Tamia xoe Thai hu pok brei angan inem krung ilamu phi vat the 

Ban sit Nghĩa Lộ, tỉnh Yên Bái urak ini hu 196 kapul daoh tamia bhap bini, dalam nan hu labaih 15 kapul daoh tamia praong. Dom kapul daoh tamia ini, lac dom hạt nhân dalam khik ramik, patagok saong yaih khan ilamu tamia Xòe Thái. Adei Lường Thị Minh, urang dalam kapul daoh tamia palei Đêu 2, xã Nghĩa An khan lac:

"Tamia  xòe saong taong abih dom ragu tamia karei, khin  xòe dẻo, xòe mekre ye oh lac meng tangin takai rup thaik saoh, bo daok brei hu hatung hatian, nan ye langiu di bruk bhian pasram, kol adei brei caik hatai tui pang dom amuk, dom sa-ai kumei khan veik saong thau jang ka makna di dom ragu xòe meng kan piah dalam tuk parang me-in, yaih khan hu ragu tamia meng kan, patagok jeng dom ragu xòe ndung bak ilamu nghệ thuật glaong jang min oh lai, srau haong ilamu di dom bangsa karei.

Meng thun 2013, ban sit Nghĩa Lộ hu ramik ngak baoh tapuk langyah brei thau "Ilamu tamia xòe meng kan di bhap bini bangsa Thái bhum  Nghĩa Lộ - Mường Lò”, kayua nghệ nhân Lò Văn Biến ngak chủ biên piah pato veik 6 ragu xòe dalam bhap bini. Taong abih dom urang jakar di ban sit Nghĩa Lộ lac tal camereip hu pato pakai, hadei di nan, dom urang ini trun tapak dom xã, phường, puk, palei piah pato veik. Meng hu yau nan, tal urak ini, di Nghĩa Lộ haong huyện Văn Chấn hu labaih 5.000 nghệ nhân xòe gheih, xòe mekre, brei mboh hu “suan yava” di xòe. Ong Lương Mạnh Hà, Phó Chủ tịch UB bhap bini ban sit Nghĩa Lộ brei thau:

"Kol dahlak daok patagok bruk pato dom ragu xòe dalam dom sang bac. Daok brei padang dom kapul xòe di dom puk palei piah patagok ilamu karei di drei dalam bhap bini bangsa Thái".

Di châu Mường So meng kan, urak ini, lac dom xã Khổng Lào, Bản Lang saong Mường So, huyện Phong Thổ, tỉnh Lai Châu, di yaok palei Thái tuk halei jeng hu meng 2 tal 3 kapul tamia xòe. Rilo labik jeng hu ba tamia xòe tame sang bac piah pato, daong ka rai ranaih thau saong khik ramik ilamu siam mekre di bangsa drei. Ong Vương Thế Mẫn, Chủ tịch UB bhap bini huyện Phong Thổ brei thau: Huyện hu danak dak patagok du lịch pambuak pagam haong ilamu bangsa, dalam nan pataom tame xòe Thái di bhap bini. Kol dahlak daok brei padang veik dom lễ hội, saong peih ngak dom bruk ilamu, pambuak pagam haong bruk ngak di bhap bini daok di dom puk palei, dalam nan pataom tame dom ragu xòe piah khik ramik saong paglaong labik dang di dom ragu xòe.

Ong Trần Xuân Việt, Phaok Yam ndok Sở Ilamu, Thể thao saong Du lịch tỉnh Sơn La brei thau: Bruk khik ramik saong patagok yaom glaong ilamu dom bangsa takik jeng yau ilamu bangsa Thái di dalam tỉnh Sơn La lac bruk njauk  ngak chip, gam lac bruk suai lavik:

“Tapa mbang ini, kol dahlak brei pathau khan piah dom kapul nao peih praong bruk ngak saong khik ramik dom bruk Xòe Thái, abih di nyu lac dalam dom bruk ilamu yaok harei piah ka bhap bini patagok dom siam mekre di Xòe Thái hu UNESCO vak angan lac inem krung ilamu phi vật thể di menuac sia dunya”

Bruk UNESCO vak angan Xòe Thái tame angan inem krung ilamu phi vật thể lambaok di menuac sia dunya lac jalan peih tabiak praong piah khik ramik saong patagok yaom glaong di janih tamia meng kan hadah krah ini saong ngak brei medeih tagok hatai tự hào di dom rairah, abih di nyu lac rai ranaih caik hatai sangka jang tal inem krung. Gam haong nan, daong brei mboh bruk ginup meda, yaom glaong saong ilamu di Việt Nam dalam ilamu di menuac sia dunya.

Piah khik ramik saong patagok yaom glaong ilamu meng tamia xòe, dom puk palei dalam Điện Biên, Lai Châu, Yên Bái saong Sơn La jeng daok padang ngak dom danak dak pato pasram, brei thau xòe Thái ka dam dara, rai ranaih. Gam haong nan, rilo tỉnh ban caong khin Mintri Ilamu, Thể thao saong Du lịch ba tabiak jalan cambaih laih dalam bruk khik ramik, patagok xòe Thái piah dom tỉnh, ban hu jalan peih ngak njauk tui dom bruk ba tabiak, njauk tui sanya./.

Urang lang: Mousaphuong- 25/9