Meyah dom thun dahlau di Bình Dương, hadei Tết oh kan piah mboh bruk urang dang jeng talei atah pan harak nao likau bruk, cang doanh nghiệp pilih ruah tame ye urak ini joa menuac. Dalam tuk nan, dom doanh nghiệp peih praong bruk ngak, atau bahrau padang daok caong hu rilo urang ngak.

Jeng meng bruk yau nan bo doanh nghiệp gaok kan kandah dalam pilih ruah. Piah ka urang ngak thau saong mai nộp harak gar, doanh nghiệp hu tauk harak pilih ruah anak pabah mbang cty, atau caik bảng pilih ruah di akaok jalan tame dom labik ngak kong.

Ong Phạm Văn Ngà, iek gah menuac ngak di Cty nội thất The One dhar Bình Dương brei thau, thun ini Cty hu rilo labik pambuak bruk blei pandap nan ye caong hu 100 urang ngak. Dalam harei 10 bingun Tết, menuac ngak di Cty parabha jeng 2 kapul dang di labik ngak kong Đại Đăng (ban Thủ Dầu Một) saong Nam Tân Uyên (ban Tân Uyên) min bahrau pilih ruah hu takik menuac.“Meng mesup tal tuk ini, daok la ini, bahrau hu klau pak urang mai tangi sua , duah thau, ndom lac oh thau drei ngak hu halei oh, min drei jeng taduan harak gar di urang. Meda lac menuac di palei oh ka tagok nan ye takik menuac likau bruk, bhian di nyu meteh bilan hadei Tết urang meng tagok ginup. Tui nan tapa bilan 2 Cty meng pilih ruah hu ginup menuac”

Daok ngan saong Cty TNHH Dũng Hào, mbang ini Cty caong hu 200 urang ngak ka chuyền ngak bahrau. Min meng harei 6 bingun Tết tal urak ini bahrau pilih ruah hu 30 urang. Urak ini, menuac ngak di Cty jeng daok kham merat pilih ruah ginup piah doanh nghiệp tani tanat bruk ngak.

Rilo bruk ngak min takik urang ngak nan ye di Bình Dương oh daok mboh bruk doanh nghiệp pilih ruah catang urang ngak yau dahlau daih. Ini jeng lac jalan lagaih ka urang ngak oh ka joi bruk ngak, urang ngak praong thun. 

Sa-ai Lê Thị Thuận (palei daok di Bình Phước) brei thau, dahlau di nan sa-ai pablei salih sit sot di palei min urak ini pablei salih catang lo nan ye mai Bình Dương duah bruk ngak. Sa-ai oh caong hagait rilo, tok hu bruk ngak, hu jien bilan tani tanat piah kuhria ka anek mbang bac:“Jien bilan Cty brei du halei ye thau du nan, oh ndok hagait tra. Urak ini daok cang, meyah urang mek drei tame ye drei ngak, daok urang oh mek ye drei nao duah bruk karei, urak ini bo nao veik Bình Phước pablei salih jeng catang. Drei nao ngak ye drei kham merat ngak”

Tui kuhria mboh di Sở Lao động – Thương binh saong Xã hội tỉnh Bình Dương, thun 2024, dalam tỉnh hu 8.000 doanh nghiệp pilih ruah labaih 60.000 urang ngak. Dom bruk caong hu rilo urang ngak, lac bruk menyim, jhik, điện tử; ngak pandap meng kayau… Meng nan brei mboh bruk bui sambai tuk dom doanh nghiệp daok hu bruk ngak gilac veik. 

Piah daong ka doanh nghiệp hu menuac ngak, Sở hu tacei pato Pasak Dịch vụ Bruk ngak tỉnh duah thau bruk ngak daok kurang menuac ngak di dom doanh nghiệp piah khan brei urang ngak thau. Gam haong nan, patagok bruk peih mbang giao dịch bruk ngak tapak, peih online pambuak bruk cung - cầu urang ngak. 

Ong Phạm Văn Tuyên, Phaok Yam ndok Sở Lao động – Thương binh saong Xã hội tỉnh Bình Dương brei thau, urak ini, Pasak Dịch vụ Bruk ngak hu pambuak bruk khang kajap haong dom pasak dalam taneh ia, tapa nan hu ba dom menuac ngak meng dom labik karei mai Bình Dương: “Kol,dahlak hu pambuak bruk haong doanh nghiệp daok caong hu urang ngak, jeng yau dom doanh nghiệp cakak meneing menuac ngak piah ba tapa dom labik caong hu urang ngak ka nyu lagaih, pabak hu bruk. Urak ini, kol dahlak hu jalan pambuak khang kajap haong labik pato bruk ngak, sang bac đại học pak nan piah ka anek saih, sinh viên bac tamat hu mbaok tame bruk pilih ruah di doanh nghiệp.”  

Dom menuac ngak mai tỉnh Bình Dương duah bruk oh rilo, brei mboh bruk salih nao mai urang ngak di dom tỉnh, ban hu labik ngak kong nyu pambak tal tỉnh ini. Piah ka urang ngak mai ngak bruk ka dom doanh nghiệp di Bình Dương ye brei hu sarak biak siam. Daok ngan saong tỉnh Bình Dương jeng brei hu jalan ngak piah dui pachreih, khik takai urang ngak./.