Tui kuhria mboh dahlau lac tabung jit ruak tangin takai cambuai meda tal aval jang saong rahtabiak trak damak jang dom thun dahlau, dom urang ilamu jeng daok huac lac mbuan hu jit kateik mangaok jit kayua rauk pandiak tabiak darah jeng jaik tame tukvak patagok dom urang ruak. Kayua yau nan ye njauk hu jalan ngak piah langyah bruk tapa prein pacang caga ruak tuk dom urang ruak tangin takai cambuai ba gauk tagok taong ruak di TP.HCM. Kadha vak di urang vak Kim Dung hu ndem ka bruk ini:

 Tui PGS.TS.BS Phạm Văn Quang, Akaok Khoa Hồi sức tích cực pacang caga njauk jru mek, di Sang iek ruak Nhi đồng 1 TP.HCM, 5 thun tapa meng di tuk hadei di mbang tamuh jit 2018, dom urang ruak tangin takai cambuai trak biak takik hu. Min thun ini hu bruk rahtabiak di janih Enterovirus 71 (EV71) ngan haong bruk njom pambak biak samar saong jru mek biak trak damak daok tagok glaong. Di sang iek ruak Nhi đồng 1, dom urang ruak tangin takai cambuai trak daok tagok tal 2,5 mbang dut saong tukvak ini di thun blaoh, yaom lac dom urang ruak oh rilo. Di pak ini hu mboh 4 urang ruak metai. Meng dom tinh, ban karei ba mai.

 Adit blaoh, Khoa Hồi sức tích cực pacang caga njauk jru mek di Sang iek ruak Nhi đồng 1 hu taduan 10 urang ruak tangin takai cambuai dalam tuk biak trak damak, njauk suak yava meng mac, daong baoh hatai, dalam tuk 2 adit blaoh oh hu urang ruak trak njauk hồi sức.

  “Dalam  2 tal 3 adit ini hu taduan rilo urang ruak trak. Dom urang ruak tangin takai cambuai daok tagok glaong saong tabung jit meda laik tame bilan 7, min tuk nan meda njauk haduh hatai kayua tame bilan hajan, mbuan rahtabiak jit ruak pandiak tabiak darah. Di TP.HCM, urak ini ka oh hu urang halei ruak trak ba tal metai, min dom adit anak tal meda tui kuhria lac hu, kayua di dom tinh, ban tuh mai, tuk uranaih padeih hè di palei mai gilac ban raya saong dom sang khik iek uranaih camriep hu peih ngak gilac veik”.

PGS.TS.BS Nguyễn Vũ Trung, Akaok Viện Pasteur TP.HCM jeng daok haduh hatai tuk jit ruak tangin takai cambuai daok rahtabiak sarau kadau dalam tuk dom urang ruak di dom tinh, ban daok tagok glaong. Bruk pasang iek di bhum gah maraong negar jeng hu mboh labaih mateh mẫu ruak tangin takai cambuai lac janih chủng Enterovirus 71 (EV71).

“Tapa pasang iek, gam haong pathau khan, meda ndem lac thun ini ruak tangin takai cambuai meda rahtabiak sarau kadau. Kayua urak ini, dom urang ruak trak daok tagok jang. Tapa harak gar, kol drei mboh lac tukvak camereip meng thun 2011-2012, hadei di nan lac 2015, 2018 saong tal urak ini ye jeng lagaih haong sa tukvak jaik 3 thun di jit ruak ini. Abih di nyu nan lac hadei di jit ruak COVID-19, dom bruk ngak kinh tế-xã hội jeng chreih chrai siam makre gilac veik”.

  Jeng tui Viện Pasteur TP.HCM, gah Maraong negar hu labaih 9.000 urang ruak tangin takai cambuai dalam 5 bilan akaok thun, tui kuhria hu labaih 400 urang ruak yaok adit, bier jang 45% dut saong tukvak ini thun 2022. Min dom urang ruak bahrau tui kuhria daok tagok meng bilan 4 tal urak ini. Dalam nan, njauk caik hatai lac dom urang ruak trak saong dom urang metai kayua njauk ruak tangin takai cambuai daok tagok saong glaong jang tukvak ini thun dahlau.

Taeng di TP.HCM, dom urang ruak tangin takai cambuai tagok jaik 150% dalam sa bilan tapa, dalam nan hu rilo urang ruak trak.  

 “Meng lavik mai 3 sang iek ruak uranaih taong ruak ka dom tinh, ban dalam bhum gah maraong, taong ruak pandiak tabiak darak di uranaih. Min dalam tuk Sang iek ruak ruak nhiệt đới hu gam chuyên khoa uranaih saong njom ruak, kayua yau nan ye bruk ieu kakei Cục iek ruak, taong ruak parabha veik dom gah piah ka Sang iek ruak ruak nhiệt đới jeng hu mbaok tame bruik pato tacei ka gah iek ruak di tangin takai cambuai saong ruak pandiak tabiak darah di uranaih”.

 Meng akaok thun tal urak ini hu 7 uranaih metai kayua ruak tangin takai cambuai di gah mraong negar. Gah y tế brei thau lac urang praong thun jeng meda lac urang ba ruak njom mbak ka uranaih bo oh drei oh thau. Kayua yau nan ye, langiu di bruk taong ruak ye dom tinh, ban njauk hu jalan taong ruak caga dahlau di dom labik y tế tư nhân, bhum palei; pathau khan ka rahra njauk caik hatai ka bruk pacang caga jit ruak saong jalan thau lac ruak samar drah./.