Bruk dreih gauk di dom tỉnh Nam Trung bộ lac hu takai tasik atah, hu rilo đầm, vịnh lagaih piah cak rok patagok bruk raong kaya ikan min jeng bhian gaok ribuk, ia sua. Bhum gah Pai lac mbon ceik, hu độ dốc glaong, bhum taneran sit sot, kan ngak jeng bhum pala drak hu mblang taneh praong. Ngak nong di dom tinh, ban ini rilo meng lac pala dom phun meng kan piah khik kajap raidiuk, kan ngak jeng dom bhum pala sa janih praong. Dom kaya pandap yau baoh thanh long, tôm hùm.. jeng daok pagam pambak tame bruk pablei tabiak negar langiu tui jalan tiểu ngạch.

Urak ini, dom tinh, ban ini daok salih tapa pala dom janih phun hu yaom pablei salih glaong jang dom janih phun pala meng kan yau ye phun jru, glai kayau praong, dom janih phun gia vị, phun mbang baoh.

Amuk Nguyễn Thị Tố Trân, Phó yam ndok Sở ngak nong saong patagok palei pala tỉnh Bình Định brei thau: Bruk salih taneh pala tabau tapa pala ratak lo di pak ini hu kein laba kinh tế glaong. Bình Định daok pamaong tal bruk cak rok patagok ngak nong pambuak haong du lịch sinh thái: “Tỉnh meda chuẩn hóa dom pandap panda kaya nong, padang angan OCOP. Daok pamaong tal baoh karuac bung kalik hijao OCOP ka huyện Hoài Ân. Ngan haong huyện Phù Cát, 1 ribau héc ta li-u dừa xiêm meda padang angan OCOP ka li-u. Peih bruk, daong ba, cak rok patagok jeng bhum du lịch, rivang iek bhum pala pa-aok, biak gheih saong lagaih piah ngak du lịch sinh thái. Pablei pandap OCOP ini haong yaom glaong ka darak pasa di dalam taneh ia.”

Tapen tasik Nam Trung bộ hu takai tasik atah, mblang taong cap kaya ikan praong pambuak haong bruk ngak mbang duah jien yaok triệu urang taong ikan di dom palei ngak ikan. Min anak meta mboh lac, dom kapul gilai hu prein sit, urang taong ikan takik hu pato tacei, dom kaya ikan dak harei dak takik nao.

Ong Trần Đình Luân, akaok Cục kaya ikan khan lac, meng lavik mai, dom tinh ban daok taong cap nduac tui sản lượng, ba tal rilo bruk oh siam, takik hu kein laba saong jhak ka alam môi trường. Dom tinh, ban njauk salih jalan ngak, gam taong cap, gam paglaong bruk khik ramik, salih bruk taong cap kaya ikan jaik takai tasik tapa raong pala. Dom pabah lamnge ikan dalam đô thị njauk patagok bruk pataom veik haong dịch vụ du lịch piah pablei kaya ikan di urang taong ikan: “Hu labik dom bhum gam khik ramik haong gauk pambuak haong khik caga kaya ikan. Jao ka mikva oh nao taong cap tra, khik caga labik nan, peih bruk taong cap haong gauk. Taong cap njauk bilan, njauk kích cỡ, sản lượng hu kuhria ginup abih. 3 thun hadei meng mboh kaya ikan di labik nan hu rilo gilac veik, mboh hu cambuai khim klao di mikva urang taong ikan."

Ong Lê Minh Hoan, Akaok Mintri Ngak nong saong patagok palei pala brei thau: Njauk maong iek kinh te tui jalan nao jaik rilo janih, rilo bruk, rilo yaom glaong. Meng bruk di langik tasik, dom tỉnh Nam Trung bộ hu rilo siam lagaih, prein khang ka bruk cak rok patagok ngak nong di rilo gah, yau raong pala saong taong cap kaya ikan, raong yến sào, padang dom bhum pala sa janih phun …. Ong Hoan ndem lac: “Jalan saneng brei cambaih jang, jalan saneng brei dalam jang. Rilo janih pandap panda, rilo darak pasa. Ka saneng tal bruk pablei tabiak negar langiu, taong abih dom ghing mbang, nhà hàng njauk parang tabiak dom pandap OCOP. 6 tỉnh tapen tasik ini, gah ngak nong pabak ka du lịch lac ginup paje."

Tui akaok mintri Lê Minh Hoan, Nam Trung bộ lac bhum hu prein khang biak praong ka bruk cak rok patagok du lịch. Dom tinh ban njauk pamaong tal bruk pambuak cak rok di gah ngak nong saong du lịch piah daong ba gauk, ngak tabiak dom pandap karei di drei, ba mai yaom glaong ka gah ngak nong saong du lịch./.