Tuk bilan pandiak ini, yaok harei meng page mesup harei Som tal harei Suk dalam adit, 40 adei sit hu sang kan kandah di palei Trol Đeng, ban sit Chư Ty, huyện Đức Cơ chreih chrai mai tal tal bac di sang bac palei. Yaom lac dom adei sit umo 6 thun atau dom sa-ai praong umo 10 thun, thei jeng chreih chrai haong tapuk, mbut, kalam haong dom tukvak bac pablak haong tukvak me-in. Adei Rơ Mah H’xiêu, umo 7 thun, daok di palei Trol Đeng, ban sit Chư Ty, huyện Đức Cơ, brei thau.

“Anek bac tal 2, nao bac hu me-in dom kadha me-in, nai gru pato anek bac, anek nao bac dalam bilan hè anek mboh biak bui sambai”.

Daok adei H’Nhi Ê Ban, umo 10 thun mboh khang hatai jang tuk hu mbaok tame tal bac.

“Thun ini anek tagok tal 5, nao bac mboh biak bui sambai, hu pang nai gru pato bac, anek biak takre nao bac yau ini”.

Nai gru Nông Ngọc Huân, (gru pato Sang bac THPT Lê Hoàn, huyện Đức Cơ) lac 1 dalam dom gru pato halan tian pato bilan hè ka dom adei sit palei Trol Đeng. Pak ini, nai gru pato ka dom anek saih sit pak ini meng vak akhar, cih haroh, bac paoh akhar tal ngak dom kadha katih mbuan. Nai gru Nông Ngọc Huân brei thau, drei mboh biak bui sambai tuk dom adei sit di bhum kan kandah naih joi tapa yaok var bac.

“Dom adei tame tal 1, dom nai gru sangka pato tacei dom adei puac haong vak, gam pabak ka dom adei dom ilamo daok dang dalam raidiuk. Dom adei praong jang ye puac haong vak siam jang, min piah ka dom adei hu ba drei tame haong khang hatai ye dom nai gru hu dom kadha pasram karei, hu dom bruk ngak piah dom adei meda pasram ilamo daok dang. Mboh dom adei siam mekre naih joi jang biak rilo, bui sambai jang, hu mbaok tame dom bruk biak chreih chrai”.

Tui nai gru Lê Thị Xuân, urang đoàn di Kapul dam dara ban sit Chư Ty, Huyện Đức Cơ, yaom lac kan kandah, kurang rilo janih, nao bac di dalam hajan angin min dom adei jeng biak tari taring nao bac. Tal bac saoh bilan hè di palei Trol Đeng oh njauk tok ba mai dom ilamo ka dom anek saih bo daok ba mai ka dom urang dam dara halan tian hu ba drei tame, hu daong bruk bol bhap rahra saong hu praong jieng menuac, jeng urang.

“Dalam bruk pato pak ini ye dahlak mboh dom adei biak chreih hatai, abih drei, yaom lac langik hajan, angin min dom adei jeng tal bac ginup, nao bac gaok tuk mai daok hu ba adei tui. Dom adei daok kurang biak rilo janih min mboh hatai caong bac ta-a di dom adei biak siam. Dahlak caong lac danak dak ini hu khik veik dalam bilan hè thun hadei”.  

Sa-ai Lê Thị Thu, Bí thư Đoàn Dam dara ban sit Chư Ty brei thau, tal bac bilan hè hu peih tabiak di palei Trol Đeng lac tal bac iek dahlau di dom dam dara ban sit dalam bilan hè ini. Kapul kham merat khik veik danak dak di dom thun hadei piah daong ka dom adei bhum kan kandah hu bac ta-a, ngak bui me-in sambai saong patagok abih gah. 

“Dom urang đoàn hu rilo kham merat piah jak ba dom adei mai bac, pato ka dom adei akhar haroh, ilamo, daok dang dalam raidiuk. Kapul dam dara jang jak ba dom urang daong jien, daong pandap panda piah ka dom adei tuk tabiak me-in yaok urang hu sa pa-op ia tasau, daong tapuk, khan ao klak saong dom kaya pandap duh ka bruk bac ta-a, ngak jeng labik bac ta-a saong me-in bui sambai  siam mekre salamat ka dom adei”.

Meng tal bac daok kurang rilo janih min ndung bak anit ranam, dom adei sit bhum kan kandah hu daong prein saong hatai jia piah yam tagok. Ngan haong dom dam dara halan tian, yaom lac tok dom var pato sit min hu ba mai rilo ilamo saong jeng menuac jeng urang jang tuk thau rilo ka raidiuk bhap bini bhum atah bayah./.