Di ala binguk pandiak masup page di dom harei akaok thun bahrau, urang taha palei angan Đinh Chuyên di palei Mơhra-Đáp, xa Kông Lơng Khơng, huyen Kbang, tinh Gia Lai tani tanat mbeik yava ragam ka dom baoh kong caing klak di palei. Ong brei thau, dom baoh caing ini hu pagam haong palei labaih sa rituh thun, la sa pandap hu yaom glaong hu ong ame caik veik. Yaok page, ong jeng caik tukvak pasram haong dua kapul caing di palei, abih di nyu nan lac kapul dam dara piah duh ka tuai damuai jaik atah dalam tukvak thun bahrau.

"Taong abih mikva urang bangsa Ba Na di ini sahatai ndua dhar phol Ndang saong Karja hu daong brei kein lagaih ka mikva bangsa di ini hu patagok bruk jirah rivang bhap bini, bruk hu meng nan mai khol dahlak hulin oh ka thau tal. Urak ini, tuk hu bruk jirah rivang paje ye khol dahlak hulin pato tacei anek taco ka bruk taong paoh kong caing ka njauk ragam ragu piah duh ka jirah rivang saong khik ramik ilamo meng kal di bangsa drei”.

Piah patagok bruk jirah rivang, mikva pak di ini hu mbaoh tame tal pato pakai bruk ngak, pabak ilamo ka bruk jirah rivang bhap bini kayua huyen peih ngak. Hu yau nan meng, pandar hu siam lagaih gheih dalam bruk patagok bruk jirah rivang bhap bini. Sa-ai Đinh Phớt, rahra di palei brei thau:

"Hadei di tuk hu jalan ngak jirah rivang bhap bini ye meng taha palei tal mikva dalam palei biak chreih hatai, meng di nan palei hu padang sa kapul kong caing, sa kapul menyim papar khan bai, sa kapul sarak saong sa kapul raok ba tuai damuai jirah rivang mai me-in. Tong Abih bruk ngak ka jirah rivang kol dahlak hulin hu bac tangi meng labik karei. Dom ndap nda jirah rivang daong hu tagok jien mek tame ka rahra”.

Bruk ngak jirah rivang bhap bini di palei Mơhra-Đáp daong brei ka tuai damuai maong parang iek urang me-in kong caing, duah duah thau khan damsang, ba drei tame menyim jih dalah saong mbang pandap janih kaya glai ceik urang bangsa. Sa-ai Đặng Ngọc Huy, tuai damuai meng Ban raya Ho Chi Minh taong yaom glaong bruk khik jaik daok tamo dalam ilamo bangsa di palei:

 “Dalam tuk dom labik karei kham merat padang ngak bahrau dom janih ilamo bangsa mboh di daok khik ramik hu yaom kaom ilamo di bangsa drei, gam meda hu dom yaom kaom, tanut chuan njauk piah duh ka tuai damuai jirah rivang palei di dalam harei hadei”.

Mboh hu janih kadha brei ka patagok bruk jirah rivang, UB Bhap bini huyen Kbang hu ba Mơhra-Đáp tame bruk kuhria buh jien tame haong bruk padang gilang khik drap ar sinh thai dalam bol bhap bangsa Ba Na. Danak dak ini daok dalam Danak dak khik ramik, paglaong yaom kaom ilamo meng kal pagam haong patagok bruk jirah rivang tukvak 2021-2025. Ong Nguyễn Tấn Thành, Akaok Kapul Jirah rivang tinh Gia Lai, hu panuac ndom mayai lac:

 “Tui dahlak hulin piah ka gah jirah rivang bhap bini, jalan ngak bruk jirah rivang bhap bini patagok dalam labik tinh piah mbuan si ngak, piah hu lagaih ye tinh saong huyen njauk taong yaom gilac bruk ngak palei jirah rivang bhap bini Mơhra-Đáp piah dalam tukvak meng blaoh hu mboh bruk gheih ghang siam lagaih lac hagait, bruk oh ka siam lac hu hagait piah pambak tui di nan blaoh langyah, taong yaom piah pasiam veik jalan ngak di bruk ini”.

Ngan haong dom kham merat khik ramik saong paglaong ilamo bangsa yau meng kal, palei Mơhra-Đáp daok dak harei dak jeng sa labik siam gheih dalam harak jirah rivang bhap bini di Tay Nguyen. Ini oh lac labik tuai damuai duah tal piah duah thau ilamo bangsa Ba Na blaoh daok brei mboh ka bruk pambuak samu yau gauk di dalam bruk khik ramik ilamo saong patagok bruk jirah rivang karo kajap./.