Bruk tangi sua mik va bangsa takik dalam palei biak caik hatai sangka 

Dom bilan ni mai, urang jakar, urang lin Kapul jak ba bhap bini, Đồn Biên phòng La Êê, huyện Nam Giang salih gauk mai tal sang saai Blúp Út, daok di palei  Đắc Ngol, xã La Êê tacei pato bruk ngak val ro, peih bruk rong pabui jhuk pajaih palei. Sang saai  Blúp Út dahlau deih lac sang biak kan kandah, rai duik pagam pambak tame hamu apuh. Meng hatai caong tabiak truh kan kathaot, saai khang hatai mesraiy phun jien di gilang pariak sarak karja blei sa gu pabui pajaih mai rong, gam song bruk ngak alak piah mek pandap mbang ka pabui. Lavik lavik harei, saai peih prong bruk rong pabui  tagok  15 bloh  20 drei. Min, kurang ilamu dalam bruk rong glang , nan ye, tapon pabui njauk jit ruak, suai prong. Đồn Biên phòng La Êê hu brei urang jakar, urang lin mai tal sang, daong ka sang saai padang val ro hacih saat, kuhria caga pandap mbang ka pabui. Saai Blúp Út khan lac:

“Bộ đội tacei pato hulin lac brei puh ramik hacih saat, tuk cakak patei ka pabui mbang lac brei pa-auk patei song sara i ốt song paok men ka pabui mbang, piah pabui oh pandik tian. Dom urang lin Đồn Biên phòng La Êê jeng bhian mai tal sang, abih hatai dong song hu panuac kakei, pato dahlak .”

Đồn biên phòng La Êê hu brei bruk khik iek labaih 35 km jalan tapen negar, daok dalam 2 xã La Êê song  Chơ Chun, huyện Nam Giang, tỉnh Quảng Nam. Ni lac 2 xã atah bayah di abih, kan kandah di abih di  huyện Nam Giang, bhap bini jiak abih lac urang Cơ Tu, Ve, Tà Riềng, diukrai pagam pambak tame hamu apuh. Yaok thun, Đảng ủy Đồn biên phòng La Êê hu brei urang jakar, urang lin di pak ni, dong ka boh sang biak kan kandah tabiak truh kan kathaot. Dom bruk ngak jeng hu Đảng ủy Đồn biên phòng La Êê  pambuak song karja palei padang ngak ka nyu lagaih hong bruk di anak meta, lagaih haong bruk di mik va dok pak ni yau ye: pala padai ia, rong pabui pajaih palei, menuh, ada, pala dom janih phun mbang boh yau kruac “cam vinh”, kruac bhung… Thiếu tá Tôn Ui, Chính trị viên phó Đồn Biên phòng La Êê, huyện Nam Giang brei thau:

“Kol dahlak thau lac ngak brei kajap meng sit, oh ngak praong rilo. Kol dahlak nao tapak tal yaok boh sang, tacei pato urang jalan patagok  kinh tế, bo pataom tame urak ni lac rong pabui jhuk, menuh , ada, bloh pala dom janih phun lavik thun, phun mbang boh.”.

Meng bruk dong abih drei di urang jakar, urang lin  biên phòng, thun bloh, dalam 2 xã La Êê, Chơ Chun hu  22 sang tabiak truh kan kathaot, dom boh sang kan kathaot di  xã La Êê trun dok  31%, xã Chơ Chun  dok jiak  38%. Ong Zơ Râm Huấn, Bí thư Đảng ủy xã La Êê brei thau, oh lac ngak siam bruk khik caga chủ quyền an ninh tapen negar, urang jakar  , urang lin  Đồn Biên phòng La Êê dok lac labik pambak tame khang kajap ka bhap bini dom bangsa di bhum glong, bhum tapen negar Nam Giang:

“Đảng ủy Đồn Biên phòng La Êê peih ngak danak dak ba urang đảng mai  ngak bruk di dom  chi bộ palei song brei bruk dong ka dom boh sang, abih di nyu nan lac dong ba dalam bruk patruh eik patrun kathaot khang kaja. Tacei pato mikva pandar ilamu  kỹ thuật dalam bruk pala drak, rong glang, abih di nyu nan lac dalam bruk rong glang, patagok bruk sản xuất, pala phun padai ia.”

Tui Đại tá Hoàng Văn Mẫn, Chính uỷ, Bộ Chỉ huy Bộ đội Biên phòng tỉnh Quảng Nam, urang jakar, urang lin tuk halei jeng nao gam song bhap bini, hu mbaok di puk palei, dong ka bhap bini patagok  kinh tế, patruh eik patrun kathaot khang kajap. Gam song nan, jak ba jien padai padang ngak jiak  300 sang paprong jum pataom, Sang ka urang kan kathaot labik tapen negar , gam song yaok rituh danak dak  dân sinh,dong yaok ribau drei menuh ada, athur rong. Dom urang lin biên phòng pak ni tuk halei jeng sahneng lac, bhap bini rahra hu rai duik trei si, haniem phol, ye an ninh trật tự di pak ni hu khik kajap; tệ nạn xã hội hu kadun likuh ; chủ quyền an ninh tapen negar hu khik kajap./.

Urang lang: Hanipha- 18/4