereip abih di taneh ia hu peih ngak. Bruk “truy tố hình sự”  doanh nghiệp tavak sraiy BHXH hu peih ngak hadei di rilo mbang ieu, kakei, pahadar, payua harak ieu bayar sraiy BHXH bo oh hu.

Dom thun tapa, Pasak Tacei pato adat hukum di LĐLĐ TP.HCM hu daong ka yaok rabau urang ngak ginum biai, langyah dom meriak gauk di doanh nghiệp atau taduan ủy quyền, khik caga quyền lợi tuk urang ngak khin pathau tabiak tòa. Luật sư Trần Văn Triều, Yam ndok pasak tacei pato adat hukum - LĐLĐ TP.HCM mboh lac, dự thảo Hkum BHXH pasiam veik brei bruk ka Công đoàn saong Jabat BHXH hu quyền pathau tabiak tòa bruk gah BHXH lac bruk biak njauk. Min brei roh duah, pasang iek, adat pathau tabiak tòa án ngan saong dom labik oh đóng, suai đóng BHXH ka abih jabat BHXH. Luật sư Trần Văn Triều ndom lac: “Jabat BHXH urak ini pabak tame quyền pathau tabiak tòa tra, lac mai gilac veik hukum BHXH klak jeng lac siam, lagaih. Min njauk pabak tame dom bruk pasang iek taong abih ka BHXH. Di labik ini bahrau ndom tal bruk đóng jien min, daok bruk pasang iek ye oh ngak, njauk pasang iek taong abih janih, jhui pasang iek sa janih gah đóng jien”.

Tui BHXH TP.HCM, urang ngak meda tui iek bruk đóng BHXH yaok bilan tapa app BHXH di mangaok điện thoại atau công đoàn cơ sở. Meyah doanh nghiệp suai đóng BHXH tal bilan ka 2 lac urang ngak meda thau hu saong khan brei công đoàn cơ sở thau. Meyah bruk suai đóng oh pasiam veik hu, urang ngak njauk khan chip ka công đoàn, thanh tra lao động piah ka dom labik ini pasang iek, langyah, atau ba bruk nan tagok công an piah ieu “khởi tố hình sự’ po doanh nghiệp./.