Dalam tal bac ini, urang sit umo di abih lac 30 thun saong urang praong umo di abih lac 76 thun. Yaom lac gaok rilo kan kandah min 60 urang di 3 tal bac jeng hu gam sa hatai caong khin, nan lac thau puac, thau vak. Amuk Lý Thị Mai Khanh, daok di xã Xuân Hải, huyện Ninh Hải ndem lac: “Tuk dahlak daok sit biak kan kandah lo, nan ye drei oh hu nao bac. Drei biak takre nao bac lo…”

Meng harei peih tal bac ini, dom urang bac yau ye amuk Tài Thị Mai Sum  takik hu mbang halei padeih bac. Kayua praong thun, bruk bac taa gaok rilo kan kandah nan ye tal melam bac, amuk jeng nao bac aval jang piah pasram paoh akhan, pathram veik kadha bac klak. Tok jaik 3 bilan tui bac, urak ini amuk Sum vak hu saong puac hu dom anek akhar. Amuk Tài Thị Mai Sun brei thau: “Praong thun paje nao bac drei caong thau hu akhar huroh yau dom urang karei. Tuk bahrau tame bac oh thau hagait…”

Thun ini umo 76 thun,  amuk Đạo Thị Nét lac urang bac praong thun abih di tal bac ini. Amuk brei thau, dahlau deih kayua sang kan kandah nan ye oh hu nao bac, oh thau akhar haroh. Yaok bruk pambuak tal harak gar jeng ieu gauk gar, dom urang jaik taphia daong brei. Thau lac hu tal bac palahik bruk oh thau akhar huroh hu peih tabiak di dalam palei, amuk mai tut angan tame bac. Urak ini amuk Đạo Thị Nét eng drei vak hu angan di drei, bruk meng dahlau mai amuk oh ngak hu: “Drei likau nao bac piah thau akhar huroh. Drei umo 76 thun meng hu nao bac piah thau akhar…”

Tal bac palahik bruk oh thau akhar huroh ka rahra daok di xã Xuân Hải, huyện Ninh Hải hu peih tabiak meng bilan 7 meng blaoh. Urang bac lac dom urang biak karei, rilo meng lac dom urang umo praong thun. Dom urang ini daok kham marat vak akhar saong paoh akhar, dom urang ini jia lac tal tuk halei drei meda thau puac, thau vak yau anek kamuan di drei. Nan lac makna bo amuk Đào Thi Mỹ Thanh saong yaok urang oh huac glaih glar mai tame tal bac di tuk melam:  “Drei mai bac piah thau akhar. Drei biak uan tabuan lo tuk anai gru pato ka drei. Drei caong hu nao bac piah thau akhar yau dom urang karei…”

Sang bac Tiểu học, THCS Mai Thúc Loan hu rami ramik yaok tal bac hu 2 gru pato, sa gru dang pato saong sa gru daong bruk. Dom gru pato jeng lac urang Cam daok pato pak sang bac. Anai gru Tài Nhị Chinh brei thau: prein dui pachreih piah ka dom gru pato kak kajap haong tal bac nan lac bruk kham marat di urang bac. Kayua yau nan ye, tok hadei di tukvak katut bo rilo urang bac thau puac, thau vak, thau cộng trừ, nhân chia: “Tuk pato ye dom urang bac rilo meng lac urang umo praong thun. Tuk bahrau pato ye gaok biak rilo kan kandah…”

Yaom lac dom tal bac palahik bruk oh thau akhar huroh camriep hu UBND xã Xuân Hải, huyện Ninh Hải peih tabiak dalam thun 2023 min hu ba mai dom jak jeng siam lagaih. Tal bac hu bruk njauk hatai, pachreih tui di rahra. UBND xã Xuân Hải, huyện Ninh Hải daok kham marat khik ramik saong paglaong tanut palahik bruk oh thau akhar huroh di puk palei, tui jalan ba tabiak lac labaih 99,5% urang dalam umo meng 15 thun tagok puac gheih, vak cambaih sap Yuan piah rik tame paglaong ilamo ka bhap bini di pak ini./.