Bruk  tảo hôn jeng dok lac bruk duh hatai gam saong rilo kadha oh siam

Dalam balik sit oh ka tal 8m2 di palei Ea Sin, xã Ea Sin, huyện Krông Búk, tỉnh Đắk Lắk, H’Qui Niê dok kham palua anek sit umo 3 thun, angaok thei dok mbat candaih băng patrun pandiak. Lavang lavah, mbaok meta hajao dalam blah aow panak, H’Qui biak taha dut song umo 18. Adei kamei angan H’Ngân Niê, umo 15 thun, jeng glaih glar oh lah hagait saai di drei, tuk bahrau menek anek kacua hu labaih sa bilan. 2 adei saai jeng khin likei meng umo 15 thun, urak ni, aih oh ye bruk nyu salah blaoh.“Meyah brei palih ruah veik ye adei dong ka boh sang dahlau, blaoh meng khin likei, tok pasang umo sit ye rambah anek bhik kayua oh thau saong oh hu jien rong anek, urak ni, bruk salah blaoh ye ndom hagait jeng oh hu”, “Adei dok bac tal 6, kayua sang kan kandah nan ye adei tok pasang. Mboh ayut sahabat nao bac , adei menek anek, iek anek medeih lavik melam jeng mboh duh hatai”. 

Aih oh nan lac bruk di dom gu duik pasang di Đắk Lắk tok gauk tuk oh ka ginup prong. Raidiuk bui sambai chreih chrai gam haong rilo jalan siam lagaih ka rai duik, ka bruk ngak yau krek veik. Dom anek kamar patui gauk tabiak rai ngak ka dom adei lahik nao umo anek naih, bo yam tagok tapak jeng urang praong.

Muk Phạm Ngọc Diệp, urang jakar pathau khan dân số kế hoạch hóa gia đình xã Ea Sin brei thau, muk biak pandik harao ka bruk tảo hôn di pak ni, min, oh thau ngak yau habar piah pacang veik. Kayua lac tuk thau hu ye bruk nyu salah blaoh. Gaok mai, tal tuk dom duik pasang ranaih, nao ngak khai sinh ka anek, tuk nan karja meng thau.

Tui thạc sỹ Lý Thị Say, Vụ địa phương 2 (Ủy ban bangsa), bruk tảo hôn tuk halei jeng lac kadha kan langyah dalam bhum bangsa takik. Yaok thun, Rajaei hu buh oh takik jien ka bruk pathau khan, piah patrun patakik bruk tảo hôn, min, tal tuk peih ngak siam lagaih oh yau hatai khin. Pacang cakak bruk tảo hôn, njauk hu sangka biak praong meng sang bac, pabak dom ilamu ka bruk likei, kumei, ka adat hukum, song dom trách nhiệm tamuh tabiak hadei di tuk likhah bloh, piah ka dom adei thau song palih ruah njauk ka rai duik di drei.

Jeng paglong bruk pato pakai gah giới tính, likhah caga boh sang dalam sang bac, muk Hoàng Thị Thu Hoài, Pasak Y tế huyện Krông Búk ndom lac, gah pato megru brei khang hatai jang, bruk pacang cakak tảo hôn meng meda mek hu dom siam lagaih:“Ngan song umo ni, rilo urang ndom lac bruk pato pakai gah tình dục yau dom bruk iek glang pren yava metian, menek lac ba jalan ka rasa nduac . Min, meyah kol drei ba jalan njauk ye dom adei thau sahneng njauk jang. Kayua yau nan ye,, bo patagok bruk pato pakai giới tính dalam sang bac Trung học cơ sở jeng lac bruk njauk ngak”

Khin gauk tuk umo daok hawa mbang, hawa me-in nan ye jiak abih dom gu duik pasang tok gauk tuk umo daok sit oh ka ginup tui hukum bhian daok dalam kan kathaot, oh hu bac daa, jhak ka pren yava. Meyah oh hu jalan ngak siam lagaih piah patrun bruk tảo hôn, bruk eik lipa kan kathaot, oh hu bac da-a, ye bruk tảo hôn jeng dok rah tabiak suai lavik di dom bhum bangsa takik di Đắk Lắk./.

 Urang lang: Hani Pha – 21/05