Urak ini ia mbak di mangaok kraong ribaong dalam tỉnh hu trun khang. Taong abih dom cống pacang ia mbak tapen kraong Tiền meng ban Mỹ Tho tal huyện Cai Lậy jeng peih piah mek ia taba tame hamu. Tal tukvak ini, labaih 80 rabau ha bein phun mbang baoh, yaok rabau ha njam patam jeng hu ginup ia taba, oh layau, oh metai kayua thu, pandiak. Jaik 20 rabau ha phun durian di Tiền Giang lac janih phun mbuan metai kayua  ia mbak, min bilan ini jeng that, siam, hu baoh pablei yaom glaong. Ong Nguyễn Văn Cường, daok di xã Tam Bình, huyện Cai Lậy chreih chrai khan lac:“Thun 2023 oh hu mbak, ia meng kraong njuk tagok lac ia taba. Thun ini, hajan mai aval, ka dua lac ngin oh khang, saong karja hu daong ka bhap bini ngak rilo cống pacang. Thun ini oh njauk ia mbak, hu adei sa-ai ngak cống pacang salah blaoh nan ye thun ini chreih chrai lo, uan tabuan lo, oh daok glaih glar hagait ”.

Kayua caga hu ia taba nan ye dalam bilan thu, bein phun mbang baoh, njam patam, hu gam bhum Gò Công di tỉnh Tiền Giang jeng hijao siam, brei năng suất glaong. Abih di nyu lac dom janih baoh kayau hu angan di tỉnh pablei hu yaom glaong, urang ngak bein hu laba rilo. Ong Dương Trần Trọng Quang, Akaok UB bhap bini xã Hội Xuân, huyện Cai Lậy brei thau:“Mbang ini tabiak truh  ia mbak paje, oh njauk khat lahik kayua  ia mbak. Thun ini, yaom tani tanat, yaom durian meng 70 rabau đồng sa kg, panat jeng labaih 30 rabau đồng sa kg, jien mek tame rilo. Patei baoh menuk jeng yaom bingi, 12 rabau đồng sa kg, pala pablak haong durian, yaom biak tani tanat. Maong rah tapa, dom janih baoh kayau jeng hu yaom tani tanat abih. Pak ini hu 3 mbang hajan ye, ia taba ginup abih”.

Jak jeng dalam bruk pacang, caga  ia mbak di Tiền Giang lac meng bruk khik ia dalam ribaong bein di bhap bini. Cty Khai thác thủy lợi Tiền Giang kham merat khik iek, peih, kreik dom cống đập piah ba ia taba pabak gam gam tame kraong dalam mblang hamu. Dalam nan, cống Xuân Hòa di xã Xuân Đông, huyện Chợ Gạo harei melam mek ia taba pabak ka bruk pala drak saong ia pandar ka abih bhum Chợ Gạo- Gò Công. Nan ye, urak ini ia taba dalam mblang hamu di labik ini jeng daok hu rilo piah pruh ka jaik 20 rabau ha njam patam, phun mbang baoh. Ong Đỗ Thành Sơn, Phaok Yam ndok Cty Khai thác thủy lợi Tiền Giang brei thau:“Yaom lac tukvak ini daok salih tapa bilan hajan min cống dalam mblang hamu mek hu ia nan ye tabiak truh di mbak ye. Thun ini Cty thủy lợi njauk caga mek ia, kayua cống Xuân Hòa oh mek ye bhum Gò Công oh hu ia. Meng Tết tal urak ini jeng khik iek miat luac harei melam, harei halei jeng parabha gauk ngak jeng 2 ka, yaok ka hu 10 urang”.

Langiu di nan, 6 danak dak thủy lợi tapen kraong Tiền hu tỉnh haong Mintri ngak nong saong patagok palei pala buh jien tame ngak, daok hu ngak samar piah ngak salah dom pabah cống piah pacang ia mbak, khik ia taba. Danak dak cống âu kênh Nguyễn Tấn Thành jeng hu ngak salah đập "dã chiến" pacang jalan ia nduac piah pacang ia mbak njaom tame gah dalam.

Urak ini jaik yam tame bilan hajan, meda ndom lac bruk pacang caga ia mbak thun ini di Tiền Giang hu siam lagaih. Tapa ilamu dalam bruk ngak saong tapa sami samar dalam dom jalan ngak, karja saong bhap bini Tiền Giang hu caga siam ka bruk pala drak saong ka raidiuk bhap bini./.