Ong Nguyễn Văn Nhơn, po gilai kapal taong ikan atah ar tapen tasik di tinh Ba Ria – Vung Tau brei thau lac, di dom yaok var mbang pamenan page, kaphe… dom adei sa-ai kapul Bien phong, Polih tasik saong karja palei bhian dakvah kakei mikva nao sik njauk caik hatai khik caga brei ka IUU jeng ye hukum nagar.  Yaok mbang trun tasik taong mek ikan, Balai bien phong jeng brei jakar, bol lin nao tal labik ghe kapal pahadar mikva taong mek kaya ikan tasik njauk hukum njauk adat, oh chung hukum bhum tasik langiu nagar jeng ye taong ikan di labik tasik juak gauk:

“Ini lac sarak biak siam di Ndang, karja dalam bruk ngak daok di tabung glaong yau ini, dakvah jakba mikva oh taong mek ikan di bhum tasik langiu nagar, ngak siam ngak njauk tui jalan thuan bhum taneh brei adat hukum tui gigah karja. Tapa dom mbang yau nan mikva pataom ilamo dak harei dak ralo, kham marat taoh klak kat kanyik, sanang hatai ngak mbang di tasik brei patagok bruk ngak mbang ka sang danaok di drei”. 

Dalam thun 2024, Kapul pan akaok Bonlin Bien phong tinh Ba Ria – Vung Tau ndah peih 4 brei ka bruk nao iek glang, taong yaom, lang yah brei ka dom ghe kapal nao tasik chung hukum IUU. Urak ini Kapul Bonlin bien phong tinh daok ba 3 baoh gilai kapal, 2 baoh kano saong yaok rituh urang jakar, bol lin peih pacang di dom tabah tasik piah pacang caga, iek glang lang yah dom ghe kapal mek malam, tuk ia ndik ia trun dauk nyaik di iek glang, caga pacang di urang jakar. Gam tui di nan hu nao rah iek glang, taong yaom biak khang, katang brei ka ghe gilai kapal ngak mbang di angaok tasik, padang jeng sa gavang vang vil toam dal meng tapen ar tabiak kreh tasik.

Tui Dai ta Đặng Cao Đạt, Urang pan akaok Kapul Bonlin Bien phong tinh Ba Ria – Vung Tau, dom bruk chung hukum adat ndah brei biai yah chip dil samu:

“Tame tuk tabung bruk, tuk ia trun ia tathuak Bien phong tỉnh ba ralo cara kadha pacang caga IUU piah pataom prein biai yah ka drah samar, jeng ye piah ngak njauk ngak siam tui Sarak Rajaei, Sarak 04 di Hoi dong thẩm phán pakat glaong”.

Gah ngak nong bhian jeng ye dang pambuak saong kapul karja ngak bruk di labik bhum taneh hu bruk taong mek kaya ikan tasik, meng di nan blaoh ba tabiak bruk langyah pambuak bruk bih meng 10 harei tagok, dom baoh ghe gilai kapal oh ganap taka tabiak tasik. So Ngak Nong – Alam tinh Ba Ria – Vung Tau jeng hu danak dak, hu bruk cambac lac brei ka urang jakar taong yaom, iek glang, duah mboh ghe gilai taong mek kaya ikan ngak chung hukum piah taong yaom tui adat hukum:

“Piah taoh kat kanyik di EC ye daok ralo bruk njauk ngak. Min, Ba Ria – Vung Tau daok gam kham marat, gam ba tabiak dom bruk ngak tantu, jao bruk ngak cambac lac ka yaok bhum palei, Sở jeng ye ka Bien phong, Bol lin tasik, Polih tasik. Langiu di nan, dom palei nao tal labik, tal yaok pabah mbang, taoh tal dom baoh sang piak khik ramik iek glang gilai kapal, dalam nan hu dom baoh ghe gilai oh ganap taka brei tabiak tasik”.

Gam tui janih kadha gigah njauk ngak drah capat brei ka bruk jhul khang bruk caga, pacang bruk ngak IUU di dom kapul kajar gam saong tame bruk di dom gah karja jeng ye di dom pakat uy di karja palei dan saong mikva urang ngak mbang tasik, tinh Ba Ria – Vung Tau jei hatai " tal tanut" taoh hu kat kanyik gah kaya ikan ia tasik, daong ka bhum palei hu bhum tasik piah ba gah kaya ikan tasik Viet Nam patagok karo kajap, hu hatai tangung javap dan saong uak drei tame dunya./.