Dom harei tapa, di tỉnh Đắk Nông hajan khang dui atah ba tal rilo bruk glut jaleih taneh biak khang, ngak khut rilo sang danaok, njam patam saong danak dak praong. Di huyện Tuy Đức, hu rilo labik taneh talah ra-ai atah labaih 200m di puk Bu Krắc, xã Quảng Trực. Tal dah page harei 5-8, dom labik talah ra-ai nan  daok praong tabiak, dui atah labaih 1km saong ka oh dang veik. Daok labik glut jaleih di jalan Hồ Chí Minh, labik tapa phường Nghĩa Thành (ban Gia Nghĩa, tỉnh Đắk Nông) glut jaleih daok rahtabiak biakkhang, mbaok jalan glut trun, hu labik dalam jaik 1m; rilo baoh talah, ra-ai, taneh gah ala tambaok tagok talah abih nền sang. Dalam tuk nan, di danao ia thủy lợi Đắk N’Ting (hu padang ngak praong labaih 1,2 triệu m3 ia di xã Quảng Sơn, huyện Đắk Glong, tỉnh Đắk Nông) jeng daok mboh glut jaleih biak khang. Piah khik kajap salamat ka rahra, kanja pak ini samar drah panduan ba labaih 100 baoh sang ngan haong yaok ratuh menuac tabiak truh bhum mbuan glut jaleih.

Di Lâm Đồng, meng akaok thun tal ini, hu 5 bruk glut jaleih taneh ngak brei 9 urang metai, 4 urang karei njauk rambuac. Glut jaleih taneh gam haong hajan khang, ia dauk, hangin ribuk ngak khut 235 baoh sang, 6 mbaik tatua sit, 2 labik sang bac, 4 danak dak thủy lợi gam haong yaok ratuh mét jalan. Sa dalam dom makna ba tal glut jaleih dalam tukvak tapa lac kayua hajan rilo, dui atah, ngak ka mblang taneh nyu lamin. Langiu di nan, ngan haong dom nyaom taneh rilo meng lac taneh bhong bazan, taneh phù sa..., bo daok hu độ dốc glaong, taneh lamin, nan ye biak mbuan glut jaleih tuk hu hajan dui atah. Piah pacang caga bruk ni, urak ini UBND tỉnh daok jao ka dom huyen, ban pasang iek, thau cambaih yaok labik mbuan glut jaleih, hadei di nan padang ngak bản đồ dom labik, hadom rahra, pakat mbuan glut jaleih, jalan langyah.

Ndem ka makna labik mbuan rahtabiak glut jaleih, ong Võ Trung Mạnh, akaok UBND huyện Tu Mơ Rông, tỉnh Kon Tum brei thau lac, huyện hu rilo mbuan ceik, taneh meluk cuah nan ye mbuan glut jaleih tuk hu jalan khang. Bruk glut jaleih ngak kan kandah biak praong tal raidiuk di rahra. Hu tuk, glut jaleih lam lahik jalan, rahra njauk pacang cakak. Urak ini, huyện daok hu labaih 120 baoh sang daok dalam bhum mbuan njauk glut jaleih. Di bilan hajan ribuk, huyen meda panduan ba dom baoh sang ini nao tal labik salamat. Tui ong Vũ Văn Thuần, Phó Yam ndok Sở jalan mbak pajeng ba Kon Tum, bruk glut jaleih jalan mbak di bilan hajan, ribuk lac bruk duh hatai praong. Dom thun tapa, hajan ribuk rahtabiak ngak glut jaleih rilo jalan, khat lahik biak trak, kan kandah tal bruk ngak mbang, pala drak saong bruk nao mai di rahra.

Daok di Bình Thuận, rilo harei tapa, rahra daok di dua gah jalan ĐT 719 (lac jalan praong tapen tasik pambuak dom labik du lich gah maraong di tỉnh Bình Thuận), rilo mbang mboh bruk glut jaleih taneh, cuah, ia gam haong gluh bhong meng mangaok mbuan tuh trun, lam abih mbaok jalan, ngak kan kandah biak trak tal raidiuk di rahra, tal bruk du lịch saong jalan mbak nao mai. Mbang hajan khang dui atah bahrau blaoh, jalan roya 55 labik nao tapa xã Đa Mi, huyện Hàm Thuận Bắc (tỉnh Bình Thuận) jeng rilo mbang rahtabiak dom labik glut jaleih khang, jaik gauk, ngak kan kandah biak trak tal bruk nao mai saong mbuan ba tal metai lahik…

Pambuak tal bruk taneh, cuah, gluh bhong gam gam tuh trun jalan ĐT 719, ong Huỳnh Ngọc Thanh, Phó Yam ndok Sở Jalan mbak pajeng ba tỉnh Bình Thuận, tacei tabiak makna lac, dahlau deih dom mbuan ceik labik ini biak rilo phun hijao, min kayua bruk ngak di anek manuac, nan ye urak ini oh daok veik. Meng nan, yaok mbang hajan khang lac taneh, cuah tuh trun sang rahra saong jalan mbak.

Anak mata, tỉnh Bình Thuận roh duah piah ngak dom pabah cống praong piah tathuak dom cuah, gluh bhong tuh trun. Suai lavik, njauk padang ngak daning piah pacang dom bruk glut jaleih, min phun jien biak praong nan ye njauk cang jalan ba tabiak. Daok dom bruk glut jaleih gam gam rahtabiak di jalan roya 55 tapa tỉnh Bình Thuận, Sở Jalan mbak pajeng ba tinh hu likau Cục Jalan mbak Việt Nam pathau khan Mintri Jalan mbak pajeng ba tabiak panuac samar drah ka bala. Gam haong nan, likau Cục Jalan mbak Việt Nam tabiak bruk padang ngak danak dak samar drah haong brei jalan ngak piah ka Sở Jalan mbak peih bruk padang ngak./.