Kol dahlak mai tal đồn biên phòng Lai Hòa tuk biar harei, lac tuk dom adei sit urang Khmer daok caga tame bac. Angaok tangin dom adei hu pan siphau, kalam… tame bac akhar haroh Khmer kayua Đồn Biên phòng peih pato. Yau bhian randap, dahlau di tuk tame bac, dom adei ba gauk puh bah tal bac hacih sa-at. Sap kẻng taong tagok, jaik 40 anek saih yam tame tal bac. Thiếu tá Sóc Đúng, Chính trị viên phó đồn biên phòng Lai Hòa, BĐBP Sóc Trăng khan lac: " Bruk kol dahlak peih tal pato sap Khmer ka dom adei anek saih tuk padeih hè di labik khik iek di drei, nyu mai meng bruk jak ba bhap bini di BĐBP jeng yau di Đồn Biên phòng Lai Hòa. Ka 2 lac brei mboh hatung hatai di urang jakar, urang lin Đồn Biên phòng Lai Hòa dalam bruk ba gauk daong dom adei bac ta-a paglaong ilamu ndom puac sap bangsa di drei. Kol dahlak thau lac, ini bruk biak hu yaom glaong dalam bruk hu mbaok haong karja palei peih ngak dom bruk ka dom adei tuk padeih hè".  

Piah daong palagaih ka anek saih bhum tapen negar hu ba drei tame me-in, bui sambai, hu bac sap bangsa lac sa jalan ngak hu Mban khik ramik baha Prêy Chóp pambuak haong Đồn Biên phòng Lai Hòa, saong Jabat Pato Megru ban sit peih ngak di tuk padeih Hè. Kuhria tal harei ini, tal bac peih hu 3 thun, pato pakai tui danak dak bac sap Khmer tal 1 saong tal 2, kayua Jabat Pato Megru ban sit Vĩnh Châu ba tabiak. Thiếu tá Huỳnh Nét, Akaok kapul kapal gilai, đồn Biên phòng Lai Hòa, BĐBP Sóc Trăng, gru pato sap Khmer ka dom adei sit, brei thau: " Tuk đơn vị peih tal pato sap Khmer ka dom kamuan dalam palei ye dahlak lac gru pato dom kamuan, meng nguyên âm, phụ âm..., duah thau piah pato habar ka dom kamuan mbuan thau, mbuan kanal".

Danak dak pato pakai tal bac akhar haroh Khmer hu 68 asal kadha hu parabha jeng 4 adit bac, yaok harei bac meng 5 tal 6 asal kadha dui pachreih hu dom adei rilo umo thun, rilo pakat bac karei gauk. Adei Thạch Lâm Gia Linh, anek saih tame bac akhar haroh sap Khmer di Đồn Biên phòng Lai Hòa brei thau: " Thạch Lâm Gia Linh: Ini lac thun ka 3 anek bac di labik ini, gru pato mbuan thau, hu me-in rilo kadha. Langiu di nan, anek daok hu bac ka sajarah di Đồn Biên phòng, dom ilamu diukrai".

Di bhum taphia negar tasik dalam xã Lai Hoà, raidiuk daok rilo kan kandah, ngan saong anek kamuan urang bangsa Khmer, hu bac akhar, haroh, sap di bangsa drei, hu bac ilamu diukrai meng dom Gru quân hàm hijao di Đồn Biên phòng Lai Hòa pato pakai lac biak uan tabuan. Urak ini dom tal bac peih tabiak hu 3 thun ini mai, hu daong ka dom adei anek saih menyai, pang, thau saong cih vak hu siam sap bangsa drei. Ong Thạch Chanh Sà Vy, hu anek bac akhar haroh Khmer di Đồn Biên phòng Lai Hòa brei thau: " Labik ini atah tal bac di baha, njauk di nyu lac hu bac di baha, min nyu atah lo, đồn biên phòng peih tal pato ini biak siam, daong ka anek kamuan hu nao bac. Langiu di pato akhar haroh, đồn daok hu pato rilo ilamu diukrai, drei daok gah langiu maong tame mboh lac biak siam".

Di Lai Hòa, urang bangsa Khmer hu biak rilo nan ye bruk pato akhar haroh Khmer ka dom adei lac biak siam. Bruk Đồn Biên phòng Lai Hòa daong labik saong menuac piah peih tal pato akhar haroh Khmer pak di đơn vị hu mikva saong dom ong bhik pachreih tui. Ong Lý Vanh Ny, Chuyên viên Jabat Pato Megru ban sit Vĩnh Châu brei thau: "Meng bruk lac yaok palei hu dom kan kandah, dalam nan kan kandah di abih lac xã Lai Hòa, meyah dom adei nao meng sang tal baha lac oh mbuan, nan ye meng bruk sangka di urang dang akaok Đồn Biên phòng Lai Hòa hu pambuak bruk haong Jabat Pato Megru ban sit peih tal pato ka dom anek saih urang bangsa dalam tuk padeih hè, jeng lac piah patagok ilamu bangsa Khmer".

Dom sap bac akhar haroh bangsa Khmer di dom adei anek saih dalam tal bac dak brei mboh bruk sangka di đơn vị hu mbaok di labik taphia negar tasik ngan saong bhap bini bangsa takik, pamaong tal paglaong ilamu, akaok sahneng, ba gauk khik ramik sap ndom, panuac puac, akhar vak, haroh cih di bhap bini bangsa, gam haong nan, kak kajap bruk jum pataom gauk di urang lin haong rahra labik taphia negar, tasik, pulao./.